5
Kho:kham Pho" We' Haman Re Estha Zo: Shaug' Poe Khai: Ru
1 Zo: shaug' jao" ru sam ba ein: ba re Estha wa kho:kham myhi" mai bau: shaung: ve, pye' mung: kho:kham zaung tao" jo; ra" qe, we' vang" vang" kho:kham vang" khug mae ye: ye; jo; ra". Kho:kham pho" wa- vao kham: we' vang" vang" qe, khug mae" kho:kham zaung tao" mae zaung: jo; ra".
2 Taung gaung mae kho:kham myhi" Estha ye; jo; rure kho:kham the' myao lao"- kho:kham qu" ngaui mung: kho:kham qhang zaung: bao" re Estha jhao" yheim" ke' ra". Estha wa vao ye: mung: ai: qhang zaung: bao" au: re yetin" ra".
3 Kho:kham pho" wa- kho:kham myhi" Estha we"- pe" si bo: ra" i? Nao o: ru ngore ta" kyo: la, aire- nga'' khosin" mung"dan: agaung: kho' ngadqere: nao qo" yu nae"- ga: myid' ra".
4 Estha wa- Asang kho:kham ngaui: ngad: re- asang nao we' Haman re ana" myi ni" shid' yaug: qhid' mae" nyhang" nae" ra" zo: shaug' poe khyo khai nug: ra"- ga: tau" ra".
5 Ailao" kho:kham pho" wa Estha nho: bang" vo kad' nae" Haman re phyad phyad li" nae" qhid' mae" amyin" khyo" khai: ke' ra". Aimung: kho:kham pho" we' Haman wa Estha nho: zo: shaug' poe khyo ye" ako".
6 Kho:kham pho" wa yhid shaug' na: au: re- nao o: ru ngore ta" kyo: la,- aire nao qo" yu nae" nga" khosin" mung"dan: agaung: dano" nao mho' ngadqere: nao re ngo byid: nae"- ga: ta" ra".
7-8 Estha wa- asang kho:kham nao yang nga" mho' thoe re gyo: byid: nae" ngad: re- nao we' Haman qhid' mae" ngo dam: nyhang" nae" zo: shaug' poe gatau dalam: mae ne, mo" ba nga" bang" vo li" kad' nhao nug:- ai: au: re ngo o: ru nao re ta" kyo: nae"- ga: tau" ra".
Haman wa Modekhai Re Se' Pye' Nae" Pha,jhi" Khyug' ru
9 Haman wa zo: shaug' poe mae" phao: lo" re ngaui bau: mung: myid pyo" na: ra". Ngadqere: ai: thao yao: wa kho:kham vang" kham: mae Modekhai re the' myao mung: Modekhai wa yao: su" lai: lo" re phug' myao" ru qhu" byid' ra" khyo" mato" ye, lao"- Haman wa yao: re nhag' jam: yo" ra".
10 Ngadqere: yao: wa yao" nhag' lam: re zang" pye' mung: yham khyo phao: lo" ra". Ai: thao yao: wa yao" ba nam byin cao: qere yao" yham khyo khai: zhang: mung: yao" yham sang myhi" Zare rere: bobo nhao: ra".
11 Yao: wa yao: jo,nho" khonho" qo" ru yauggai zo: khonho" yaug qo" ru- Kho:kham pho" yang yao: re myhao: ra" jo, qo mae khoru: san: to" ru we' kho:kham pho" nho: zug: ade, gaje qe tho' khonho" je: akhyag: rure yao: bam: qhid' kheim: mae phug: kyo" ra".
12 Haman xo' ta" ru wa- Ai: tho' mago" Estha kho:kham myhi" wa kho:kham pho" we' ngore za: zo: shaug' poe da" byid: mung: ne, mo" ba re: dam: li" ge,- ga: khai: to" ra".
13 Ngadqere: ai: Yuda byu Modekhai dayaug kho:kham nho: vang" kham: mae zaung: jo, rure ngo amyao: myao: na wa- ceru nga" qhid' mae" pe" lajheim: mabo- ga: ta" ra".
14 Aimung: yao" yham sang myhi" we' yao" ba nam byin cao: qe alhab' mo, wa- ngo" xe daung" myhao: ra" byu cui" lao" se' ra" ginbyae dalam: zhaug' wa,- ne, mo" ba Modekhai re ai: byuse' ginbyae mae cui" se' pye' nae" qhid' mae" kho:kham pho" re nao gai: qo" mho' ra". Ai: thao zo: shaug' poe khyo pyo: pyo: za: nao gai: ye: nae" ngad: ra" ga: pha,jhi" ceim" byid' ako". Haman wa ceru re gai: ra" akhyo: ngad: ga: qhug' myid mung: byuse' ginbyae: dalam: zaug' to: nhao: ra".