24
Dazid Thaung" To" Ra" Dao: Thang"
1 Asang wa Moshe re- nao Arun- Nadab- Abihu- we' Israel byumyu" qenho: au: jhaung qe nhad' xe yaug bam dao khyo ngojhao" do; li" geri:- naonhaung" va: mae ngad shiko" au:- goe; gyo" yang: caung:pa" ge,.
2 Nao mae" je yang: khag' re: ngojhao" date' li" ge,- mo,byu qe wa bam khyo lhao" re dado, li" ge,- ga: ta" ra".
3 Moshe wa Asang: amyin" dao: jham we' tarha" alhab' re mo,byu qere lo" ta" kyo" ra". Mo,byu qe alhab' re:- Asang ta" to" ra" gu: alhab' re ngonhaung" phug' cao" nae"- ga: daga" za: phaug' tau" ako".
4 Moshe wa Asang: tarha" zang jham alhab' re tung" ra". Thao: ba ne seim no' yao: wa bam khyid mae phan dalam: kad' mung:- Israel byumyu" daxe: shid' kaung re dakaung: qhid' mae" laug baui dabaui baui- laug baui daxe: shid' baui zhaug' ra".
5 Ai: thao Moshe wa zolau: qere nhao: ke' mung: Asang re xeim: ngaui" byid: nhao: ra". Zam" khug: ra" xeim: jham khyo" nung: daqhae: rere: xeim: ngaui" byid' ra".
6 Moshe wa gug'nyhug' jham: nho: sa: agaung: daqi" re yu: mung:- khug' jham mae ke' ra". Gatau agaung: daqi" re wa phan we' tau" te' shad' khyo vhe' sin" ke' ra".
7 Ai: thao yao: wa Asang: tarha" zang jham tung" to" ra" dao: thang" mugsug' paug' re yu mung:- mo,byu qere thoe qi: we' nghe' kyo" ra". Yao: bam wa ngonhaung" wa Asang re mho dao: tae" gyo: mung:- yao: amyin" byid' to" ra" gu: ja: khao: ngo" re ngonhaung" kad' nae"- ga: ta" ako".
8 Ailao" Moshe wa khug' jham: akhug mae" sa: re yu yang: mo,byu qe: dao mae vhe' sin" ke' mung:- ceru wa Asang wa ce: tarha" zang jham alhab' re naonhaung" re byid' au:- Asang naonhaung" we' to" ra" dao: thang" re dazid thaung" te' ru ngad: ra".
9 Moshe- Arun- Nadab- Abihu- bam we' Israel byu qenho: au: jhaung nhad' xe yaug wa bam khyo do, ye" ako".
10 Yao: bam wa Israel nho: Mao"So re myao: ako". Yao" khyid qao: mae Saphira laug sin" myhung" to" ru we' dau mung:- mug: nyhug re" ru: nyug: ra".
11 Mao"So ai: Israel byumyu" qenho: au: she mo, re dae mate' ngad: ra". Yao: bam wa Mao"So re myao mung:- ai:thao yao: bam wa daga" zo: shaug' ako".
Sina Bam Dao Mae Moshe
12 Asang wa Moshe re- bam dao khyo ngojhao" do, li" ri:- nao cemae na: ra"gyo: mae- byumyu" re mho" byid: nae" qhid' mae" ngo tung" to" ra" tarha" alhab' bo: ra" laug pye: shid' pye: ngo nao re byid: nae".
13 Moshe we' yao" bao" thaug' yaug Yoshu wa nyhang" seim" jin" mung:- Moshe wa ai: gyang" lho" bam dao khyo do, ye" lo" ra".
14 Moshe wa au: jhaung qere- nga" shid' yaug dam: tug' joe" lo sho' ce: jo, qo mae nga" shid' yaug re lao" na ge,. Arun we' Hura wa cemae naonhaung" we' daga" ngad: ra". Airumung: ta" sho' pye' nae" jho" ngag: ra" khyo- mung bo yaug wa yao: shid' yaug jhao" qo" ye" ra"- ga: ta" ra".
15 Moshe wa Sina bam khyo do, ye: mung:- jham thaui wa ai: bam re nghoe' pye' ra".
16-17 Asang: qhid' kheim: mae" bao qhui: ra" bo" bao wa ai: bam dao khyo joe" gyo" lo: ra". Israel byu qe qu" re- ai: bo" bao wa bam au: mae myi: nga" na: ru we' dakhyo: ngad: ra". Jham thaui: wa ai: bam re khyaug' ba geim" nghoe' to" ra". Nhad' ba ein: ba re- Asang wa ai: jham thaui: khug mae" Moshe re khai: ra".
18 Moshe wa jham thaui" yang nghoe' to" ra" bam dao khyo do, ye" lo" ra". Moshe wa aimae byid xe myi byid xe ba yena: jo; ra".