8
Pyaung" Nha: To" Ru Mae" Dam: Tug' Lo Mo,
1 Ceru wa Babelon mae pyaung" nha: to" rumae" Artazaze khosin" kad' na: ra" ayo, mae Ezra we' daga" Yerusalem khyo dam: tug' lo: ra" byumyu" kaung jham: nho: au: jhaung: qe: japhin: ngad: ra".
2-14 Ai jham wa Phineha kaung mae" Gershom- Ithama kaung mae" Daniela-
Davi kaung mae" Shekania nho: yauggai zo: Hatu-
Paro kaung mae" Zekharia we' yao" kaung mae" yauggai 150 yaug (Yao: bam: phug' phyid' byuxag' tung" xam: jo; ako".)
Pahad Moba kaung mae" Zerahia nho: yauggai zo: Eliehoenai we' yauggai 200 yaug-
Zatu kaung mae" Yahazie nho: yao: zo: Shekhania we' yauggai 300 yaug-
Adin kaung mae" Yonathan nho: yauggai zo: Ebed we' yauggai 50 yaug-
Elam kaung mae" Athalia nho: yauggai zo: Yeshaia we' yauggai 70 yaug-
Shephatia kaung mae" Mikhae nho: yauggai zo: Zebadia we' yauggai 80 yaug-
Yoab kaung mae" Yehie nho: yauggai zo: Obadia we' yauggai 218 yaug-
Bani kaung mae" Yosiphia nho: yauggai zo: Shelomid we' yauggai 160 yaug-
Bebai kaung mae" Bebai nho: yauggai zo: Zekharia we' yauggai 28 yaug-
Azgad kaung mae" Hakatan nho: yauggai zo: Yohanan we' yauggai 110 yaug-
Adonikam kaung mae" Elipheled Yeue we' Shammaia we' yauggai 60 yaug- (Yao: bam wa thao mae cao" phao: lo: ako".)
Bigvai kaung mae" Uthai we' Zaku we' yauggai 70 yaug- ngad: ako".
Ezra Yang Levi Qe: Qhid' Mae" Caung:pa" Yham Qho Byid' Ru
15 Ngo wa- daphung: geim" re- Ahava vogaung: khyo yug: vao lo" ra" qid khyo: nhae mae khai: ham: to: mung:- ngonhaung" ai: jo, qo mae sam ba lam: lam: Jamu kad' na: bam va"- aimae khinjaung qe za: na mung: Levi qe mabo: ru ngo qhug' myao:-
16 Ngo wa au: jhaung qemae" gug yaug re nhao: ke'- Elieze- Ariela- Shemaia- Elnathan- Yarib- Elnathan- Nathan- Zekharia we' Meshulam we' mho" pho" shid' yaug ngad ko" ra" Yoiarib we' Elnathan re nhao: ke' va".
17 Ngo wa yao: bam re- Khosiphia mae" vogaung" agyi Ido jhao"- yao: we' yao" nho: mau" zaui: mo, re myid: nae" qhid' mae" mung" byu qe Caung:pa" Yham mae Mao"So re caung da" byid: nae" qhid' mae" nhao: ke' va".
18 Mao"So: jeju khyo" yao: bam wa- Mahli kaung mae" Levi byu boe" doe, yaug Sherebia we' yao" nho: yauggai zo: we' mao:nhaung: daxe: she' yaug re nhao: ke' ako".
19 Yao: bam wa- Merari kaung mae" Hashabia we' Yeshaia rere:- yao: shid' zo" nho: ba nam sang: cao: shid' xe yaug we' daga" nhao: ke' ako".
20 Ai: tho' mae laung: yang:- Levi byu qere bao" nae" qhid' mae" kho:kham Davi we' yao" nho: zug: ade, qe- mang vin: ra" phug' phyid' qemae" na: gyo" li" ra" Caung:pa" Yham mae mau" zaui: mo, 220 yaug yao: bam alhab' re mang japhin: mae boke' ako".
Ezra Yang Mung" Byu Qere Zo:ve Jao" Akyu" Jhui" Mho' Ru
21 Ngo wa- Ahava qid khyo: nhae mae- ngonhaung" alhab' mo; qhid' mae" zo:ve jao" mung:- ngonhaung" nho: Mao"So: qhid' kheim: mae nyham: khyo" yang:- ngonhaung" re ngonhaung" nho: gyaung: khyo mae khyoshid' nae" we' ngonhaung" nho: myid:zo: qe we' jo, nho" zai kug alhab' re gug:gam byid: nae" qhid' mae" akyu" mho' nae" amyin" khyo" ke' ra".
