45
Mung"dan: Mae" Asang: Nho: Gaebam
1 Byumyu" kaung qere mug: myid gae bam kho' gae byid' au:- dadau: gu: re wa Asang: qhid' mae" qhaug' byid: ca" ra". Ai wa qhang phyao: 25000 lae bo mung: lu phyao: 20000 lae bo ca" nae" ngad: ra". Ai: jo, qo dadae: geim" wa gyang" lho" nae" ngad: ra".
2 Ce: jo, qo dadae: geim" mae- Caung:pa" Yham qhid' mae" myid gaung dacug' jo, ca" ra". Ai: myid gaung wa shad' khao:ngo" khyo 500 daung" bo mung:- avai: ayae lhang" gam: mae ngo" xe daung" lu: ra" myid cin lhang" gam" jo; ca" ra".
3 Ce: jo, qo mae agaung: daqi" 25000 lae qhang mung: 5000 lae lu: ra" gu: re ka" phyid' pye' ca" ra". Aigu: wa alhab' tho' gyang" lho" thao" ra" Caung:pa" Yham qo boe" li" nae".
4 Airu wa ai: mung"dan: mae" gyang" lho" ra" dau ngad mung:- Asang re yao" nho: Caung:pa" Yham khug mae caung da" byid' ra" khinjaung qe: qhid' mae" gathaung: san tang" to: byid: ca" genae". Aimae yao: bam: yham jham we' Caung:pa" Yham qhid' mae" yham qo myid gaung bobo: li" nae".
5 Ai: jo, qo mae" gadau: gu: agaung: daqi" wa Caung:pa" Yham mae mau" zaui" ra" Levi byu qe sang: yu nae" qhid' mae" tang" to: ca" ra". Ai: jo, qo mae yao: bam na nae" vogaung: jham jo, ca" genae".
6 Gyang" lho" jo, qo we' te' te' mae jo; ra" gatau: myid gaung dadau wa 25000 lae qhang mung:- 2500 lae lu: ra" gu: wa- Israel byumyu" mae" khag' ngadqere: gai: na: ra" vomo" khyo" tang" to: ca" ra".
Eib Khang" Zug: Qhid' Mae" Myid Gaung
7 Kho:kham nau" qhid' mae" re: myid gaung tang" to: byid: ca" ra". Gyang" lho" jo, qo mae ba vao shad' mug: kyo: mae" ba vao shad' Mug:gaung: panglai: joe" sho'- ba thug' shad' mug: kyo: mae"- ai: mung"dan: ba thug' shad' mug: yae joe" sho' ngad mung:- Israel byumyu" kaung qere kho' gae byid' ra" mug: myid: we' daqi" ngad ca" genae".
8 Ce: mug: myid jo, qo wa Israel mug: myid re eib: ra" eib khang" zug: qhid' mae" gae bam ngad: li" nae"- ai mung: yao: wa mo, byu qere mazag zo: lo:- dang: ra" mug: myid re Israel byumyu" kaung jham: qhid' mae" sang nhao: li" nae".
Eib Khang" Zug: Cao" Ye: Ca" Ra" Tarha" Jham
9 Kho:kham Asang wa- Israel eib: ra" zug: qe we"- naonhaung" wa saung" myao" sho' yao: qobo shad' avako". Naonhaung" nho: aqan alan mau" we' zag zo" rure thang: pye' ge,- Jo: ru we' din:man" rure kad' ge,- naonhaung" wa nga" nho: byu qere yao: bam: mug: myid mae" khonhae" re: madam: qo" khe' thug' lo: genae". Ngo kho:kham Asang wa naonhaung" re ceru ta" kyo: naeva".
10 Yaug khao:ngo" wa din:man" ra" jao laug: jham we'- jo, lag jham ci ca" ra".
11 Akyaug' re lag: ra" epha wa aqang: re lag: ra" bad we' daqi" ngad ca" ra". Ka" yu nae" wa homa ngad: ra". Boe"thug' li" nae" jo,lag wa- ceru: ngad: ra". 1homa= 10 epha= 10 bad
12 Naonhaung" qhid' mae" jo,lag wa- ceru: ngad: ra". 20 gera = 1 shekela
shekela = 1 mina.
13-15 Naonhaung" qhaug' byid: nae" qhid' mae" ka" yu nae" rure ceru: ngad: ra".
