23
Tarha" Din: Vang" Ru We' Gai Nyang: Ru
1 Madang: ra" lau dao: re dahau: wa- madangman" ra" khyo" sagse: kham byid: yang: qobo qo" yaug re dabao" dathaug' byid:-
2 Yao: bam shad' ra" khyo" kad' ko" au:- byu laug: ra" shad' khyo dabo cao" mangad: lao"- tarha" din: vang" ra" khyo re nghung" lo" nhao: ra" khyo" yao: bam sagse kham byid: ko" au:- byu laug: ra" shad' khyo dabocao"-
3 Myaung sho: yang re dao: kho' rumae yao" bo: dabode,-
4 Ni" nho: gyevo pho" nho: nung:- mangad: lao"- loze khyonghung: nghung" rure nao myao: ngad: re- yao: jhao" jhui" tug' lo byid: ca" ra".
5 Yao" nho: loze qo: yang nhai" to" rure nao myao: ngad: re- ai: loze re qo" to" ye; sho' bao" thaug' byid: wa,- aimae" dasu" lai: lo"-
6 Myaung sho: yaug tarha" yung" mae thug' li" ra" au:- ai: myaung sho: yaug qhid' mae" tarha" din: vang" ra" khyo re daha: pye'-
7 Majo: ra" khyo" qobo dazhaug'- qobo maqo" yaug re dase'- pe"mung:ga"re ngo wa airu" ra" makhyang" ra" mau" kad' yaug khag' re ngadqere: dao: phyid' nae".
8 Khug vag: re dakhae: yu- pe"mung:ga"re khug vag: wa byu re jo: ra" khyo mae myo, jid nhao mung: qobo maqo" ra" mo, re byo; qeim" lo" nhao: ra" khyo ngad: ra".
9 Taung bug byu re mangad mangung: dakad' taung bug byu ngad yaug khoru: kham zo: nae" khyo re naonhaung" ba: ako". Pe"mung:ga"re naonhaung" wa Egutu mung" mae taung bug byu qe ngad: lai: lo: ako".
Nhad' Zin: Ein: Zin We' Nhad' Ba: Ein: Ba
10 Khyaug' zin: geim" ni" nho: mug: myid mae qhovo: qho: mung:- aijham re yad: yu wa,-
11 Ngadqere: nhad' zin ein: zin re wa ai mug: myid re thang nhao wa,- ai: mug: myid mae yaug ja: pe" rere: dayad yu- myaung sho" ra" mo, wa ai: mug myid mae yaug ra" gu: re yad zo: vageshao:- seyo: gug'nyhug' jham wa tang" to" rure gai: zo" ako". Naonhaung" nho: sabyi khyae we' zhanlun shi: gae jham rere: ai we' dakhyo: za: kad' ge,.
12 Dalaban mae khyaug' ba mau" zaui: ge,. Ngadqere: naonhaung" jeim qe- naonhaung" qhid' mae" mau" zaui: byid' ra" taung bug byu qe we' naonhaung" gug'nyhug' jham lhao" re: qo" thang: na geshao:- nhad' ba ein: ba re wa mau" dazaui: ge,.
13 Naonhaung" re Asang ngo ta" to" ru ja: khao: ngo" re tae" gyo: ge,- gatau: so qere akyu" damho' ge,. Yao: bam: mang jham re lhao" re: data" ge,.
Poe Qi: Sam Lam:
(Pht 34.18-26; Mpm 16.1-17)
14 Ngo re nga: yhe' byid: nae" dazin re poe sam lam: kad' ge,.
15 Naonhaung" Egutu mung" mae" thug' lo: ra" lho" khye' ngad: ra" Abib lho" khye' mae- naonhaung" re ngo amyin" byid' to" ra" khyo" Man" make' Mug Poe re kad' ge,. Ce: poe nhad' ba gyo: mae man" ke' yang: kad' ra" mug dajhid' re: dazo: ge,- xeim: maci lo: ngore caung:pa" byid: nae" khonhae" re: dali" ge,.
16 Naonhaung" nho: gaug zo maui: lam jham re yad: qhid: ra" au:- gaug yad poe kad' ge,.
Naonhaung" nho: sabyi khyae jham mae" sabyi shi we' shi: khyae jham mae" shi: jham re phyo' zhang: yu: au:- xaung thug' so' mae Zaung Poe kad' ge,.
17 Zin khao: ngo" ce: poe sam lam mae naonhaung" yauggai qe alhab' wa naonhaung" Mao"So Asang ngore caung:pa" byid: nae" qhid' mae" ngojhao" li" ca" ako".
