43
Caung:pa" Yham Khyo Asang Dam: Joe" Li" Nae" Ru
1 Ai: yaug wa ngo re- ba thug' shad' qang: ra" kham: mo" khyo jhui" lo" ra".
2 Aimung: ai: jo, qo mae- Israel nho: Mao"So: qhid' kheim: mae" qhi qhi qhid qhid mung: ra" bo" bao wa ba thug' shad' khyo" joe" li" rure ngo the' myao:- Mao"So nho: thoe wa- panglai: qid myang thoe we' dau mung: myid gaung wa bao qui: ra" bo" bao yang bao: jo; ra".
3 Ce: qhu" lho wa- Yerusalem re phyo' qheim" pye' nae" qhid' mae" Mao"So joe" li" au: ngo the' myao: ra" qhu" lho ngad: ra". Aimung: Kheba qid gyaung: yae mae ngo the' myao va" qhu" lho ngad: ra". Ailao" ngo wa myid gaung khyo lamhaung: lagoe, goe; gyo" lo" va".
4 Qhi qhi qhid qhid mung: ra" bo" bao wa ba thug' shad' kham: khyo" bao: lai: lo" mung:- Caung:pa" Yham khug khyo vao lo" va".
5 Asang: nho: byo wa ngo re tau: to' yu mung:- ngo re akhug shad' vang" khyo jhui" lo" ra". Ai: jo, qo mae- Caung:pa" Yham re Asang: nho: phungbao byang" jo; rure ngo the' myao:-
6 Ai: yaug wa ai: jo, qo mae- nga" nhae mae ye; jo, mung: Asang wa Caung:pa" Yham khug khyo" ngo re-
7 Shid ba: ra" yaug we"- cemae nga" zaung tao" jo; ra". Ngo wa ce mae- Israel byumyu" qe: phaung gaung: mae na mung: yao: bam re apyad ato mae eib: na nae". Israel byumyu" qere:- yao: bam: kho:kham qere:- gatau: so jham re caung:pa" ra" khyo" yang re: yao: bam: kho:kham jham: sushid mao gaung jham re ce: jo, qo mae nyhab' ra" khyo" yang- nga" nho: gyang" lho" ra" mang re khonhae" re: nga: madam: yeim nhao lo: genae".
8 Kho:kham jham wa- nga" nho: Caung:pa" Yham jao: kheim: jham we' zang baung: jham: qhid' kheim: vang" vang" mae yao:- yao: bam: kho:kham kho" jao: kheim: jham we' zangbaung: jham re zhaug' to" ako". Aimung: ngonhaung" nho: agyo: mae khinqae dalam: za: akyo: jo; ako". Yao: bam wa- yao: bam kad' ra" maca' majhad' mau" jham alhab' yang nga" nho: gyang" lho" mang re nga: yeim nhao ako". Aimung: ngo wa nga" nho: nhag' yo" ruyang yao: bam re phyo' qheim" pye' va".
9 Ana" yao: bam wa- gatau: so jham re caung:pa" ru thang: pye' ca" ako". Aimung: yao: bam: kho:kham qe: sushid mao gaung jham re yu; pye' ca" ako". Yao: bam ai ru: kad' pye' ko" ngad: re- ngo wa yao: bam: phaung gaung: mae apyad ato bo: na: jo, nae" ga: dao: jhau: ra".
10 Aimung: Asang xo' ta" ra". Shid ba: ra" yaug we"- Israel byumyu" qere Caung:pa" Yham: akhyo re ta" kyo: wa,- aimung: yao: bam wa- ai: aso: kyae: rure ca: qu" vageshao:- Yao: bam re yao: bam: qobo ave, jham: mathao mae qho' phau: vageshao:-
11 Aimung: yao: bam wa- yao: bam kad' lai: lo: rure myid: qho' gelao"- yao: bam re ai: Caung:pa" Yham: nho: aso: kyae: to" rure sho' kyao: wa, ai: akhyao- ai: nho: vao kham: dung: jham we' thug' lo" ra" kham: dung: jham ai: agaung- ja: khao:ngo" nyhang" te' to" ru we'- ai: nho: cao" ye: nae" tarha" jham we' thung" li" jham re sho' kyo: wa,- ceru alhab' re yao: bam: qhid' mae" tung" to: wa,- ailao" yao: bam wa- ja: khao:ngo" re khoru: nyhang" jaung: te' to" ru we' tarha" jham alhab' re qo" kad' cao" genae" ngad: ako".
12 Ceru wa Caung:pa" Yham: nho: tarha" ngad: ra". Bam au: gam: gam: mae" jo, qo jham wa gyang" san mung: gyang" lho" ra".
