3
Yuda Byu Qere Phyo' Pye' Nae" Mau" Re Haman Khug' Nyan" Ru
1 Ai: thao dayo, kyo: re kho:kham Ahasuru wa Haman ga: mang: ra" byu dayaug re mang: zug: jhaung mau" mae khyin: san: to" ra". Haman wa- Agag nho: myid:zo: dayaug ngad: ra" Hamedatha nho: yauggai zo: ngad: ra".
2 Kho:kham pho" wa- yao" mau" vin: ra" zug: ade, qe alhab' yang Haman nho: qhid' kheim: mae pad' thaug' thaug' mung: goe; pa" ra" khyo" Haman re phug' myao" ru ceim" qhu" byid: nae" qhid' mae" zug: ade, qere amyin" dalam: byid' to" ra". Ai: amyin" re yao: bam alhab' mo, cao" ako". Airu re macao" kad' lo: ngag: ha: pye' yaug wa- Modekhai dayaug za: angad: ra".
3 Yao: pe"mung: kho:kham nho: amyin" dao: re macao" rure kho:kham mau" vin: ra" zug: ade, gaje: yang myid' ako".
4 Daba: thao daba yao: bam wa yao: re kho:kham amyin" cao" nae" qhid' mae" jhan: gengadqere: yao: wa yao: bam ta" rure matae" gyo: byid: ngad: ra". Yao: wa- Ngo Yuda byu dayaug ngad:- Haman re maqo" goe; pa"- ga: ta" ra". Aimung: yao: bam wa Modekhai nho: ave, re Haman sae za: qo" qu" to: nae" laug ga: ba nug gemung: Haman re ta" shid' ako".
5 Haman wa yao: re Modekhai pad' thaug' thaug' mung: magoe; pa" rure the' gyo: lao" nhag' jam: yo" ra". Aimung:-
6 Modekhai wa Yuda byumyu" ngad: ga" rure ba: yu lao" Modekhai re za: qobo dae byid: nae" tho' je: xo: ru kad' nae" ga: myid: phyid' ra". Yao: wa Persia mung"dan: geim" mae na: ra" Yuda byumyu" yaug khao: ngo" re se' pye' nae" mau" zo" myid: yaung: to" ra".
7 Kho:kham Ahasuru eib: ra" daxe: shid' zin ein: zin- zin sag' khye' Nisan lho" khye' mae- Haman wa yao: myid: yaung: to" ra" mau" zo" re zaui" qhid nae" ba na re (Purim ga: yao: bam mhang" ra") Pha" ce' khyo" mung: qho: qu" ra". Lho" daxe: shid' khye' ein: khye' Ada: lho" xin: daxe: sam ba: ba re khyin: phyid' ra".
8 Aimung: Haman wa Kho:kham pho" re- ni" mung"dan: geim" mae byu damyu" mung"dan: khao: ngo" mae na: myi" lae" bam: ru qhug' myao:- yao: bam wa gaje khag' we' re: madau: ra" thung" li re cao" ako". Aitho' mago" yao: bam wa khosin" mung"dan: tarha" re macao" ngad: ako". Aimung: yao: bam re airu: zang: kham byid: nae" nao mataung" gai: myid naemyao:-
9 Asang kho:kham nao khyo" yang khyao za: myid: ngaui: ngad: re yao: bam re se' pye' nae" amyin" khyo" wa,- nao amyin" khyo" ngad: re mung"dan: eib: ra" mau" mae ci nae" kho:kham ngaui ban" khyo ngaui 375 tan re ngo khyag' ke' byid: nae" qo" kham: yu:- ga: ta" ra".
10 Kho:kham pho" wa- lau dao: pyo: rumae dazid khyo" mung: tarha" ci: ra" yao" lo,pin: re khyad' yu mung:- Agag nho: myid:zo: ngad: ra" Hamedatha nho: yauggai zo: Yuda byumyu" qenho: gyevo Haman re byid' ra".
11 Kho:kham pho" wa- ai: byumyu" qe we' yao: bam: ngaui wa ni" mae" ngad: ra". Yao: bam re nao o: khyo: kad' pye' wa,- ga: ta" ra".
12 Aimung: zin sag' khye' lho" xin: daxe: sam ba: ba re Haman wa kho:kham nho: mau" sang qere khai mung:- lau pyo mugsug' dakhye' re mung"dan: mae ci: ra" myan" khao: ngo" we' mugsug' tung" ce' khao: ngo" khyo" phaug' yang: zug: ade, mung" zug: au: jhaung alhab' jhao" vhin: pyo: ke' nae" amyin" khyo" ra". Ai: amyin" lau dao: re kho:kham Ahasuru nho: mang khyo" tung" pyo mung: yao" lo,pin: dazid thaung" te' ra".
13 Khyid mye, lagyo: qe wa ai: lau dao: re mung"dan: mae" mung" dau khao: ngo" khyo vin: dai" joe" byid' ako". Ai: amyin" lau dao: mae- Yuda byumyu" angai aqi: myiqe: zoshao alhab' re Ada lho" xin: daxe: sam ba ein: ba daba mae za: se' pye' nae" pyang dao: bo: ra". Yao: bam re nhag' makhyag' lo: sho' se' pye' mung: yao: bam: jo,nho" jham rere: qo" sham" yu: pye' genae"- ngad: ra".
14 Ai: ba na joe" li" re yaug khao: ngo" wa jin" jin" qo" seim" ci genae" qhid' mae"- ai: amyin" lau dao: mae bo: ra" khyo jham re mung"dan: khao: ngo" mae" vobyu qere ba: to: nhao nae" khyo" ngad: ra".
15 Kho:kham nho: amyin" dao: khyo" yang ai: amyin" re Susa vogaung: mo" mae" vobyu qere ba nhao mung:- khyid mye, lagyo: qeyang ai: lau dao: re mung"dan: jham khyo vin: joe" ye: byid' ako". Susa vogaung: mo" lhau: shug: ke' ra" au: re kho:kham pho" we' Haman daga" zaung mung: yhid shaug' na: ako".