9
Yuda Mangad: Mo, We' Myi: Jho" Yu: Rure Ezra Ba: Yu: Ru
1 Cegu: alhab' re bin: kad' thao- Israel byumyu" au: jhaung damyo" li" mung:- mung" byu qe- khinjaung qe we' Levi qe wa- mug: kyo: mung"dan: qe ngad: ra" Amon- Moba we' Egutu mae" byu qemae" mangad: lao"- Khanan- Hiti- Perizi- Yebusi we' Amori byu qemae" yao: bam yao" gaung re gathaung: san kho' yang: mana ngad: ako" ga: ngore ta" kyo" ako". Yao: bam wa- ai: byumyu" qe kad' ra" maca' majhad' mau" re kad' ako".
2 Yuda yauggai qe wa- taung bug myiqe: qere lo, xo' yu mung: Mao"So: gyang" lho" ra" byumyu" wa maca' majhad' boe" byaug va". Au: jhaung qe we' zug: ade, qe wa je: qhid' she mung: lhau: phyo' ako".
3 Ngo ceru re the' gyo: lao" kaug' yang: nhag' lam: thao" ru we' nga" mai bau: lao" cad' pye' va". Nga" xae we' nhad' mug' re: lao" phan" pye' mung: nhag' lam: byo; ru we' zaung: jo, va".
4 Ngo wa myi" thao mae" ngaui" xeim: qhaug' byid: yo, joe" li" sho' ai: jo, qo mae zaung: jo;- aimung: vobyu qe wa nga" nhae avai: ayae mae zang" ham: lo: ako". Yao: bam alhab' mo, wa- pyaung" nha: to" rumae" dam: tug' lo: ra" mo, nho: qobo jham: khyo re Israel nho: Mao"So ta" ruyang gyaug: din: ako".
5 Myi" thao zo" mae" ngaui" xeim: qhaug' byid: nae" ayo, joe" li" re- ngo wa kaug' na: ra" jo, qo mae" to" mung:- nga" mai bau: jad jham ve; ci yang:- ngo pad' thaug' thaug' mung: nga" lo, shid' lo; geim" re nga" Mao"So Asang jhao" yheim" ke' va".
6 Ngo wa ceru: ta"- O" Mao"So we"- Ngo wa ni" nho: qhid' kheim: mae nga" au: re mavae" tau losho' qho' kyi:- Ngonhaung" nho: qobo jham wa- ngonhaung" nho: au: tho' gyai myhao sho' bam: jo; ra"- aigu: wa mug: khaung joe" sho' myhao: ra".
7 Ngonhaung" nho: phug' pho" bam: qae" mae" ana" joe" sho'- ni" nho: byumyu" ngonhaung" wa xo sho' qobo shad' va". Ngonhaung" qobo: jham: mathao mae- ngonhaung" we' ngonhaung" nho: kho:kham qe- ngonhaung" nho: khinjaung qe wa- taung bug: kho:kham qenho: lo, khug khyo gyo" vao lo" bam va". Aimung: ngonhaung" wa se' pye' ru- lhad' khyad' ru we' thaung: byu khyo" taui" she: lo" ru qhug' lai: lo va". Ngonhaung" wa ana" ba qhug' ru we' dakhyo: bin sho' nga: yeim: lai: lo va".
8 O" ngonhaung" nho: Mao"So Asang we"- ana" dazab za: lang" ra" ce: ayo, mae- nao wa ngonhaung" re nhag' myan" ru qhu" byid: mung: ngonhaung" mae" damyo" re jeim mae" loe, nhao mung:- ce: gyang" lho" ra" jo, qo mae gug: gam taung" qo" na nhao: ava". Nao wa ngonhaung" re- jeim pyad mae" khyad' yu mung: kao so' daui khyo asag' byid' ava".
9 Ngonhaung" wa jeim boe" lai: lo va"- ngadqere: nao wa ngonhaung" re jeim pyad mae mato: co'- nao wa Persia khosin" qeyang ngonhaung" re myo,nho byid: mung: xo' daui: na nhao: ru we' byo; qeim: jo; ra" Caung:pa" Yham re dam: zhaug' nae" akhang" byid: mung:- ce: Yuda we' Yerusalem mae gug:gam: qhug' myao nhao: ava".
10-11 Ngadqere: O" Mao"So we"- ana" kam" wa- ai: gu: alhab' boe" lai: lo thao re ngonhaung" pe" qo" ta" nae" laug i? Ngonhaung" wa- nao: yang ni" nho: daui daui mo, lapa jham khyo" byid' to" ra" amyin" dao: jham re maphug' cao" dam: mung: bam va". Yao: bam ngonhaung" re ta" kyo" ru wa- ngonhaung" lo" na: sang: yu nae" mug: mae na: ra" byumyu" qeyang- ai: mung" dathao mae" dathao jao: sho'- nhag' qu" no ja: we' maca' majhad' mau" zo" jham: yang byang" nhao: ra" mathao mae magyang" lho" ngad: ra" ga: ta" ako".
12 Yao: bam ngonhaung" re pyang: ke' ru wa ai: mug: mae ngonhaung" pyo: pyo: lo" qo" na mung: ngonhaung" nho: myid:zo: qere khonhae" re: xo' kai" byid: nae" qhid' mae"- ai: byumyu" qe we' myi:byid: myi:yu khonhae" re: dakad' ge,. Yao: bam na: dai nae" mangad: lao" aung doe; nae" qhid' mae" dabao" ge,- ga: ta" ako".
13 Ngonhaung" nho: qobo jham we' shad' nghung" ru jham: qhid' mae" qobo dae byid' ra" khyo"- ngonhaung" mae ja: khao: ngo" boe" lai: lo thao lao" re:- ngonhaung" nho: Mao"So nao wa ngonhaung" re- ngonhaung" kham zo: ang: ra" tho' nang" ra" khyo" yang qobo dae byid: mung:- mashid na: dang nhao: rure- ngonhaung" ba: ra".
14 Airu: ngad: re- ngonhaung" wa- ni" nho: amyin" dao: jham re maphug' cao" dam: kad' mung:- ce: makhyang: mashab: ra" byumyu" qe we' myi:byid: myi:yu: gai: kad' genae" i? Ngonhaung" khyo" qe dam: kad' re nao wa ngonhaung" re bin sho' jhad' za: phyo' qheim" pye' nae" qhi" nhag' yo: mung:- khag' dayaug rere: madaui: na: dang nhao lo nae".
15 Israel nho: Mao"So Asang we"- nao wa tarha" din:man: yaug ra"- ngadqere: nao wa ngonhaung" re mashid na: dang nhao: to" ra". Ngonhaung" wa ngonhaung" nho: shad' nghung" ra" qobo jham re nao jhao" lhang: yu: ra". Ngonhaung" wa- ni" nho: qhid' kheim: khyo vao ye: nae" pe" akho: akhang" maqo" ein: ta" va".