41
1 Ai: thao- ai: yaug wa ngo re agaung: mae" qe, gyang" lho" jo, qo khug khyo jhui" vao ye" ra". Yao: wa ai: khyo joe" vao lo" ra" byu lai khyo re ka" qu" ra". Airu wa khyaug' daung" no; ra".
2 Lae phyao: daxe daung" bo: ra"- nhad' daung" daung" thau: ra" khinqae shid' lam: wa- dashad' dalam: lam: jo; jo; ako". Yao: wa ai: qe, re yao: ka" qu" ra"- airu wa byid xe daung" qhang mung: lae phyao: shid' xe daung" bo: ra".
3 Ai: thao yao: wa- akhug shad' lo" thao" qe, khyo ye" lo" ra". Yao: wa ai: khug khyo joe" lo" ra" vao ye: khyo re ka" qu" ra". Airu wa shid' daung" no, mung: khyaug' daung" lu: ra"- nhad' daung" thau: ra" khinqae shid' lam: wa dashad' dalam: jo; jo; ako".
4 Yao: wa ai: qe, re ka" qu" ra"- ai wa byid khyug bo mung: dashad' byid daung" dathu thu bo: ako". Ce: qe, wa agaung: mae" qe, thoeshad' lai: lo" mae jo; ra". Ailao" yao: wa ngo re- ceru wa gyang" lho" thao" jo, qo ngad: ga: ta" ra".
Caung:pa" Yham Khin Qae We' Nhaung Thao" Mae Qe, Kad' Ru
5 Ai: yaug wa- Caung:pa" Yham mo" mae" akhug shad' khinqae khonho" thau: rure ka" qu" ra". Aimung: airu wa khyaug' daung" thau: ra". Ce: khinqae we' tau" te' nhaung thao" shad' mae Caung:pa" Yham alhab' gam: sho'- shid' daung" daung" lae: ra" qe, ngai jham myo: sho' jin: te' to" ako".
6 Ce: qe, nau" jham wa sam pyae pyae de, mung: dapyae mae sam xe qe, qe, bo: ako". Pyae khao:ngo" mae" Caung:pa" Yham taung gaung shad' khinqae jham wa ai: lam" o mae" apyae mae de; ra" khinqae tho' je: po" do, lo" ako". Aimung: ai: qe, jham wa- khinqae mae mazhaug' to: lo: qo" zaung: jo; ako".
7 Aimung: Caung:pa" Yham mo" khinqae jham wa taung gaung shad' khyo" qu" ke' re- adao shad' lo" thao" mae" pyae joe" sho' dakhyo: za: thau: do, lo" nhohab qu" mung: jo; ako". Caung:pa" Yham: nho: taung gaung shad' khinqae we' tau" te' nhaung thao shad' qe, nau" jham: nho: taung gaung shad' mae zam thao lu shid' lam: zhaug' to" ako". Airumung:- o mae" pyae khyo" agaung: pyae we' dao mae" pyae jham khyo qo" do, lo" ra".
8-11 Ce: qe, nau" jham: nho: taung gaung shad' khinqae jham wa- ngo" daung" daung" thau: ako". Caung:pa" Yham: nho: mug: am: shad' mae" qe, nau" jham khyo ye" ra" kham: dung: dalam: jo; ra". Aimung: mug: thao shad' ye" ra" khyo kham: dung: dalam: jo; ra". Ngo wa- Caung:pa" Yham gam: sho' mae ngo" daung" lu: ra" zam thao dalam: jo; ra" airu wa myid gaung mae" khyaug' daung" myhao mung:- Caung:pa" Yham: khinqae jham zhaug' to" ra" apan aqao: we' damyao" za: ngad: ra". Zam thao we' khinjaung qe ci: ra" qe, agyo: mae- Caung:pa" Yham cao" yang: shid' xe daung" lae: ra" jo, qo akeim jo; jo; ra".
