18
Yaug Nge, Vin Vo, Ca" Ra" Qo
1 Asang ngo re jhau mung: ta" ra".
2 Israel mug: myid mae su paug' ta" ta" mung: ra" ce: dao: zham" wa pe" ngad: ra" i? Myhi" pho" qe shijhin zo" ako" ngadqere: yao: zo: qe: zaui: kyam: ako".
3 Kho:kham Asang ta" ra". Ngo wa kao so' daui na: ra" Mao"So ngad:- aimung: naonhaung" wa ce: dao: zham" re Israel mae madam: paug' ta" lo: genae".
4 Yaug khao:ngo" nho: kao so'- myhi" pho" yaug khao:ngo" we' zoshao yaug khao:ngo" nho: kao so' re ngo sang: ra". Qobo shad' yaug wa shid ca" nae" yaug ngad: ra".
5 Byu gai- din: man" ru we' nhag' lam: din" ru dayaug na: ein: gelang:-
6 Yao: wa Israel qenho: solho jham re macaung:pa"- kham" to" ra" phan yham mae qhaug' byid' ra" ngaui" xeim: jham re: mazo:- yao: wa su gayaug: yham sang myhi" rere: maju" phyo' lham" yu- mai ci: na: ra" myiqe: we' re: gaungsho: majho" zam"-
7 Yao: wa khag' dayaug rere: mamhug' zo: malhad' zo:- ngaui jhid' yu yaug pakham: khyo" to" ra" zai rere: dam: tug' byid' ra". Yao: wa vae: moe: mo, re zho: jhaug' mung:- gaungcin shopyad' na mo, re mai bau: byid' ra".
8 Yao: wa gau pai: qhid' mae" ngaui- majhid' byid:- yao: wa makhyang: mashab: ru kad' nae" maqad mung:- myan" jho" myo" ru pe" mae re: din:man" ra" dao: phyid' byid' ra".
9 Airu" ra" yaug wa nga" amyin" jham re phug' cao" mung: nga" nho: tarha" jham re nyang" za: cao" ra". Yao: wa din: man: yaug ngad mung: yao: wa kao so' daui: na nae"- ga: qam: so' bo: ra" kho:kham Asang ta" ra".
10 Aimung: ceyaug mae- lhad' zo: mung: byu se' ru we'-
11 Yao: pho" khonhae" re: malhaung" kad' ru cegu: re kad' ra" yauggai zo: dayaug qo" ein gelang:- yao: wa kham" to" ra" phan yham jham mae qhaug' byid' ra" ngaui" xeim: jham re zo: mung:- su gaje: nho: yham sang myhi" jham re ju" phyo' lham" yu: ra".
12 Yao: wa myaung mo, re mhug' zo" ra". lhad' zo" ra". Yao: wa ngaui jhid' yu yaug pakham: khyo" to" ra" zai re sang: yu pye' ra". Yao: wa Mao"So maba: ra" taungbug: so jhaung: yham jham khyo ye: mung: maca' majhad' qu" cae: sho' ra" solho jham re caung:pa" ra".
13 Aimung: yao: wa gau pai: qhid' mae" ngaui jhid' byid' ra". Yao: wa qo" daui na nae" i? Mangad:- yao: wa maqo" daui: na nae". Yao: wa ce: maca' majhad' mau" alhab' re kad' va" rumung:- yao: shid: li" nae". Yao: shid: ra" qobo wa yao: re vhin ca" nae".
14 Ana" ce: shid' yaug ein: yaug mae yauggai zo: dayaug na: ein gelang: yao: wa yao: pho" cao" lai: lo: ra" qobo alhab' re myao ngadqere:- yao" lag re macao"-
15 Yao: wa Israel qenho: solho jham re macaung:pa"- kham" to" ra" phan yham jham mae qhaug' byid' ra" ngaui" xeim: jham rere: mazo:- yao: wa su gayaug: nho: yham sang myhi" rere: maju" phyo' lham" yu-
16 Khag' dayaug rere: madeim" zag zo:- malhad' zo:- yao: wa ngaui jhid' yu yaug: aso: khyo" to" ra" zai rere: dam: tug' byid' ra"- yao: wa vae: moe; mo, re zho: jhaug' mung: gaungcin shopyad' na mo, re mai bau: byid' ra".
17 Yao: wa makhyang" ra" mau" kad' nae" ha: pye' ra"- gau pai: qhid' mae" re: ngaui majhid' byid:- yao: wa nga" nho: tarha" jham re cao" mung: nga" amyin" jham re phug' cao" ra". Yao: wa yao: pho" nho: qobo: qhid' mae" shid nae" mangad:- yao: kam" wa dang dang yao: qo" daui: na: li" nae".