22 Ngo wa- ngonhaung" nho: gyaung: khyo su" ra" au: gyevo qemae" ngonhaung" re lhaug' zaung" byid: nae" qhid' mae" khosin" pho" re myao: gyetab datab mho' nae" myid: qho' ca" ang va". Pe"mung:ga"re- ngo wa yao: re ngonhaung" nho: Mao"So wa- yao: re lam: khug: ngha: na: ra" yaug khao: ngo" re Shaman" byid: mung: yao: mae" lhang: phaug' phao: lo" ra" yaug khao: ngo" re- qobo dae byid: yaug ngad: ra" ein: bin: ta" kyo: va" ru ngad:-
23 Aimung: ngonhaung" wa Mao"So: yang ngonhaung" re gug:gam gye vha byid: nae" qhid' mae" zo:ve jao" yang: akyu" ceim" mho' na:- aimung: yao: wa ngonhaung" nho: akyu" mho' dao: jham re tau: byid: ava".
Caung:pa" Yham: Qhid' Mae" Jhaung Qhu" Jham
24 Au: jhaung khinjaung qemae"- Sherebia- Hashabia we' gaje daxe yaug re ngo khyin: to"-
25 Ai: thao ngo wa khosin" pho" yao" nho: pha,jhi" byid: mo, we' zug: ade, qe we'- Israel mung" byu qeyang- Caung:pa" Yham khug mae ci nae" qhid' mae" byid' ra" ngaui- qhang we' Keim kang: jham re lag mung:- khinjaung qere byid' pye' va".
26-27 Ceru wa ngo: yang yao: bam re byid' ru ngad: ra"
ngaui joe: 6000 joe:
ngaui keim kang: 100 (150 paung:)
qhang joe: 100 (7500 paung:)
qhang khug' 20 (270 aung: zha')
qhang khug' jham we' man: qi" ra" gyid: bo" khug' shid' lam:
28 Ngo wa yao: bam re ceru: ta"- naonhaung" wa naonhaung" nho: phug' pho" qenho: Mao"So Asang: qhid' mae" gyang" lho" mo, ngad:- aimung: ai we' dakhyo:- yao: re myid bug' xeim: khyo" cili" ra" ngaui khug' we' qhang khug' alhab' re: gyang" lho" ra".
29 Naonhaung" Caung:pa" Yham khyo joe" lo" sho' aijham re nyang" za: lhaug' zaung" ge,. Ai: jo, qo mae" khinjaung qenho: qe, khug mae aijham re lag mung: khinjaung qi: qe- Levi byu qe we' Yerusalem mae" vobyu qenho: au: jhaung qenho: lo, khyo ke' byid: ge,.
30 Aimung: khinjaung qe we' Levi byu qe wa- ai: ngaui- qhang we' keim kang: jham re Yerusalem mae" Caung:pa" Yham khyo tai: yu: lo" nae" qhid' mae" zam" ci: ako".
Yerusalem Khyo Dam: Tug' Phao: Lo: Ru
31 Zin sag' lho" dakhye' ein: khye' daxe: shid' ba: ba- Ahava qid khyo: mae" to" mung: Yerusalem khyo lo" bam va". Ngonhaung" gyaung: su" lo" re- ngonhaung" nho: Mao"So wa- ngonhaung" re ngonhaung" nho: gyevo qe: gye mae" we' lham: na: ra" gye mae" gyevha byid' ra".
32 Ngonhaung" Yerusalem khyo joe" lao" sam ba no" yu:-
33 Ai: thao byid ba ein: ba re ngonhaung" wa Caung:pa" Yham khyo ye" bam va". Ngaui- qhang we' keim kang: jham re lag mung: Uria nho: yauggai zo: khinjaung Meremod nho: lo, khyo byid: va". Yao: we' daga" Phineha nho: yauggai zo: Eleaza we' Levi byu shid' yaug ngad ko" ra"- Yeshua nho: yauggai zo: Yozabad we' Binui nho: yauggai zo: Noadia ngad: ako".
34 Lam: khao: ngo" re nghe' mung: bin: lag: lao"- ai: au: yao: mae jab byang" ra" tung" xam: kad' to: va".
35 Ailao"- pyaung" nha: to" rumae" dam: phao: lo mo, alhab' wa- Israel nho: Mao"So re phad' ngaui" xeim: khyo" qhaug' byid: nae" qhid' mae" ngaui" xeim: cili ako". Yao: bam wa Israel alhab' qhid' mae" nung: jaung lo: 12 dau:- yao lo: 96 dau: we' yao nau" 77 dau: qhaug' byid' ako". Yao: bam wa- yao: bam yao" qobo jham mae" gyang" shao nae" qhid' mae" cad' be, 12 dau: re qhaug' byid' ako". Ce: gug'nyhug' alhab' re- Asang re ngaui" xeim: khyo" phad' ngaui" ako".
36 Yao: bam wa- khosin" pho" yang yao: bam re byid' ra" dao:so: tung" xam: mugsug' rere: yu mung:-Uphrad ba vao shad' mug: mae" mung" eib zug: qe we' zug: ade, qere byid' ako". Yao: bam wa- mung" byu qere we' Caung:pa" Yham mae caung:pa" rure bao" thaug' byid' ako".