22
Khyug' Byid' Ra" Khyo We' Sin" Ra" Tarha"
1 Byu dayaug wa nung:- mangad: lao"- yao- dadau: dau: re khug' mung: aire se' pye' mangad: lao" aung" pye' ngad: re wa- yao: wa nung: dadau" qhid' mae" nung: ngo" dau:- yao dadau" qhid' mae" yao byid dau: khyug' ca" ra".
2-4 Yao: wa yao: khug' ra" ja: khyug' ca" ra". Yao: pe" maqo" re wa yao: khug' ra" jhin re khyug' nae" qhid' mae" jeim khyo" yao: re aung" pye' ca" ra". Yao: khug' to" ra" gug'nyhug' nung:- mangad: lao" loze- mangad: lao" yao- ngad ngad yao" lo, mae adaui yeqho: myao: ngad: re yao: wa da dau" qhid' mae" shid' dau: khyug' ca" ra".
Khug' hab' wa myi" re yham khug khyo cad' vao ye: mung: se' pye' qhug' ngad: re- yao: re se' ra" yaug wa byu se' qobo maqo" ngad: ra". Ngadqere: airu: na" gaung mae boe" ngad: re wa yao: wa byu se' qobo qo" ra".
5 Byu dayaug wa yao" gug'nyhug' jham re yothaung:- mangad: lao"- sabyi khyae re zo: nhao mung: ai: gug'nyhug' jham wa du" lae" lo" mung: gatau dayaug: nho: yothaung: mae yaug: jo; ra" qhovo: jham re zo" pye' byid' re- yao: wa yao" yothaung: jham mae"- mangad: lao"- yao" sabyi khyae jham mae ai: qeim: byaug: ra" qhovo: qhid' mae" khyug' byid: ca" ra".
6 Byu dayaug wa yao" yo mae myi: ngha" mung:- myo, zau: jham khyo" gatau dayaug: nho: yo khyo de; je" lo" mung:- yaug: jo; ru- mangad: lao" yad: bam: to" ra" gaug shi: jham nga" lo" byaug: ngad: re ai: myi: ngha" qhid: ke' ra" yaug wa ai: nga" pye' ra" qhid' mae" khyug' qo: ra".
7 Byu dayaug wa gatau dayaug nho: ngaui- mangad: lao"- gatau phug' de; ra" ja: re zam" to: byid: nae" myid vang" mung: zam" to" au: aijham re yao" yham mae" khug' pye' qhug' mung:- khug' hab' re the' taung" ngad: re- ai: khug' hab' wa shid' nho" dam: khyug' byid: ca" ra".
8 Ngadqere: khug' hab' mathe' taung: ngad re wa- ai: phug' de; ra" zai jham re zam" ra" yaug re wa caung:pa" ra" jo, qo khyo jhui" lo mung:- su gatau: nho: jo,nho" re yao: makhug' ra" khyo- jham tang: ca" ra".
9 Nung:- loze- yao- mai bau:- byaug: seim" lo" ra" ja: jo,nho" pe" ja" khyo we' sin: yang: ngad ngad jho" ta" ngag: byo; rumae byu shid' yaug yao: yao" ngad: ga: jho" ta" ngag: na ko" ra" jo,nho" re caung:pa" jo, qo khyo cili" ca" ra". Asang: yang qobo qo" ra" ga: ta" thug' ra" yaug wa gayaug re shid' nho" khyug' ca" ra".
10 Byu dayaug wa gatau dayaug: nho: loze- mangad: lao"- nung: mangad: lao"- yao- mangad:lao"- gatau: gug'nyhug' re zam" to: byid: nae" myid vang" mung: aire yao: zam" to" au:- ai: gug'nyhug' wa shid: byaug mangad: lao"- dae de; ru- mangad: lao" su: yang lhad' lo" byaug mung:- sagse: mana ngad: re wa-
11 Ai: yaug wa caung:pa" jo, qo khyo ye: mung:- yao: wa aiyaug: nho: gug'nyhug' re makhug' ra" khyo jham yetang: ca" ra". Ai: gug'nyhug' wa khug' ru mangad: re wa gug'nyhug' sang wa seim" lo" byaug: rure khae: yu ca" ra". Yao: re khyug' maqo ngad: ra".