Ba Vao Shad' Yham Mo"
12 Caung:pa" Yham mo" mae" ba vao shad' jo, qo akeim: nho: lo" thao" dau mae- gug xe daung" qhang mung: nhad' xe daung" lae: ra" yham mo" dayham jo; ra". Ainho: khinqae jham wa gam: sho' alhab' ngo" daung" daung" thau: ako".
Caung:pa" Yham Nho: Ka" Ru Alhab'
13 Ai: yaug wa Caung:pa" Yham: nho: taung gaung shad' re ka" qu" ra"- airu wa dayo daung" qhang: ra". Aimung: Caung:pa" Yham mo" nhaung thao" shad' mae" zam thao jo, qo keim khyo ai: yham ba vao shad' lo" thao" shad' va" thao" athao joe" sho' re dayo daung" bo: ra".
14 Shid' shad' geim" mae" jo, qo akeim bobo mung: Caung:pa" Yham kheim: mae" ka" re dayo daung" bo: ra".
15 Yao: wa yham mo" nho: qhang phyao: ba vao shad' khyo- shid' shad' geim" mae" ginbyae: jham bobo mung: ka" qu" ra". Ai: rure: dayo daung" bo: ra".
Caung:pa" Yham Nho: Ajid' Azo: Jham
Caung:pa" Yham mae" vao kham: mo" shad' qe,- gyang" lho" jo, qo we' gyang" lho" thao" jo, qo wa-
16 Phyao: gaung mae" bao: zo: kham: jham joe" sho' sag' pye" yang zhaug' to" ra". Ce: bao: zo: kham: jham re gai: nghoe' pye' nae" khyo: kad' to" ako".
17 Caung:pa" Yham: nho: akhug shad' khinqae jham wa- kham: zang jham: nho: dao mae joe" sho' myhao mung:-
18 The' gae jham we' kherubin jham: alho re kyaung" tung" te' to" ako". Daqe, geim" gam: sho' the' gae jham ai:thao- gug'nyhug' jham daja: we' daja: jho" kyo yang: yang: de; bam: ako". Gug'nyhug' dau: khao:ngo" mae myo, khung: shid' lam: lam: de; ako".
19 The' gae shad' khyo qang: ra" xao su byu: nho: myo, khung: dalam: we' gatau dashad' mae" sag' gae shad' khyo qang: ra" khang khyi myo, khung: dalam: ngad: ako".
20 Phyao: gaung mae" kham: dung: adao joe" sho' khinqae lhang" gam: mae airu: za: de; jo; ako".
21 Gyang" lho" jo, qo mae" kham: baung jham wa byid bug bug ngad: ako".
Sag' Thaung: Phan
Gyang" lho" thao" jo, qo nho: qhid' kheim: mae sag' the: phan ru" ru daja: jo; ra".
22 Airu wa sam daung" myhao mung:- shid' daung" lu: ra". Ai: nho: ayae mae" daung" zang jham- ai: nho: apan aqao: we' ai: nho: ayae jham alhab' wa sag' yang kad' to" ru ngad: ako". Ai: yaug wa ngo re- ceru wa Asang: nho: qhid' kheim: mae jo; ra" vae: zo: jaung: ngad:- ga: ta" ra".
Kham: Dung: Jham
23 Gyang" lho" jo, qo khyo joe" ra" byu lai khyo athao" mae" kham: dung: dadung: jo; ra". Ai mung: gyang" lho" thao" jo, qo khyo joe" ra" khyo lo" thao" shad' mae re: kham: dung: dalam: jo; ra".
24 Ai shid' lam: wa kham: shid' khye' khye' de, mung: agaung: khyo" bung" lo" ako".
25 Khinqae jham mae we' dakhyo:- gyang" lho" jo, qo mae" kham: zang jham mae re: the' gae jham we' kherubin alho jham kyaung" tung" te' to" ako". Vao ye: kham: mae" qe, mae de; ra" kham: dung: taung gaung shad' mae- sag' the" yang mug' nghoe' to" ra".
26 Ce: qe, nho: ayae shad' gu: mae bao: zo: kham: jham de; ako". Aimung: khinqae jham wa the' gae jham: yang shaung: yhaung" to" ako".