Phan
13 Cegu: wa- Caung:pa" Yham re ka" ra" ru we' dakhyo: phan re ka" to" ru ngad: ra". Phan apan lhang" gam: shad' khao:ngo" mae- dadaung" no, mung: dadaung" lae: ra" gyab lhao: dalam: jo; ra". Gyab lhao: taung gaung shad' mae" akham" wa dathu: danghoe' myhao: ra" khyo" qae: kham" to" ako".
14 Phan mae" je: nyham: thao" ra" dau wa apan aqao: dao mae" shid' daung" myhao: ra". Ai: thao mae" dau wa- athao mae" dadaung" gam: sho' ngai: lo" mung: byid daung" myhao: ra". Ai: thao mae" dau re- athao mae" dadaung" gam: sho' dam: ngai: lo" ra".
15 ce: aau: dau wa- ngaui" xeim: phad' ngaui" ra" jo, qo ngad mung: byid daung" myhao: ra". Ajheim byid jheim tau mae" akhyug jham wa- gatau: akhyug au: tho' je: myhao: ako".
16 Phan anyaug: gu: wa byid shad' de, mung: dashad' daxe: shid' daung" daung" ngad: ako".
17 Agaung" dau gu: re byid shad' de; ra" dashad' khyo daxe: byid daung" daung" bo mung:- taung gaung shad' akham" mae ngo" thu myao: ra". (gyab lhao: thao wa ngo" thu lu: ra".) Phan khyo do, lo" ra" zam thao wa ba thug' shad' mae de; ra".
Phan Re Qhaug' Byid' Ru
18 Kho:kham Asang wa ngo re ta" ra". Shid ba: ra" byu we"- nao re ngo ta" kyo" ru tae" gyo: wa,- phan re kad' to" ra" au: nao wa ai: phan dao mae ngaui" xeim: phad' ngaui" byid' ra" khyo" yang re: phad' ngaui" byid' ra" gug'nyhug' jham: nho: sa: re ai: dao mae pyi" sheim: byid' ra" khyo" yang: re: ai: phan re qhaug' byid: ca" ra".
19 Zadog mae" myhung: gyo" lo: ra" Levi kaung mae bobo: mo, khinjaung qe za:- nga" qhid' kheim: mae ngo re caung da" byid: nae" qhid' mae" gai: li" mo, ngad: ako". kho:kham Asang ngo wa ceru re amyin" byid' to: va". Nao wa- yao: bam re- qobo qhid' mae" xeim: ngaui" byid: nae" nung: jaung lo: nau" dadau: byid: ca" ra".
20 Nao wa ai: nho: sa: dajhid' re yu mung:- phan au: mae" ze: thug' jo; ra" tau we' phan ale; bang: mae" amhaung" jham: dao mae we' athao jham gam: sho' mae gyad ca" ra". Ce: khyo" yang nao wa phan re gyang" san nhao mung:- qhaug' byid: ca" ra".
21 Nao wa- qobo qhid' mae" ngaui" xeim: khyo" qhaug' byid' ra" nung: jaung lo: re yu mung:- Caung:pa" Yham taung gaung shad' jaung: to" ra" jo, qo mae- phad' ngaui" ca" ra".
22 Thao: ba nao wa- pe" qo made; ra" cad' be, lo: dadau: re yu mung:- qobo qhid' mae" ngaui" xeim: khyo" qhaug' byid: ca" ra". Nao wa nung: jaung lo: khyo" gyang" san nhao: ru we' dakhyo: za: phan re gyang" san: pye' wa,-
23 Nao airu: bin: kad' lao" pe" dae made; qo mabo: ra" nung: jaung lo: nau" we' yao lo: nau" re yu mung:-
24 Ai shid' dau: re ngo jhao" cili" wa,- khinjaung qe wa ai: shid' dau" adao mae xo: re pyi" sheim: mung:- ai: shid' dau: re ngaui" xeim: khyo" ngo re phad' mung: qhaug' byid: ca" ako".
25 Nao wa- nhad' ba geim" mae ba khao:ngo" cad' be, lo: dadau:- nung: jaung lo: dadau: we' yao lo: dadau: re- qobo qhid' mae" ngaui" xeim: khyo" qhaug' byid: ca" ra". Aigu: alhab' wa pe" dae made; qo mabo: ru ngad ca" ako".
26 Nhad' ba: geim" mae- khinjaung qe wa phan re qhaug' byid: mung: ai re ci nae" jin" jin" nyhang" seim" to: ca" ako".
27 Ai: dalaban lai lao"- khinjaung qe wa ai: phan dao mae mung" byu qe: qhid' mae" phad' ngaui" xeim: jham we' zam" khug xeim: jham re ngaui" byid: ca" ako". Ailao" ngo wa naonhaung" alhab' re o ngaui nae". Kho:kham Asang ngo ta" to: va".