12 Ngadqere: ai: gug'nyhug' re khug' ngad: re aiyaug wa gug'nyhug' sang re khyug' ca" ra".
13 Ai: gug'nyhug' wa seyo: gug'nyhug' lhe: jham: yang bin" se' pye' ru ngad: re aiyaug wa sagse: khyo" dang: ra" gug'nyhug' mao re cilo ca" ra". Yao: wa seyo: gug'nyhug' lhe: jham: yang bin" se' ra" gug'nyhug' qhid' mae" khyug' maca" ngad: ra".
14 Byu dayaug wa gatau dayaug: nho: gug'nyhug' re ngho: mung: gug'nyhug' sang mana: rumae dae de; mangad: lao"- shid: byaug: ngad: re ngho" ra" yaug wa ai: qhid' mae" khyug' ca" ra".
15 Ngadqere: airu: boe" au: gug'nyhug' sang na: ngad: re wa- khyug' maca" ngad: ra". Ngho" to" ru ngad: re wa ngho: phug' byid: yang: ai: re gai: nghoe' pye' ra".
Ave, Akyang We' caung:pa" Tarha" Jham
16 Byu dayaug wa su: yang mamho' to" ra" zomyi: gyang" dayaug re ju" phyo' ngad: re- yao: wa phug' ke' mung: aiyaug re lo, xo' xo' yu ca" ra".
17 Ngadqere: yao: pho" wa lo,xo' xo' yu nae" ai: yauggai re ha: pye' ngad: re- aiyaug wa zomyi: gyang" qhid' mae" phug' ke' ra" ngaui we' dau: ra" ngaui re yao: pho" re byid: ca" ra".
18 Man: dan: vha" ra" mau" kad' ra" myiqe: khag' ngadqere: se' pye' ru qhug' ca" ra".
19 Gug'nyhug' we' gaung sho: jho" zam" ra" yauggai wa se' pye' ru qhug' ca" ra".
20 Asang ngo mae" jeyang:- so gatau daja: ja: re xeim: ngaui" byid' ra" yaug khag' ngadqere: shid nae" dao: phyid' ru qhug' ca" ra".
21 Taung bug byu qere mangad mangung: dakad' mangad: lao"- dadeim" zag zo: wa,- Egutu mung" mae naonhaung" taung bug qe ngad: lo: rure myid: beim: ge,.
22 Cug' mo" mangad: lao"- cug' zo: qere mangad mangung: dakad' ge,.
23 Naonhaung" airu kad' gelao"- Asang ngo wa yao: bam ngore bao" thaug' nae" mho' yao gelao"- yao: bam re tau: byid: nae".
24 Ngo wa nhag' yo" li" mung:- naonhaung" re gyekhe' poe mae se' pye' nae". Naonhaung" yham sang myhi" qe wa cug' mo" boe" mung:- naonhaung" zoshao qe wa yao: pho" maqo" ra" cug' zo: boe" li" genae".
25 Naonhaung" wa myaung: ra" nga" byu qemae" dayaug yaug re ngaui jhid' byid: yang: ngad: re- ngaui gau pai: jhid' zo: mo, we' dakhyo:- dakad' ge,- gau pai: damho' wa,-
26 Nao wa byu dayaug yaug: nho: bau: qhang re tang: ra" zai khyo" yu: to" ngad: re- ba mavao shire nao wa yao: re airu dam: tug' byid: ca" ra".
27 Pe"mung:ga"re yao: yao" gaug re lam sho' ve, nae" ru ai dakhye' za: qo" ra". Yao: wa gatau pe" ve, yang qo" yab nae" i? Yao: ngore bao" thaug' nae" mho' yao lao"- ngo wa nhag' khyag' shagu: ruyang yao: re ngo tau: byid: nae".
28 Mao"So re magai: ra" dao: data" wa,- naonhaung" byumyu" qenho: au: jhaung qere danhang: wa,.
29 Ni" gaug zo- ni" sabyi qang:- ni" zhanlun xau jham mae" ayo, joe" lao"- ngore xeim: ngaui" byid: la,-
Ni" nho: zoqhid' yauggai zo: re ngore byid: la,.
30 Sao qhid' xao" ra" ni" nung we' yao ngore byid: la,- zoqhid' sao qhid' khau: ra" gug'nyhug' lo: re- yao: myhi" we' nhad' ba na nhao mung:- she' ba ein: ba mae aire ngore qhaug' byid: la,-
31 Naonhaung" wa nga" byumyu" ngad mung: seyo: gug'nyhug' lhe" yang bin" se' ra" gug'nyhug' pe" ja" sho: rere: naonhaung" magai: zo: genae". Ai: atha"- aire lakha: jham re byid: zho: ge,.