42
Caung:pa" Yham Nhae Mae" Yham Mo" Jham
1 Ai: thao ai: yaug wa ngo re- taung gaung shad' vang" khyo jhui" ye: mung: Caung:pa" Yham mae" mug: am: shad' Caung:pa" Yham: nho: ba vao shad' lo" thao" athao yham mae" mava" ra" yham mo" dalam: khyo jhui" lo" ra".
2 Ce: yham mo" wa dayo daung" qhang mung: ngo" xe daung" lae: ra".
3 Ai: yham mo" dashad' wa- Caung:pa" Yham azo" cao" yang: mae" shid' xe daung" lu: ra" jo, qo akeim shad' khyo qang: jo; ra". Gatau dashad' wa- taung gaung shad' vang" mae" zam jao: dashad' khyo qang: jo; ra". Airu wa sam kai" khyo" yang: kad' to" ru ngad: ra". Kai" khao:ngo" wa ai: o mae" kai" tho' jeyang thao shad' khyo qhui" lo" ako".
4 Ce: yham mo" nho: mug: am: shad' cao" yang:- ai: shad' khyo vao kham: jham de; ru- daxe daung" lu mung:- dayo daung" qhang: ra" khyo dakhe' dung: ra".
5 Ai: yham mo" adao: kai" mae" qe, jham wa- ai: o mae" ale; kai" we' o shad' nyham: thao" kai" mae" qe, jham tho' je: lhae" byaug: ra". Pe"mung:ga"re- ai: qe, jham re thao khyo qhui: yang: kad' to" ru ngad: ra".
6 Sam kai" geim" mae" qe, jham wa zam thao dao mae kad' to: mung:- vang" mae" yham galam: ru: zang baung: jham: yang mathaug' to: ngad: ako".
7-8 Ai: yham mo" taung gaung shad' khinqae: nho: o: kai" wa- ai: nho: agaung: kho'- ngo" xe daung" qhang sho' zao: to: ko" ra". Dang: ra" ngo" xe daung" gu: mae qe, jham bo: ako". Aitho' mae" lo" thao" kai" mae wa yham mo" dalam" geim" qe, jham kad' to" ako".
9-10 Ai: yham mo" mae" ba thug' shad' lo" thao" mae jo; ra" qe, shid' qe, agyid' mae wa- qe, mo" khinqae qhid: ra" jo, qo ngad mung:- taung gaung shad' qe, vang" khug khyo vao ye" ra" kham: dung: jo; ra".
Caung:pa" Yham mae" mug: thao shad' mae wa- Caung:pa" Yham: nho: ba vao shad' lo" thao" dau- yham mo" mae" mataung" va" ru mae airu" ru yham mo" dalam: jo; ra".
11 Qe, mo" jham: qhid' mae- mug: am: shad' mae" khyo ru" ru byu lai khyo dakhe' dung: ra". Airu wa dakhyo: za: lu nhohab mung: ra"- vao kham: re: jho" dau: ako".
12 Yham mo" nho: mug: thao shad' qe, jham: agyid' mae kham: dung: dalam: jo; ra". Ai wa ba thug' shad' lo" thao" dau khinqae qhid: ra" mae jo; ra".
13 Ai: yaug wa ngo re- ce: yham mo" shid' lam" geim" wa gyang" lho" ako". Asang: qhid' kheim: khyo vao ye" ra" khinjaung qe wa- ai: qe, shid' qe, mae- gyang" lho" thao" ra" ngaui" xeim: jham re zo" ako". Ai: qe, jham wa gyang" lho" rumung: khinjaung qe wa ai: jo, qo mae gyang" lho" thao" ra" ngaui" xeim: jham- qobo qhid' mae" mangad: lao"- dam: xe' byid' ra" xeim: qhid' mae" gaug zo xeim: jham we' ngaui" xeim: jham re to" ako".
14 Khin jaung qe wa Caung:pa" Yham khug mae yejoe" na: jo; bam mung:- taung gaung shad' vang" khyo thug' lo" nug gelao"- Asang re yao: bam caung: da" byid' ra" au: ve; ra" gyang" lho" mai bau: jham re ce: qe, jham mae to: co' ca" ako". Yao: bam wa- mo,byu qe zang" ham: na ko" ra" jo, qo khyo mathug' ye: shire mai bau: gatau re ve, ca" ako".
caung:pa" Yham Vang" Myidgaung Re Ka" Ru
15 Aiyaug wa- Caung:pa" Yham akhug shad' jo, qo khaung: bin: ka" lao"- yao: wa ngo re ba thug' shad' kham: mo" khyo" jhui" thug' lo" mung:- ai: jo, qo taung gaung shad' re ka" qu" ra".
16 Yao: wa ka" gyang: yao: re yu mung: ba thug' shad' re ka" qu" ra". Ai wa ngo" yo daung" bo: ra".
17-19 Ai: thao yao: wa mug: am: shad' mug: thao shad' we' ba vao shad' khyo ka" qu" ra". Shad' khao:ngo" wa dakhyo: za: ngo" yo daung" daung" bo: ako".
20 Aimung: vang wa shad' khao:ngo" khyo ngo" yo daung" daung" kyae" lhang" kham" to" ra". Ai: khyae bao khinqae wa gyang" lho" ru we' magyang" lho" rure kho' to: nae" qhid' mae" ngad: ra".