7
Yerusalem Khyo Ezra Joe" Lo: Ru
1 Zin lam: myo: sho' myao" thao- Artazaze wa Persia khosin" kad' na: au: Ezra ga: mang: ra" byu dayaug na: ra"- yao: wa yao" nho: phug' pho" byuxag' re Khinjaung Yin" Arun joe" sho' o mae" we' dakhyo: ceru: she' ra". Ezra wa Seraia nho: yauggai zo:- Seraia wa Azaria nho: yauggai zo: Azaria wa Hilkia nho: yauggai zo:-
2 Hilkia wa Shalum nho: yauggai zo:- Shalum wa Zadog nho: yauggai zo:- Zadog wa Ahitub nho: yauggai zo:-
3 Ahitub wa Amaria nho: yauggai zo:- Amaria wa Azaria nho: yauggai zo:- Azaria wa Meraiod nho: yauggai zo:-
4 Meraiod wa Zerahia nho: yauggai zo:- Zerahia wa Uzi nho: yauggai zo:- Uzi wa Buki nho: yauggai zo:-
5 Buki wa Abishua nho: yauggai zo:- Abishua wa Phineha nho: yauggai zo:- Phineha wa Eleaza nho: yauggai zo:- Eleaza wa Arun nho: yauggai zo: ngad: ra".
6-7 Ezra wa- Israel nho: Mao"So Asang: yang Moshe re byid' to" ra" tarha" re ajid' azo: mae" adai: ato' ba: ra" pha,jhi" zug: ngad: ra". Ezra wa yao" nho: Mao"So Asang: shaman" qo" yu yaug ngad mung: khosin" pho" wa yao: mho' ru ja: khao: ngo" re byid' ra". Artazaze eib: ru nhad' zin ein: zin mae Ezra wa Babelon mae" Yerusalem khyo khinjaung qe- Levi byu qe- Caung:pa" Yham mae" she mad be, nghaui" mo,- Caung:pa" Yham lhaug' zaung" mo, we' mau" zaui: mo, bobo: ra" Israel byu daphung: we' daga" gyaung: to" lo: ra".
8-9 Yao: bam wa zin sag' lho" dakhye' ein: khye' lho" xin: daba: ba re Babelon mae" to" mung:- Mao"So bao" thaug' byid' yang Yerusalem khyo lho" ngo" khye' ein: khye' lho" xin: daba: ba joe" lo: ako".
10 Ezra wa Asang: tarha" re mho" zhao: yu: rumae lo, joe" phug' cao" rumae we' tarha" jham we' thung" li jham alhab' re Israel byu qere mho" shid' rumae yao" nho: apyad re qhaug' pye' ra".
Artazaze Yang Ezra Re Dao:so: Tung" Xam: Mugsug'
11 Khosin" Artazaze wa- Asang: yang Israel qere byid' ra" tarha" jham we' amyin" dao: jham re bin sho' ba: ra" khinjaung pha,jhi" zug: Ezra re- o mae bo: ra" amyin" dao: byid' ra".
12 Kho:sin" Artazaze mae"- Mug: khaung: Mao"So: tarha" ba: ra" pha,jhi" zug: khinjaung Ezra jhao"-
13 Ngo wa nga" mung"dan: geim" mae" Israel byu alhab'- khinjaung qe alhab' we' Levi byu qe alhab' re nao we' daga" Yerusalem khyo cao: lo" nug mo, re akhang" byid' ra" amyin" khyo" ke' ra".
14 Ngo we' nga" pha,jhi" byid: mo, nhad' yaug wa- nao re lam: to" ra" ni" Mao"So: tarha" khoqhi" gai: rure qhug' myao nae" qhid' mae" Yerusalem we' Yuda mung" mae boe" na: rure qho: myid' ca: yu nae" nao re nhao: ke' va".
15 Nao wa- Yerusalem mae yao" Caung:pa" Yham jo; ra" Israel nho: Mao"So re ngo we' nga" pha,jhi" byid: mo, qhaug' byid: nug: nho" qhang we' ngaui ngaui" xeim: re ciye: ca" nae".
16 Nao wa- Babelon mung" dau geim" mae" nao the' khyui: yu: ra" qhang we' ngaui alhab' we' Israel byu qe we' yao: bam: khinjaung qeyang Yerusalem mae" yao: bam: Mao"So: Caung:pa" Yham qhid' mae" byid' ra" ngaui" xeim: alhab' re ciye: ca" nae".
