22
Yerusalem We' Sin" Ra" Mungdao:
1 Ce wa qhu" lho lao: khaung: we' sin" ra" mungdao: ngad: ra". Pe" boe" na: i? Vogaung" byu qe alhab' mo, wa yham khaung dao jham mae pe" poe kad' na: ako" i?
2 Vomo" geim" mae thoe we' mug' din: ru we' yhai:- na: ako".
Ce: gye poe mae shid: lo" ko" ra" naonhaung" byu qe wa gyekhe' shid mo, mangad: ko" ngad: ra".
3 Naonhaung" au: jhaung qe alhab' tao" phao: lo" mung: myo: dakhe' re: mabag: zao" shire taung" yu: pye' qhug' ako".
4 Shid: byaug ko" ra" nga" byu alhab' mo; qhid' mae" alokho: sho' ngug: yu nae" ana" ngore za: nha: to: co' la,- ngore nhag' tang" nae" daseim" wa,-
5 Ce: ayo, wa byodin byosho: boe" ru- gye seim" ru- qhu" lho lao: khaung: mae athaui: anhaung" ru jham re qam: bo: ra" Asang kho:kham: yang ngonhaung" dao mae nhao: ke' byid: va" ra" ayo, ngad: ra". Ngonhaung" nho: vogaung: vang jham wa be; khyang: khyo" pye' mung: bao" thaug' yu nae" hug' yao: ra" thoe wa bug gaung jham: agyo: mae lao thao tau" na: ra".
6 Elam: mung" mae" gyezo: qe wa lo,la: we' myo: jham ci yang: myao: dao mae zaung yang: joe" li" ako". Kira mung" mae" gyezo: qe wa yao: bam: go jham re jin" jin" kad' ci: ako".
7 Myid xau gai: ra" Yuda lao: khaung: mae" mo, wa gyekhe' myao: lhin" jham byang" sho'- myao: dao mae zaung: ra" gyezo: qe wa Yerusalem kham: mo" jham: qhid' au: mae ye; jo; ako".
8 Yuda nho: gye gug: gam jham wa man" byaug: ako". Ai boe" lao"-
Naonhaung" wa shae lhae jhi mae" phoe' yu: ako".
9-10 Yerusalem vang jham mae" nyhang" byao qo: ra" jo, qo jham re naonhaung" the' myao: li" genae". Naonhaung" wa Yerusalem mae" yham jham re ca: qu" mung: vogaung: vang nyhang" byao nae" laug baui jham qo" nae" qhid' mae" daqhae: re phyo' khyo" pye' ako". Qid qaung" to: nae" qhid' mae"-
11 Qid tham: xug' mae" yug: gyo" lo: ra" qid re tang" to: nae" qid kyaung" dalam: naonhaung" kad' ako". Ngadqere: cegu: alhab' re ganhae" mae" yaung: to" ra" yaug- aire boe" nhao: ra" yaug Mao"So re nyang" galho: naonhaung" matae" gyo: ngad: ako".
12 Qam: bo: ra" Asang kho:kham wa ai: ayo, mae kaug' ngug nae"- naonhaung" au: jham re qaug mung: jid: mo" mai bau: ve, genae" qhid' mae" naonhaung" re khai: na: ra".
13 Ai: atha" naonhaung" qi: jung" mung: poe kad' ako". Yao we' nung: jham re naonhaung" se' zo: mung: sabyi qang: shaug' ako". Naonhaung" wa ngonhaung" zo: re: zo: shaug' re: shaug' gelang:- ne, kao wa ngonhaung" shid: re shid nae"- ga: ta" ako".
14 Qam: bo: ra" Asang kho:kham wa yao: yao: ngore dao: jhau mung: yao: bam daui: na: ra" myhao" ce: makhyang" rure khonhae" re: yao: bam re qobo makhyad' byid: nae". Ngo qam: bo: thao" ra" Asang kho:kham ta" to: va"- ga: ta" ra".
Shebna Re Ta" Peim: Byid' Ru
15 Qam: bo: ra" Asang kho:kham wa kho:kham yham khaung mau" pyo yaug Shebna jhao" ye: nae" ngore ta" ra".
16 Yao: re nao khag' ngad: ein: jho: i? laug byo, khyid mae nao yao" qhid' mae" lab kyaung" yu nae" pe" akho: akhang" qo" i?
17 Nao wa akhyag: ra" yaug ngad: re ngad nae". Ngadqere: Asang wa nao re gaug: yu mung: shapye' pye' li" nae".
18 Yao: wa nhai: baung: re we' dakhyo: nao re gaug: yu mung: je: qi" ra" mung"dan: khyo pye' zaui: ke' li" nae". Nao gyai nga: kad' phug: lo: ra" gyekhe' myao: lhin" jham: anhae mae nao shid: li" nae". Nao wa ni" asang: yham byu qere qho' phyo' byid' ra".
19 Asang nao re mau" mae" phoe' pye' li" nae". Ni" nho: myhao: ra" aya: mae" nao re khyo" pye' li" nae" ein: ta" wa, ga:- ngore ta" ra".
20 Asang wa Sheba re airu: boe" li" lao"- nga" daui daui yaug Hilkia nho: yauggai zo: Eliakim re ngo nhao: ke' nae".
21 Ni" aya: bau: qhang yao: re vhe' mung: phyid' cui: yao: re cui: byid: nae". Amung: nao qo" lo: ra" kheim: so' alhab' yao: re ngo byid: nae". Yao: wa Yerusalem we' Yuda byu qenho: yao: pho" we' dakhyo: ngad: li" nae".
22 Davi nho: myid:zo: kho:kham o mae" bin sho' kheim: so' yao: re ngo byid: nae". Yao: wa yung" kham: thug' qo" sang: li" nae". Yao: phung" rure khag' maqo" pyid'- yao: pyid' rure khag' maqo" phung" genae".
23 Daung" zang mae we' dakhyo: yao: re ngo tang za: taui" to: nae". Yao" yham khaung alhab' qhid' mae" nga: ye, khyo apan yao: ngad: li" nae".
24 Ngadqere: yao" amyu" ba nam qe we' cao: khug: na mo, alhab' wa yao: re qola: boe" nhao: li" genae". Yao: bam wa yao" dao mae ug' jham lhao" to" ruru:- daung" zang mae khug' jham lhao" to" ruru: lao" jo; li" genae".
25 Airu: boe" lao"- tang: za: taui" te' to" ra" daung" zang wa shoe mung: gyang: lo" li" nae". Aiwa ai: dao mae lhao" to" ra" gu: ja: khao: ngo" nho: lo" thao" ru ngad: li" nae"- ga: Asang ta" to" ava" ein:- yeta" kyo: nae" ngore ta" ra".