44
Ba thug' Shad' Kham: Mo" Re Ci: Ru
1 Ai: yaug wa ngo re- Caung:pa" Yham jo, qo mae" ba thug' shad' mae" taung gaung shad' kham: mo" khyo jhui" ye" ra". Ai: kham: mo" wa pyid' jo; ra".
2 Aimung: Asang wa ce: kham: mo" airu: yao: pyid' jo, mung: khonhae" re: maphung" genae"- aire ci nae" akhang" xao su byu khoyaug rere: mabyid: pe"mung:ga"re- Israel nho: Mao"So Asang ngo wa ai: khyo" lai: vao ye: va". Ai wa airu: yao: pyid' jo, ca" nae" ngad: ra".
3 Ngadqere:- ai: eib: na: ra" zug: wa ai: khyo vao ye: mung:- nga" qhid' kheim: mae" gyang" lho" zo:ve re yevao zo" li" nae". Yao: wa ai: kham: dung: khyo" vao yang: akhug shad' lo" thao" mae" qe, khyo vao ye" ra" kham: dung: khyo" dam: phao: thug' lo" li" nae"- ga: ngo re ta" ra".
Caung:pa" Yham Khyo Vao Nhao Nae" Tarha" Jham
4 Ailao" ai: yaug wa ngo re- Caung:pa" Yham jao: kheim: khyo- mug: am: shad' kham: mo" khyo" jhui" lo" va". Ngo qu" ke' re- Asang: nho: Caung:pa" Yham wa- Asang: qhid' kheim: mae" qhui qhui qhag qhag mung: ra" bo" bao we' byang" jo; rure ngo the' myao: ra". Ngo wa myidgaung khyo lamhaung: lagoe, goe; gyo" mung:-
5 Asang wa shid ba: ra" yaug we"- nao the' myao: ru we' the' gyo" rure nyang" za: tae" gyo: wa,- ngo wa nao re- Caung:pa" Yham mae" tarha" we' thung" li jham re ta" kyo: nae". Caung:pa" Yham khug khyo khoyaug yaug wa vao ye:- thug' lo genae" akhang" qo" mung: khoyaug yaug wa akhang" maqo" rure nyang" za: xam" to: wa,-
6 Tau: lhan: myid bo: ra" Israel byumyu" qere- kho:kham Asang ngo wa- yao: bam kad' lai: lo ko" ra" maca' majhad' mau" jham re xo' yang maqo" zang: lo nae" ein: ru ta" kyo: wa,-
7 Yao: bam wa- ngo re ngaui" byid' ra" ngaui" xeim: jham: nho: xau sa: re qhaug' byid' na: ra" au:- ngo re maphug' cao" ra" au: qid lhai: khyo makham: yu mo, taungbug byu qere- Caung:pa" Yham khug khyo vao nhao: ra" khyo"- nga" nho: Caung:pa" Yham re masan masin" kad' pye' ako". Aimung: nga" byumyu" qe wa- yao: bam kad' ra" maca' majhad' mau" alhab' khyo" yang nga" nho: dao: thang" re phyo' pye' avako".
8 Yao: bam wa- nga" nho: Caung:pa" Yham mae lalam lakhug we' sin" ra" khyo" gyang" lho" mau" jham re maqu" gun ngad: ako". Ai: atha" yao: bam wa- taungbug byu qere qu" gun nhao: ako".
9 Kho:kham Asang ngo wa- au: qid malhai" ra" taung bug byu khag' re:- ngo re maphug' cao" ra" yaug khag' re:- nga" nho: Caung:pa" Yham khyo maqo" vao ye: nae". Amung: Israel byumyu" qenho: phaung gaung: mae na: ra" taung bug: byu dayaug lhao" re: maqo" vao ye: nae"- ein: ta" hau" to: va"- ga: ngo re ta" ra".