17 Nao wa ce: ngaui re nyang" za: lha" yang yhung: ca" nae". Aimung: nung: jaung lo: jham- yao lo: jham- yao nau" jham- gaug zo we' sabyi qhang: vai mung: yang- Yerusalem mae" Caung:pa" Yham nho: phan mae aijham re ngaui" byid: ca" nae".
18 Dang: ra" ngaui we' qhang re wa- ni" Mao"So o ngaui: ru we' dakhyo: cao" yang: nao we' ni" vobyu cao: qe yhung: nug: ru pe" mae ngadqere: gai: ci: pye' ra".
19 Nao wa Caung:pa" Yham mae" caung: da" mau" mae ci nae" qhid' mae" nao re byid' to" va" keim kang: jham alhab' re Yerusalem mae" Mao"So re qhaug' byid: ca" ra".
20 Aimung: Caung:pa" Yham qhid' mae" nao mae ca" ru gatau pe" ngadqere:- Kho:kham: ngaui ban" mae" nao qo" ci nae".
21 Ngo wa- Uphrad ba vao shad' mug: mae" ngaui ban" zam" ra" zug: alhab' re- Mug: khaung mae" Mao"So: tarha" ba yaug khinjaung Ezra re yao" yang naonhaung" re mho" ru ja: khao: ngo"-
22 Ngaui joe: 1000- jung: gaug 100 tang- sabyi qang: ga:lan: 550- xau ga:lan: 550 we' xo: o: nho"- Uzzi yao: phoe' byid: nae" qhid' mae" amyin" khyo" ke' va".
23 Mug: khaung mae" Mao"So khyo" yao" nho: Caung:pa" Yham qhid' mae" qo ca" ra" ja: khao: ngo" re naonhaung" phoe' nae" phin: ca" genae". Aimung: yao" yang ngore we' nga" thao mae eib mo, re khonhae" re: nhag' mayo: nae" khyo" kad' ge,.
24 Naonhaung" wa- khinjaung qe- Levi byu qe- she mad be; ngaui" mo,- lhaug' zaung" mo,- mau" zaui: byu qe we' ce: Caung:pa" Yham we' sin" ra" gatau khag' mae" ngadqere:- khang: maqo" gaug nae" ein: jhid' tam" ke' va".
25 Ezra nao wa- ni" nho: Mao"So: yang nao re byid' ra" pha,jhi" re ci yhung: mung:- Uphrad ba vao shad' mug: mae na: ra" mang: byu alhab' mo, re ni" nho: Mao"So: tarha" we' dakhyo: eib nae" mau" pyo zug: ade, qe we' tarha" agyi qere san: to: ca" nae". Ai: tarha" re maba yaug khag' re ngadqere:- nao: yang tarha" mho" byid: ca" ra".
26 Dayaug yaug qe- ni" Mao"So: tarha" re- mangad: lao" khosin" nho: tarha" re maphug' cao" ngad: re- ai: yaug wa ai jao" yao: qobo dae byid' ru qhug ca" ra". Ai: qobo dae jham wa- se' pye' ru- mangad: lao" pyaung" nha: pye' ru- mangad: lao"- jo; nho" re sham" yu: pye' ru- mangad: lao" thaung: lhaung" pye' nae" ru jham ngad: ra"- ga: ta" ra".
Ezra Wa Mao"So Re Caung:khin" Ru
27 Ezra ta" ru wa- ngonhaung" nho: phug' phyid' bam: Mao"So Asang re caung:khin" byid' ra". Yao: wa khosin" pho" yang Yerusalem mae" Asang: nho: Caung:pa" Yham re ceru: khyo" nga: yhe' byid: nhao: ra".
28 Mao"So: jeju khyo" ngo wa- khosin" pho" mae" yao" nho: pha,jhi" byid: ade, qemae" we' yao" nho: kheim: so' qi" ra" zug: alhab' mae" myo, nho qo" yu va". Nga" Mao"So Asang wa- ngore nhag' lam: qam: byid: mung: ngo wa Israel byumyu" kaung jham: nho: au: jhaung myo: sho' yaug re ngo we' daga" jhui" tug' phao nae" qhid' mae" qo" ngaug: yu va".