21
Babelon Gyoe; Gyo" Lo" Nae" Qhu" Lho
1 Ce wa Babelon we' sin" ra" mungdao: ngad: ra".
Din" pyad' yo khyo" sham" lai: lo" ra" la sham" we' dakhyo: kyi" khyag' ru wa gyaug pho: mung"dan: mae" joe" lo: li" nae".
2 Ngo wa se' da: be, khyad' kad' ra" ve, lho gyevo: lo, khyo ab byid' pye' ra" ve, lho- byo; gyo" lo" ra" ve, lho re the' myao va".
Elam gyetab we"- khe' zin: wa,- Media gyetab we"- vogaung: jham re vang" to: wa,- Babelon yang boe" nhao: ra" dayin dayo: qug: khai: re Mao"So thao" lo" nhao nae".
3 Ngo the' myao the' gyo" ra" ve, lho wa ngore gyaug nhao mung: zo:khau no no: ra" myiqe: we' dakhyo: ngore no nhao: ra".
4 Nga" au: wa yam: na mung: gyaug yang: ko, ko, nin" na:- ngo wa myi" thao joe" lo nae" myid ngadqere: ngore gyaug: ru za: boe" nhao: ra".
5 Qhu" lho mae zo: shaug' poe wa jin" jin" ngad: jo; ra". Bang" vo qe zaung nae" sug' gug jham re phyid: myhung" to" ako". Yao: bam zo: shaug' na: ako". Nyag din taung"- gyezug: qe we"- naonhaung" qo jham re nyhang" seim" ge,- ga: amyin" jhu myang: thug' li" ra".
6 Ailao" Asang wa ngore- jin" byu qekhyo" to: wa,. Yao: the' myao: ja: lau lokyo: nae" yao: re ta" wa,-
7 Yao: wa shid' zo: dazam" jin yang myao: dao mae li" na: ru we' loze we' gola:u dao mae byu qe zaung yang: li" na: rure yao: myao: ngad: re yao: wa ai bam re nyang" za: qu" ca" nae" ngad: ra"- ga: ta" ra".
8 Jin" byu wa zug: pho" we"- ngo wa myi" re: na" re: ye; jo, yang: zaung" lo va".
9 Nyag din taung" aibam joe" li" ako". Shid' zo: zo: jin yang: myao: dao mae zaung: li" ako"- ga: lota" kyo" ra". Jin" byu wa Babelon gyoe; gyo" byaug: ava". Yao: bam caung:pa" byid' ra" so alho jham alhab' wa myid gaung mae gyoe; man" jo; ava"- ga: lau lota" kyo" ra".
10 Nga" byumyu" Israel we"- naonhaung" wa jung: gaug re we' dakhyo: nao" ru qhug' lo: ako". Ngadqere: Israel nho: Mao"So- qam: bo: ra" Asang mae" ngo the' gyo" yu: ra" lau dao: gai ana" naonhaung" re hau" kyo: byid: va".
Edom We' Sin" Ra" Mungdao:
11 Ce wa Edom we' sin" ra" mungdao: ngad: ra". Edom mae" byu dayaug wa- jin" byu we" myi" wa khonho" phyad yang: gan: lo" nae" i?
Khonho" phyad yang: gan: lo" nae" khyo ngore ta" kyo: la,- ga: ngore yao: ra".
12 Ngo wa- ne, seim joe" li" na: ra". Ngadqere: myi" re: dam: joe" lo: li" nae". Nao dao: dam: myid: nug yang: ngad: re wa tug' lo mung: myid: la,- ein: phaug' tau" ke' ra".
Arabia We' Sin" Ra" Mungdao:
13 Ce: mungdao: wa Arabia we' sin" ra" mungdao: ngad:-
Arabia mung" mug: gao: mae yao: bam: phaga: bun zai tho: ra" lhin" jamu kad' na ko" ra" Dedan byu qe we"-
14 Naonhaung" jhao" joe" li" ra" qid shab' mo, re qid byid: jhaug' ge,- Tema mung" mae" mung" byu qe naonhaung" we"- phao: khug: na mo, re zo:ve byid: zho: ge,.
15 Yao: bam re se' pye' nae" jin" jin" ngad: ra" shae pyang: jham mae"- yao: bam re bag nae" jin" jin" ngad: ra" lo, la: jham mae"- gye poe gyaug pho: alhab' mae" phao: loe, nae" qhid' mae" mung" byu qe phao: lhau: ako".
16 Ai: thao Asang wa ngore- dazin tab ngad lao"- Keda byumyu" qenho: qi" qhang: ru wa thao" byaug nae".
17 Lo, la: bag mo, wa Keda byu qemae" lhe" thao" mo, ngad: ako". Ngadqere: aibam mae" damyo" za: dang: li" genae". Israel nho: Mao"So Asang ngo ta" to: va"- ga: ta" ra".