20
Lapa Gaung Pyad' Nho: Ve,So:
1 Asuri kho:sin" Sargon nho: amyin" yang Asuri gyezug: mo" pho" wa Philisti vogaung: Ashdod re gye yezin" ra".
2 Asang wa sam zin gau: qhid' khae" yang: Amod nho: yauggai zo: Esaia re yao: ve; ci: ra" jid: mo" mai bau: jham we' khyid zhaung: re khyad' pye' nae" qhid' mae" ta" ra". Yao: wa mho dao: tae" gyo: mung: gaung pyad'- khyid cin du" lhang: lhau: ra".
3 Ashdod gyo" seim" lo" lao"- Asang wa nga" daui daui yaug Esaia wa gaung pyad' khyid cin du" lhang: lhau: ru sam zin ngad va". Ce wa Egutu we' Ethiopia mae boe" li" nae" ngad: ve, so: ngad: ra".
4 Asuri kho:sin" wa ce: mung"dan: shid' lam: mae" yao: taung" yu: ra" kyam: byu qere gaung pyad' jhui" lo" byaug: li" nae". Angai aqi: yao: bam: phyid' the: wa de:de: gaung pyad' khyid cin khyo su" li" genae". Egutu re qho' phau: nhao nae".
5 Ethiopia re khug ngha mung: Egutu khyo re phug: ra" mo, wa qho' phau: mung:- yao: bam: myid lao" khyo wa mhan" boe" byaug nae".
6 Ai: ayo, joe" lao"- Philisti mung" qid yae cao" yang: na mo, wa- Asuri kho:sin" lo, mae" ngonhaung" re gug: gam byid: nae" ngonhaung" myid: lam: to" ra" byumyu" qe: dao mae pe" boe" va" rure qu" ge,. Ngonhaung" khoru: gai: na: dang nae" i? ga: ta" li" genae".