Levi Byu Qere Khinjaung Mau" Mae" Phoe' Pye' Ru
10 Asang wa ngo wa- ngo re to: co' mung: sulho jham re caung:pa" ko" ra" ai: Levi byu qere- dang: ra" Israel byumyu" gaje we' daga" qobo dae byid: naeva".
11 Yao: bam wa- Caung:pa" Yham mae" kham: mo" jham re qu" gun mung:- Caung:pa" Yham mae" mau" jham re zaui" ra" khyo"- ngo re caung da" byid' li" genae". Yao: bam wa- mo,byu qe: phad' ngaui" xeim: jham: qhid' mae" we' ngaui" xeim: jham: qhid' mae" qhaug' byid' ra" gug'nyhug' jham re se' mung:- yao: bam wa mo, byu qere caung da" byid' ra" mau" re zaui" na: li" genae".
12 Ngadqere:- yao: bam wa Israel byumyu" qe: qhid' mae" sulho jham re caung:pa" ra" mau" jhui" kad' mung:- cekhyo" yang mo, byu qere qobo khug khyo jhui" vao lo" ako". Kho:kham Asang ngo wa- yao: bam re qobo dae byid: ca" ein: gang" tang taung" dao:so: to: va".
13 Yao: bam wa khinjaung qe khyo" ngo re qo" caung da" byid: genae" mangad: nga" qhid' mae" gyang" lho" ru daja: ja" nhae khyo re: qo" te' ye: genae" mangad:- gyang" lho" thao" jo, qo khyo re: qo" vao ye: genae" mangad:- ceru wa yao: bam kad' lai: lo va" maca' majhad' mau" jham: qhid' mae" qobo dae byid' ru ngad: ra".
14 Ngo wa yao: bam re- Caung:pa" Yham mae kad' ca" ra" mau" jid: mau" zo: kad' nae" mau" jham mae mau" byid: nae"- ga: ngo re ta" ra".
Khinjaung Qe
15 Asang kho:kham wa- ai: Zadog mae" myhung: gyo" lo: ra" Levi kaung boe: khinjaung qe kam" wa- Israel gaje ngo mae" lhang: phaug' lo" au:- Caung:pa" Yham mae ngo re jhaug' zaug taung" qo" caung da" byid' ako". Aimung: ana" yao: bam wa- ngo re caung da" byid: mung: nga" nho: qhid' kheim: khyo ngaui" xeim: mae" xau we' sa: re qhaug' byid: nae" qhid' mae" vao li" nae" mo, ngad: ako".
16 Yao: bam za: nga" nho: Caung:pa" Yham khyo vao mung:- nga" nho: phan mae caung da" byid' ru we' Caung:pa" Yham mae caung:pa" rure qo" jhui" au: she nae" mo, ngad: ako".
17 Yao: bam wa- Caung:pa" Yham nho: akhug shad' vang" mae" vao kham: khyo vao ye" au:- jid: mo" mai bau: ve; ca" genae". Yao: bam wa- akhug shad' vang" mae ngad ngad Caung:pa" Yham khug mae ngad ngad mau" qo vin: na: au: re sug' khyang: yang qo; ra" mai bau: pe" re: magai: ve,-
18 Aimung: yao: bam bau kyoe: mathug' genae". Yao: bam wa jid: mo" pin: au: thab' we' jid: mo" pin: lhoqhang ve, ca" genae". Ngadqere: phyid' cui: magai: cui: genae".
19 Yao: bam wa- mo,byu qe na: ra" taunggaung shad' vang" khyo mathug' ye: shimae"- Caung:pa" Yham mae yao: bam mau" vin: ra" au: ve; ra" mai bau: jham re shi" khyad' pye' mung: gyang" lho" qe, jham mae to: co' ca" ako". Yao: bam wa- yao: bam: gyang" lho" mai bau: jham: yang mo,byu qere qug: khai: dae maqhug' nhao nae" qhid' mae" mai bau: gatau ve, ca" ako".