18 Naonhaung" wa gug'nyhug' xeim: re ngaui" byid' au:- man" ke' yang kad' to" ra" mug we' daga" daqhaug' byid: ge,- ce: poe gyo: mae ngore ngaui" byid' ra" gug'nyhug' xau re thao: ba ne, kao joe" sho' datang" to: ge,-
19 Zin khao: ngo" nao yad: yu: ra" sao qhid' mhang" ra" gaug zo maui: lam re ni" nho: Mao"So Asang: yham khyo ciye: byid: wa,-
Yao nau" mangad: lao"- cad' be, nau" re yao: myhi" nho: nug' we' dabokyug'-
Dao:so: Jham We' Mho" Shid' Dao: Jham
20 Nao gyaung: su" au: nao re gug' gam byid: mung:- ngo nyhang" jaung: to" ra" jo, qo khyo nao re jhui" ye: nae" qhid' mae" ni" qhid' au: mae mug: lagyo: dayaug re ngo nhao: ke' nae".
21 Yao" dao: re gelho: tae" gyo: mung: phug' cao" wa,- yao: re gye kad' yang geim lau dakad'- pe"mung:ga"re yao: re ngoyang nhao: to" ru ngad: ruyang yao: wa airu" ra" geim lau kad' rure qobo khyad' byid: nae" mangad:-
22 Ngadqere: nao wa yao" nho dao: re tae" gyo: mung:- ngo amyin" byid' to" ra" gu: ja: khao: ngo" re kad' ngad: re wa ngo wa ni" nho: gyevo qe alhab' re gye kad' yang: gye bokhe' byid: nae".
23 Nga" mug: lagyo: wa ni" qhid' au: khyo ye" lo" mung:- nao re Amori- Hiti- Perizi- Khanan- Hivi- Yebusi- byu qe: mug: khyo jhui" ye" li" nae". Ngo wa yao: bam re phyo' qheim" pye' nae".
24 Yao: bam: so jham re dagoe; pa" mangad: lao"- dacaung:pa" byid:- yao: bam nho: caung:pa" thung" we' sin" ra" lo, mau" jham re dacao" kad'- yao: bam: so jham re phyo' qheim" pye' mung: yao: bam nho: gyang" lho" ra" laug zang baung: jham re adau dau kad' pye' ge,.
25 Naonhaung" Mao"So Asang ngore naonhaung" caung:pa" ko" ngad: re- ngo wa naonhaung" re zo:ve we' qid shaman" byid: mung: naonhaung" no phyo: alhab' re yu: pye' byid: nae".
26 Naonhaung" mung"dan: mae myiqe: dayaug re: zo: mavin: shoe' khyo" nae"- mangad: lao" zo: dau maqo" ru mana nae". Ngo wa naonhaung" re kao qhang nhao nae".
27 Naonhaung" re gye kad' ra" byumyu" re ngore gyaug nhao nae". Ngo wa naonhaung" gye kad' yang: lhe" ra" byumyu" qe: phaung mae atug' akhyug boe" nhao nae". Amung: ngo wa naonhaung" gyevo qe alhab' re nhaung thao" phaug' nhao mung:- naonhaung" mae" phao: lo" nhao nae".
28 Ngo wa naonhaung" gyevo qere byodin byosho: khyo pye' zaui: pye' nae". Naonhaung" qhid' khyo ce" ye" lo" au:- ngo wa Hivi byu- Khanan byu- Hiti byu qere aimae" khe' thug' ke' nae".
29 Ngo wa yao: bam re dazin khug mae za: khe' thug' ke' nae" mangad:- ngo airu: kad' re mung"dan: wa cae: jhug tag boe" lo" mung: naonhaung" qhid' mae" seyo: gug'nyhug' lhe: jham saung" laug: li" nae".
30 Ai: atha"- ai: mug: myid re naonhaung" ga" laug: nho" qo" sang: yu gesho' ngo wa yao: bam re zo" zo" mae" khe' thug' pye' nae".
31 Naonhaung" mung"dan: mug: kyo: re- Tham: Ne mae"- Mug:gaung: panglai: joe" sho'- din"pyad' yo mae" Uphrad gyaung: joe" sho' ce: byid: nae". Aimung" mae na: ra" byu qe: dao mae aung: pye' ra" qam so' ngo naonhaung" re byid: nae" naonhaung" jhin" ye" lo" au:- naonhaung" wa yao: bam re khe' thug' pye' li" genae".
32 Naonhaung" wa yao: bam we' mangad: lao"- yao: bam nho: so jham we' myid vang" khyo dato: ge,.
33 Naonhaung" mung"dan: mae ai: byumyu" qere dana nhao ge,- naonhaung" airu: na nhao ko" ngad: re- yao: bam wa naonhaung" re ngore shad' ra" qobo kad' nhao li" genae". Yao: bam so jham re naonhaung" caung:pa" ko" re airu wa naonhaung" qhid' mae" myi" shid nae" lha" ngad: li" nae".