18 Yao: pho" yaug kam" wa- mhug' zo: mung: lhad' zo" ra". Aimung: yaug khao:ngo" re makhyang: mashab: ru kad' lo: ra". Aimung: yao: wa- yao: yao: kad' shad' lai: lo va" qobo jham: mathao mae shid lo" va".
19 Ngadqere: naonhaung" myid' ako". Yauggai zo: wa pe" mung: yao: pho" nho: qobo jham: mathao mae dae pe"mung: makham zo: ang i? ga: myid' ako". Dao: phyid wa- yao" yauggai zo: wa jo: ru we' gai: rure kad' va". Yao: wa nga" nho: tarha" jham re zam: mung: aijham re nyang" za: cao" va". Aimung: yao: wa dang dang daui: na: li" nae".
20 Qobo kad' yaug wa shid: li" nae". Yauggai zo: wa yao: pho" nho: qobo: jham: mathao mae dayin dayo magai: kham zo: nae". Yao: pho" re: yao" nho: yauggai zo" qobo jham: dae re makham zo: ca" nae". Byugai wa gai: ru kad' ra" qhid' mae" aphug' jhaung qhu" byid' ru qhug' nae". Aimung: makhyang: mashab yaug wa yao: kad' ra" makhyang: mashab: ru: qhid' mae" dayin dayo: dae kham zo: ca" nae".
21 Makhyang: mashab yaug dayaug wa qobo shad' ru thang: pye' mung: nga" nho: tarha" jham re cao" ngad: re- yao: wa jo: ru we' gai: rure kad' ngad: re- yao: mashid nae"- yao: wa dang dang daui na: li" nae".
22 Yao: wa jo: rure kad' ra" mathao mae yao" nho: qobo alhab' re khyad' pye' byid: mung: yao: wa daui: na: li" nae".
23 Makhyang: mashab yaug shid: rure ngo qu" ngaui: ein: myid: jho ko" i? ga:- kho:kham Asang myid' ra". Mangad: ngo wa- yao: nhag' lam: tha" mung: daui: na: rure kam" wa amyao nug: ra".
24 Ngadqere: tarha" din:man: yaug dayaug wa gai: ru makad' lo: thang: pye' mung: makhyang: mashab mo, kad' ra" makhyang: mashab we' maca' majhad' ru jham re kad' qhid: lo: ngad: re- yao: wa airu qo" xo' daui: na nae" i? mangad: lhe"- yao: kad' va" ra" gai: ru daja: rere: mamyid: beim: byid: nae". Yao: wa yao" nho: jhaug' mazaug: ru we' yao" qobo jham: nho: mathao mae shid: li" nae".
25 Ngadqere: naonhaung" wa Asang kad' ru wa majo ngad: ra" ga: ta" ako". Israel naonhaung" we"- ngo re tae" gyo: ge,- ngo kad' ru jham wa majo ein: myid: jho ko" i? majo: ru wa naonhaung" nho: khyo yaug: angad: ra".
26 Tarha" din: man: yaug dayaug wa- gai: rure makad' lo: thang: pye' mung: makhyang: mashab: ru kad' thao shid: lo" ngad re- yao: wa yao: kad' lai: lo va" makhyang: mashab: ru mathao mae shid: lo" ra".
27 Makhyang: mashab yaug dayaug wa qobo shad' rure thang: pye' mung: jo: ru we' gai: rure kad' lao" yao: wa yao: yao" kao so' re khyad' yu: ra".
28 Yao: wa yao: kad' na: rure beim: so: mung: qobo shad' rure thang: pye' ra". Aimung: yao: wa dang dang mashid lo: qo" xo' daui: na: li" nae".
29 Israel byu qe naonhaung" lhaung" ta" ako" ru wa- Asang kad' ru majo ngad: ra"- ga: ta" ako". Nga" khyo wa majo ngad: ra" ein: naonhaung" myid: jho ko" ra" mangad: i? Majo: ru wa naonhaung" nho: khyo yaug: angad: ra".
30 Ana" kho:kham Asang ngo wa Israel naonhaung" yaug khao:ngo" re yao: yao: kad' ru qhid' mae" dao: kho' nae".
31 Naonhaung" kad' na: ra" makhyang: mashab: mau" alhab' mae" lhang lo mung:- naonhaung" nho: qobo: yang naonhaung" re daphyo' qheim" pye' nhao ge,- naonhaung" yao: naonhaung" myid asag' we' nhag' lam: asag' qo" yu: to: ge,- Israel naonhaung" wa pe" mung: shid nug: ako" i?
32 Ngo wa khag' dayaug rere:- mashid nhao nug- naonhaung" nho: qobo jham mae" nhag' lam: tha" pye' mung: kao so' daui ge,- ga: kho:kham Asang ta" ra".