20 Khinjaung qe wa yao: bam: au: rere: magai: qaug: pye'- xae qhang re: magai: to: genae". Yao: bam wa ai re ga" go" zo: qhang sho' za: to: ca" ako".
21 Khinjaung qe wa- sabyi qang: shaug' ci yang: vang" akhug shad' khyo magai: vao ye:-
22 Khinjaung khoyaug ngad ngad kao" pye' to" ra" myiqe: re magai: yu- yao: wa- Israel byumyu" zomyi: gyang" re ngad ngad- khinjaung gayaug: nho: cug' mo" ngad ngad re za: agai: yu: ra".
23 Khinjaung qe wa nga" nho: byumyu" qere gyang" lho" ru we' magyang" lho" ru- lalam lakhug: thung" khyo" gyang" san: ru we' magyang" san ru- jho" shai" ru kho' yang: mho" shid' byid: ca" ako".
24 Yung" do, mung: jho" ta" ngag nae" mau" thug' li" lao"- khinjaung qe wa ai: mau" re nga" nho: tarha" jham re dakhyo: kho' phyid' byid: ca" ako". Yao: bam wa nga" nho: tarha" jham re cao" mung: thung" li jham we' dakhyo: lalam lakhug: poe jham re jhui" kad' ca" ako". Aimung: yao: bam wa Dugno: Ba re phug' cao" ca" ako".
25 Khinjaung dayaug wa- yao" nho: myhi" pho" dayaug yaug mangad: lao" yao: zo: qe mae" dayaug yaug- mangad: lao"- yao: mao: yao: nhaung: dayaug yaug- mangad: lao" yham maqo" shi" ra" yao" nhae: mo" dayaug yaug shid: jo; ru za: mangad: re- sushid maogaung re tin" zao" mung: caung:pa" thung" khyo" masan masin" magai: boe" nhao ngad: ra".
26 Yao: dam gyang" san: lo thao re nhad' ba lao" ca" ra".
27 Aimung: Caung:pa" Yham mae" akhug shad' vang" khyo vao ye: mung:- yao: yao" gaung re kyang" san: yu nae" qhid' mae" ngaui" xeim: qhaug' byid: ca" ra". Ailao" yao: wa- Caung:pa" Yham mae dam: qo" caung da" byid: nae" ngad: ra". Ngo Kho:kham Asang ta" to: va".
28 Khinjaung qe wa- Israel byumyu" qere byu daqae: mae" daqae: khyo xo' yang qo" jho" kai" byid: lo" nae" qhid' mae" ngo byid' to" ru mae"- khinjaung boe" nae" gae bam qo" yu: ako". Yao: bam wa Israel mung" mae jo,nho" magai: sang genae". Ngo wa yao: bam qo ca" gu: alhab' ngad ra".
29 Gaugzo ngaui" xeim: jham- qobo qhid' mae" ngaui" xeim: jham we' dam: xe' ra" ngaui" xeim: jham wa khinjaung qenho: zo:ve ngad: li" nae"- aimung: yao: bam wa Israel mung" mae nga" qhid' mae" kho' myho" to" ru pe" ngadqere: lham: khae: yu ca" genae".
30 Khinjaung qe wa sao qhid' jham" yu: ra" qhovo: qhoshi: mae" gai: thao" ru we' ngo re qhaug' byid' ru gatau ja: khao:ngo" re qo" yu ca" ako". Mo,byu qe mug baung: khao:ngo" yao: bam wa khinjaung qere yao: bam sao qhid' baung" ra" mug alu: khyo" jhaung qhu" byid: ca" ako". Aimung: nga" nho: shaman" jeju wa yao: bam: yham mae ajo; jo; li" nae".
31 Khinjaung qe wa yao: yao: za: shid: ru- mangad: lao" gug'nyhug' gaje: yang bin" se' ra" ngho' we' gug'nyhug' sho: magai: zo: genae".