23
Phoenikia We' Sin" Ra" Mungdao:
1 Ce wa Ture we' sin" ra" mungdao: ngad: ra". nammugdara taung gaung mae na ko" ra" lha gau: mo, naonhaung" we"- kaug' yang: gyi: ngug ge,- ni" yham mug: Ture gau: khung: wa phyo' qheim" pye' qhug' avako".
Yham jham we' gau: khung: jham wa byo; qeim: jo; avako". Naonhaung" qid sang pho jham Kupru mae" dam: tug' lo: na ko" au: ai: lau dao: re naonhaung" the' gyo" li" genae".
2 Sidon phaga: pho" qe naonhaung" we"- kaug' ngug ge,.
3 Naonhaung" wa Egutu mung" mae qho" ra" gaug zo re vai: yu nae" we' aung: nae" byu qere panglai: gau:- nhao: ke' mung: byumyu" alhab' we' phaga: mau" kad' nae" nhao: ke' ako".
4 Sidon vogaung: we"- nao nga: yeim: ava". Pang:lai:: we' no; ra" nammugdara mo" wa nao re ha: pye' mung: ngo wa zoshao dayaug re: maqo" qu"- ngo wa yauggai myiqe: zo: qe re khonhae" re: makhau: qhi" qu"- ga: ta" ra".
5 Ture phyo' qheim" pye' va" ga" rure yao: bam the' gyo: lao"- Egutu byu qe lhao" re: din: mo, mung: gyaug: li" genae".
6 Phoenikia byu qe we" kaug' yang: gyi: ngug ge,- Spain khyo phao: loe, nae" qam: ke' ge,-
7 Ce: genae" mae" te" to" ra" Ture vogaung: wa ngaui bau" ru gai: jo, nae" i? mug: sag' te: nae" qhid' mae" vobyu qere panglai: gau" phyid' ye: nhao: ra" vogaung: gai: boe" nae" i?
8 Mug: myid dao mae nga: yhe' byid: qhug' thao" ra" phaga: kho:kham nau" qe na: ra" kho:sin" vogaung: Ture dao mae cegu: alhab' re boe" nhao nae" yaung byid: yaug wa khag' ngad: ra" i?
9 Qam: bo: ra" Asang wa aire yaung byid: yaug ngad: ra". Yao: bam kad' lo: ra" mau" mathao mae ngad beim: ko" rure thao" lo" nhao nae" we' yao: bam: nga: ye; ra" byu qere nga: yeim nhao nae" qhid' mae" yao: aire yaung: to" ru ngad: ra".
10 Spain mug: sag' jham mae na ko" ra" byu qe we"- mung"dan: re yo yekad' zo: ge, naonhaung" re gug: gam byid: nae" byu khag' mana lo:-
11 Asang wa yao" lo, re panglai: dao khyo yheim" ke' mung: mung"dan: jham re tau: phaug' pye' ava". Phoenikia byu qe: phaga: mau" kad' ra" jo, qo ajhaung jham re phyo' pye' nae" yao: amyin" byid' ava".
12 Sidon vogaung: we"- ni" ngaui pyo" ru wa thao" byaug: ava". Ni" mung" byu qe wa zag zo: qhug' ako". Yao: bam Kupru khyo phao: loe; ye: gesho' ngadqere: gug: gam: ru yao: bam maqo" shi: genae".
13 Seyo: gug'nyhug' lhe: jham re Ture khyo" tao" lai: lo" nhao yaug wa Asuri byu qe mangad:- Babelon byu qe angad: ako". Babelon byu qe wa gyebyu zaung jham re tau: to' mung: Ture nho: gyetab vogaung: jham re phyo' khyo" pye' yang: vogaung: re byo; jo, nhao mo, ngad: ako".
14 Nammugdara taung gaung mae na ko" ra" lha gau: mo, naonhaung" we"- kaug' yang: gyi: ngug ge,- naonhaung" ngha: na: ra" vogaung: wa phyo' pye' qhug' ava".
15 Kho:kham dapyad ngad: ra" nhad' xe zin lam: lam: Ture re to" myhid' to: qhug' ra" ayo, joe" lo: li" nae". Ai: zin na jham gan: byaug lao"- Ture wa nghaui" caung: mae bo: ra" shava myhi" we' dakhyo: ngad: li" nae".
16 Aiwa su: yang to" myhid' pye' va" ra" shava myhi" nao we"-
Ni" tang: re gaug: ci yang: vogaung: mae su" lhang: qin" wa,-
Yauggai jham re nao jhao" dalhang dam: li" nhao nae" qhid' mae"
tang: be, yang: ni" nghaui" caung: jham re dam: nghaui" caung: wa,- ga" ru ngad: ra".
17 Nhad' xe zin gan: byaug lao"- Asang wa Ture re azhao: mae" phaga: mau" mae dam: kad' nhao nae". Yao: yao" gaung re mug: myid mae" mung"dan: jham alhab' khyo shava myhi" khyo" ngho: zo" li" nae".
18 Yao: phaga: ga: yang: qo" ra" ngaui alhab' re Asang re qhaug' byid' li" nae". Aire yao: maqaung" to: nae". Ngadqere: Asang re caung:pa" ra" mo, wa yao" ngaui re zo:ve we' yao: bam: qo ca" ra" mai bau: vai: rumae yhung" pye' li" genae".