Jung: gaug= naonhaung" yad: yu: ru mae" 1/60
Bale = naonhaung" yad: yu: ru mae" 1/60
Zhan:lun: xau = naonhaung" nho: zhanlun gae mae" thug' ru mae" 1/100
(Bad khyo" ka" ge,- 10bad= 1 homa = 1 kora)
Yao= Israel mhin: gyo, mae" yao 200 dau: mae" dadau: ngad ca" ra". Naonhaung" wa gaug zo ngaui" xeim: jham- dau: geim" phad' ngaui" nae" gug'nyhug'- zam" khug ngaui" xeim: qhid' mae" gug'nyhug' jham- re qhaug' byid: ca" ako".
Ailao" naonhaung" nho: qobo jham re khyad' pye' byid: nae". Ngo kho:kham Asang ngo amyin" byid' to: va".
16 Ai: mung" mae" mung" byu qe alhab' mo, wa ce: ngaui" xeim: jham re Israel re eib: na: ra" kho:kham nau" jhao" ciye: ca" ako".
17 Lho" shid poe- Dugno: Ba jham we' gatau: poe jham mae- Israel damyu" geim" qhid' mae" dau: geim" geim" phad' ngaui" ca" ra" gug'nyhug' jham- gaug zo ngaui" xeim: jham we'- sabyi qang: ngaui" xeim: jham phoe' nae" mau" wa yao" qo ngad: ra". Yao: wa qobo qhid' mae" ngaui" xeim: jham- gaug zo ngaui" xeim: jham- dau: geim" geim" phad' ngaui" byid: ca" ra" ngaui" xeim: jham we' zam" khug: ra" ngaui" xeim: jham re Israel byumyu" qenho: qobo yu: pye' byid: nae" qhid' mae" phoe' ca" ra"- ga: ta" ra".
Poe Jham
(Phao thug' 12.1-20, Xng 23.33-43)
18 Kho:kham Asang wa- sao qhid' lho" khye' lho" xin: daba: ba mae naonhaung" wa pe" qo mabo: ra" nung: jaung lo: dadau: ngaui" byid: mung: Caung:pa" Yham re kyang" san: pye' ca" ako".
19 Khinjaung pho" wa ce: qobo qhid' mae" ngaui" xeim: mae" sa: re yu mung: Caung:pa" Yham kham baung jham mae- phan mae" akhyug byid lam: mae- akhug shad' vang" zang baung: jham mae gyad ca" nae".
20 Ai: lho" khye' lho" xin: nhad' ba: ba mae naonhaung" wa- thaug mangad' ru mangad: lao" maba mabeim: yang: qobo shad' mo; gaung tha" khyo" ai we' dakhyo: kad' ca" genae". Ceru: khyo" yang naonhaung" wa Caung:pa" Yham re gyang" lho" jo, nhao ca" genae".
21 Sao Qhid' lho" khye' lho" xin: daxe: byid ba: ba mae- naonhaung" wa lai co' poe re qhid ca" genae". Yaug khao:ngo" wa man" make' ra" mug re nhad' ba geim" zo: ca" ra".
22 Ai: poe sao qhid' ba mae- ai: ayo, mae eib: na: ra" zug: wa yao: yao" nho: qobo jham we'- mung" byu qenho: qobo jham: qhid' mae" ngaui" xeim: khyo" nung: jaung lo: dadau: qhaug' byid: ca" ra".
23 Nhad' ba: geim" mae ba khao:ngo" mae yao: wa- pe" qo mabo: ra" nung: jaung lo: nhad' dau: dau: we' yao lo: nhad' dau: dau: re Asang jhao" xeim: ngaui" byid: mung: ai jham re dau: geim" geim" phad' byid: ca" ra". Yao: wa ba khao:ngo" re:- qobo qhid' mae" ngaui" xeim: khyo"- cad' be, lo: dadau: dau: xeim: ngaui" byid: ca" ra".
24 Xeim: ngaui" byid' ra" nung: jaung lo: dau: khao:ngo" we' yao lo: dau: khao:ngo" qhid' mae"- gaug zo: daphai" we' zhanlun xau nhad' kaug' bobo ca" ra".
25 Eib khang" zug: wa- lho" nhad' khye' ein: khye' daxe: ngo" ba: ba mae qhid: ra" zaung poe qhid' mae"- nhad' ba: geim" mae ba: khao:ngo" qobo qhid' mae" ngaui" xeim" we' dakhyo: za: dau: geim" phad' ngaui" byid' ra" ngaui" xeim dakhyo: za: we' gaug zo: we' zhanlun xau ngaui" xeim: dakhyo: za: qhaug' byid: ca" nae"- ga: ta" to" ra".