4
Estha Yang Bao" Thaug' Yu Nae" Qhid' Mae" Modekhai Mho' Ru
1 Boe" lo va" khyo alhab' re Modekhai ba: yu lao" yao: wa myid myo: sang: kho" ru we' yao" mai bau: lao" cad' pye' ra". Ai: thao yao: wa jid: mo" mai bau: ve,- au: mae re: myimhab gag: sheim" ci mung: kho:kham vang" kham mo" joe" sho' vogaung: mo" khug mae gyi: ngug: hug' qin" ra".
2 Jid: mo" mai bau: ve, mo, khag' rere: vang" khug khyo mavao nhao: rumung: yao: wa mavao ye: ngad: ra".
3 Kho:kham pho" nho: amyin" lau dao: hau" kyo" ke' ra" mung" dau alhab' mae Yuda byumyu" qe thoe qi: ke' mung: kaug' gyi: ngug: ako". Yao: bam zo:ve jao" mung: kaug' ngug: ru we' ngug yao" yao" na: ako". Yao: bam mae" myo: phyao: wa jid: mo" mai bau: ve, mung: myiqe, bam mae lang" jo; ako".
4 Modekhai kad' na: rure Estha nho: daui daui myiqe: nau" qe we' unug qeyang Estha re ta" kyo: gelao"- yao: gyai myid myo" byaug: ra". Yao: wa Modekhai re jid: mo" mai bau: atha" ve, nae" mai bau: jham re vhin byid: ngadqere: Modekhai wa ai: mai bau: jham re malham: khae: yu ngad: ra".
5 Ailao" yao: wa- kho:kham pho" yang yao" daui daui lagyo: khyo" san: to: byid' ra" unug dayaug ngad: ra" Hathag re khai: yu mung:- pe" boe" na: ru we' pe"mung: boe" na: ru yemyid' qho: qu" nae" qhid' mae" Modekhai jhao" nhao: ke' ra".
6 Hathag wa- kho:kham vang" kham: mae" vogaung: mo" shava jao: mae na: na: ra" Modekhai jhao" ye" ra".
7 Modekhai wa yao: mae boe" lo: ru ja: khao: ngo" we' Yuda byumyu" alhab' re qo" se' pye' lao" kho:kham nho: ngaui ban: khyo ngaui khonho" qho: ke' nae" ga: Haman dao:so: byid' to" ru yao: re ta" shid' ra".
8 Yao: wa Yuda byumyu" qere phyo' qheim" pye' nae" qhid' mae" Susa vomo" mae hau" pyo: to" ra" amyin" lau dao: mugsug' aso: dakhye' re Hathag lo, mae byid' ke' ra". Modekhai wa- airu Estha jhao" vin: lo" mung: boe" na: ra" mau" re sho' kyo: yang: yao: yao" byumyu" dao mae kho:kham pho" yang nhag' khyag' byid: nae" qhid' mae" yevao: mho' vashao: ga: Hathag re ta" nhao: ke' ra".
9 Hathag wa airu re khyag' kad' ra".
10 Aimung: Estha wa Modekhai jhao" dam: vin: tug' lo" nae" ce: lau dao: yao: re pyang: ke' ra".
11 Yauggai dayaug yaug mangad: lao" myiqe: dayaug yaug qe kho:kham pho" yang makhai: ru yao" qhid' kheim: khyo vao ye" re shid ca" ra". Ceru wa tarha" ngad:- kho:kham pho" nho: pha,jhi" byid: mo, mae" mung" dau mae na: ra" byu yaug khao: ngo" aire ba: ako". Ce: tarha" re gai: jao" nae" khyo dagau: za: ajo;- kho:kham pho" yang dayaug yaug re yao" qhang zaung: bao" yheim: byid' ngad: re- aiyaug: nho: kao so' qo" loe; ra". Ngadqere: kho:kham pho" yang ngore makhai: ru lho" dakhye' kyo: byaug va".
12 Estha mae" lau dao: re Modekhai the' yu lao"-
13 Yao: wa Estha re ceru: ga" ra" ta" peim: dao: pyang: ke' ra"- kho:kham kho" mae nao qo" na mung: Yuda byu gaje tho' nao je: gug: gam nae" ein: dajho-
14 Ceru" ayo, mae nao sae za: tae" jo; re- Yuda qere bao" yu: ru mug:gaung mae" joe" li" mung:- yao: bam wa gug: gam qo" yu: li" genae"- ngadqere: nao shid: li" nae". Ni" pho" nho: yham khaung ug' khug' byu qe na: thao" byaug: li" genae". Ngad sho' qere:- ceru" ayo, qhid' mae" nao kho:kham myhi" boe" lo: ru ngad: laug khag' ba: ta" i? ga: ta" ra".
15 Estha wa Modekhai re ce: dao: phyid' dam: pyang: ke' ra".
16 Susa vomo" mae" Yuda byu alhab' re yekhai: zhang: to: wa,- zo: shaug' jao" mung: nga" qhid' mae" akyu" mho' bao" byid: gela,- sam myi sam ba: geim" pe" re: dazo: ge,- Pe" re: dashaug' ge,- nga" daui daui myiqe: nau" qe we' ngore: airu: kad' bam nae". Ai: thao tarha" re ngag: thaug' ru boe" sho' ngadqere: kho:kham pho" jhao" ngo ye: nae". Ce: mathao mae ngo shid ca" yang: ngad: re ngo shid kham nae"- ga: ta" ra".
17 Ailao" Modekhai wa to" mung: yao: re Estha kad' nhao: ru ja: khao: ngo" re kad' ra".