6
Kho:kham Yang Modekhai Re Nga: Yhe' Ru
1 Ai: myi yao: mae kho:kham pho" maqo" yab mung:- ai: khosin" mung" nho: yung" tung" xam: jham cili" mung: yao: re nghe' kyo: nae" qhid' mae" amyin" byid' ra".
2 Yao: bam nghe' ra" dau mae- kho:kham pho" re khug' se' pye' nae" qhid' mae"- kho:kham kug qe, jham re zam: byid' ra" unug shid' zo: ngad ko" ra" Bigthana we' Tere khug' nyan" rure Modekhai yang the' pug: myao byid' ra" khyo bobo: ra".
3 Kho:kham pho" wa- Ceru qhid' mae" Modekhai re ngonhaung" khoru: nga: yhe' mung: aphug' jhaung qhu" byid' bam va" i? ga: myid' ra".
Yao" daui daui lagyo: qe wa- yao" qhid' mae" pe" makad' byid: shi:- ga: tau" ako".
4 Kho:kham pho" wa- nga" zug: ade, qe dayaug yaug kho:kham kho" mae na ko" i? ga: myid' ra". Ai: au: re shi" Haman wa kho:kham vang" khyo vao li" ra". Yao: wa jin" jin" kad' to: va" byuse' ginbyae: mae Modekhai re cui" lao" se' pye' nae" qhid' mae" kho:kham pho" re akhang" mho' nae" ga: joe" li" ru ngad: ra".
5 Aimung: daui daui lagyo: qe wa- cemae nao re qhug' nug yang: Haman lao" na: ra" ga: tau" ako".
Kho:kham pho" wa- yao: re jhui" vao li" ge,- ga: ta" ra".
6 Aimung: Haman vao lo lao" kho:kham pho" wa yao: re- ngo gyai nga: yhe' byid: nug: ra" byu dayaug na:- ceyaug qhid' mae" ngo khoru: kad' re gai nae" i? ga: lham: myid' ra". Haman wa yao: yao" gaung re ceru: myid: yu: ra". Ana" kho:kham pho" yang aiqhi" nga: yhe' byid: nug: ra" yaug wa khag' ba: ngad nae" i? Ngo yao: ngad: naeva"- ga" myid: yu: ra".
7-8 Aimung:- yao: wa kho:kham pho" re- ceyaug: qhid' mae" nao yao: ve; ra" kho:kham bau: qhang yu: li" byid: nae" amyin" khyo" ke' wa,- nao yao" myao: dao mae kho:kham shaung zai re nhae" byid: nae" amyin" khyo" wa,-
9 Ai: thao- aiyaug re ce: mai bau: vhe' byid: mung: khyo qhid' shae nae" qhid' mae" ni" nho: myhao: thao" zug: ade, dayaug re nhao wa,- aiyaug re myao: dao mae zhaung mung: vomo" mae" shava jao: khyo" jhui" lo" nhao wa,. Yao: shid' zo: ye" lo" au: zug: ade, wa- Ceru: ta" hau: vashao: kho:kham pho" yang nga: yhe' byid: nug: yaug re khoru: aphug' jhaung qhu" byid' ru qu" ge, lhe"- ga: ta" vashao:- ga: ta" ra".
10 Ailao" kho:kham pho" wa Haman re- Bau: qhang we' myao: re phyad lo" yu mung: Yuda byu Modekhai re ce: nga: yhe' byid' ra" mau" alhab' nyhang" jaung byid: se,- nao pha,jhi" byid' ru ja: khao: ngo" yao" qhid' mae" kad' byid: wa,- kho:kham kho" vang" kham: mae yao: zaung: jo; rure nao the' myao nae"- ga: ta" ra".
11 Aimung: Haman wa bau: qhang we' myao: re yu yang: Modekhai re bau: qhang vhe' byid' ra". Modekhai wa myao: dao mae do; zaung mung: Haman wa yao: re vomo" mae" shava jao: khyo" jhui" au: she: lo" zo" re- kho:kham pho" yang nga: yhe' byid: nug: ra" yaug re khoru: aphug' jhaung qhu" byid' rure qu" ge, lhe"- ga: hau" ta" ra".
12 Ai: thao Modekhai wa kho:kham vang" kham: khyo dam: tug' lo" mung: Haman wa qho' ru we' myo, khung: re nghoe' ci yang: yham phao: lo" ra".
13 Yao: wa- yao: mae boe" lai: lo: ru alhab'- yao" yham sang myhi" we' yao" ba nam byin cao: bam re lo" ta" kyo" ra". Ailao" yao" yham sang myhi" we' ai: pha,jhi" bo: ra" yao" ba nam byin cao: qe wa yao: re- nao wa Modekhai re kheim: so' seim" pye' lo" na: ava". Yao: wa Yuda byu dayaug ngad mung:- yao: re nao maqo" aung: pye' nae". Yao: wa nao re dang za: aung: pye' li" nae"- ga: ceim" ta" ako".
Haman Se' Pye' Qhug' Ra" Khyo
14 Yao: bam jho" jhau: na shi" au: kho:kham kho" mae" unug wa hin hin joe" li" mung: Haman re zo: shaug' poe khyo jhui" ye" ra".