25
Gyang" Lho" Zaung Qhid' Mae" Alu: J
(Pht 35.4-9)
1 Asang wa Moshe re-
2 Ngo re Alu: jhaung qhu" qhaug' byid: genae" qhid' mae" Israel byu qere ta" wa,- byu dayaug yaug byid: nug: yang: byid' ra" pe" ja" alu: jhaung qhu" re ngadqere: khae: yu ge,-
3 Ai: alu: jhaung qhu" jham wa- qhang- ngaui we' gyid: bo"-
4 Gai: ra" jid: mo" pin- mhai: nyhug khyang- amo; nyhug khyang- ne sug' gug khyang ne cad' be, mug' yang qo; to" ra" mai bau:-
5 Mhaug' ane xug' to" ra" yao lo: qid- gai: ra" shoqid- qhoje; sag'-
6 Myikaug' xau- gyad byid' ra" xau qhid' mae" sheim jham- nae pyo" ra" xau jham-
7 Unug laug sin"- Khinjaung Yin" nho: bau: lo, kao: we' qao nghoe' mae shaung: te' nae" gatau: phug' de; ra" laug jham ngad ca" ra".
8 Ngo wa yao: bam: phaung mae qo" na shao:- mo,byu qe wa nga" qhid' mae" gyang" lho" Zaung kad' ca" ako".
9 Ai: zaung re ngo qhu" byid: nae" rure cao" yang: kad' mung: shaung byid: ca" ra".
Dao: Thang" Ban"
(Pht 37.1-9)
10 Qhoje; sag' yang qhang phyao: shid' daung" dathu- lu phyao: dadaung" dathu- myhao phyao: dadaung" dathu bo: ra" ban" dalam: kad' wa,.
11 Ai: ban" re akhug shad'- adao shad' mae qhang gyang" yang lham" pye' wa, lhang" gam: alhab' mae qhang bug kad' te' wa,.
12 Aire qhang lo, zaui: akheim" byid lam: kad' mung: dakhyug mae dalam: lam: mung: byid khyug geim" mae" akhyid mae te' wa,.
13 Qhoje; sag' yang dao nae" gyang: yao: jham kad' mung:- aijham re qhang: yang thab' pye' yang:-
14 Akhyug khyug mae" lo zaui: qhang kheim" mae jhoe" zaui to: nae" ngad: ra".
15 Ai: gyang: yao jham wa lo, zaui: qhang kheim" khug mae ke' to: ca" ra". Aire magai: yu: pye' ngad: ra".
16 Ai: thao ban" khug khyo tarha" zang jham tung" te' to" ra" ngo nao re byid' nae" ra" ai: laug pye: shid' pye: re ke' wa,-
17 Qhang phyao: shid' daung" dathu- lu phyao: dataung" dathu bo: ra" apyid' dalam: re qhang gyang" yang kad' wa,-
18 Kherubin shid' lam: re qhang: yang kad' mung:-
19 Apyid' athao dashad' mae dalam: to: wa,- ai: shid' lam: re apyid' asho: we' dasho: za: ngad sho' kad' wa,.
20 Ai: kherubin shid' lam: wa myo, nho jho" zhaung: mung: ai: shid' lam" nho: daung jham wa ai apyid' re nghoe' to: nae" ngad: ra".
21 Laug pye: shid' pye: re ai: ban" khug khyo ke' mung: adao mae apyid' yang nghoe' to: wa,.
22 Ngo wa nao re aitau mae li" qhug' nae"- apyid' au: tho' mae" kherubin shid' lam" agyo: mae na mung: Israel byu qe: qhid' mae" tarha" alhab' re ngo nao re byid: nae"- ga: ta" ra".
Mao"So Re Mug Qhaug' Byid' Ra" Saboe"
(Pht 37.10-16)
23 Qhoje; sag' sho" yang qhang phyao: shid' daung" lu phyao: dadaung"- myhao phyao: dadaung" dathu bo: ra" saboe" dalam: kad' wa,.
24 Aire qhang gyang" yang thab' yang: athao lhang" gam: qhang bug te' wa-
25 Aire gam: sho' lo,vo: da nghoe' anhad' ze yang: anhad' re qhang bug ke' yang: kad' wa,-
26 Aire lo, zaui: qhang kheim" byid kheim" kad' te' mung: khyid jham te' ra" jo, qo mae akhyug te' wa,.
27 Saboe" re vo, nae" gyang: yao: jhoe" zaui nae" lo, zaui: kheim" wa anhad' ze: ra" anhae mae te' wa,.
28 Gyang: yao: re qhoje; sag' yang kad' mung:- aire qhang: yang thab' wa,-
29 sabyi qhang: qhaug' byid' rumae ci nae" qhid' mae" ban- keim- ngoe"- khug' jham kad' wa,- aigu: alhab' re qhang gyang" yang kad' wa,-
30 Ai: saboe" re dao: thang" ban" qhid' au: mae to: qo: ra" saboe" dao mae gyang" lho" ra" mug khonhae" re: ngore qhaug' byid' to: qo: ra".
Myikaug' Tao"
(Pht 37.17-24)
31 Myikaug' tao" re qhang gyang" yang kad' wa,- apan re we' alo, re qhang: yang kad' wa,- aire bin: bu" bin: thaung jham bobo yang: shaung: te' to" ra" bin: jham wa asho: dazo" za: ngad qo: ra".
32 Dashad' mae sam kaung kaung te' mung:- khyaug' kaung te' nae" ngad: ra".
33 Ai: khyaug' kaung mae" kaung khao: ngo" mae akheim" jham we' abu" jham bo de; mung: shaung: te' to" ra" Almon bu" we' dau: ra" shaung: to" ra" bin: jham sam pau" pau" de, qo: ra".
34 Myikaug' tao" alo, wa- bin: thaung: jham we' bin: bu" jham bode; ra" Almon bin: bu" we' dau: ra" shaung: to" ra" bin: jham byid pau" pau" de; qo: ra".
35 Akaung sam zam" mae" zam" khao: ngo" nho: aqao: mae bin: thaung: dalam: lam: bo qo" ra".
36 Ai: bin: thaung: jham- akaung jham we' myikaug' tao" wa qhang gyang" daje, mae" za: kad' to" ru ngad: ca" ra".
37 Myikaug' tao" qhid' mae" myikaug' nhad' lam: kad' mung:- ai:jham wa qhid' au: khyo bao byid: geshao: te' to: wa,-
38 Ai: qhid' mae" nye,zai" jham re- ban the" jham re qhang gyang" yang kad' wa,-
39 Myikaug' tao" re we' ainho: zai jham alhab' re qhang gyang" shid' xe joe: ci yang kad' wa,-
40 Ngo nao re bam dao mae qhu" byid' ra" adai: ato' re cao" yang: aijham re lha" yang: kad' wa,.