17
Zeim Baung: Jham We' sabyi Naui Dao: Tau"
1 Asang wa ngo re ta" ra".
2 Shid ba: ra" yaug we"- Israel byumyu" qere-
3 Kho:kham Asang ngo yao: bam re ta" na: ru ba genae" qhid' mae" dao: tau" dalam: ta" kyo: wa,- gyai yaung" ra" ngho' mug' we' gyai lu: ra" daung re phyid: ci: ra" zeim baung: dadau: na:- yao: wa Lebanon bam jham khyo dao" ye" lo" mung: shaug' dagae mae" anyaug re khyug' yu: pye' ra".
4 Yao: wa ai re phaga: mug: khyo yu: lo" mung: phaga: byu jham: nho: vomo" dalam: mae lo" to" to" ra".
5 Ai: thao yao: wa Israel mug: myid mae" sag' zo: gae dagae re yu mung: ai re yaug: qi: nhao nae" qhid' mae" khonhae" re: qid jo, yang: myid xau gai: ra" mug: mae lo" qho" to" ra".
6 Ai: sag' zo: gae wa anyaug tad' li" mung: nyham nyham za" mae avho' gyai maung" lu: ra" sabyi naui danaui boe" li" va". Ai: sag' kaung jham wa ai: zeim baung: jhao" yaug: do, lo" mung:- agyi: jham wa no, no, cin" vao lo" ako". Ai: sabyi naui wa akaung jham we' avho' jham byang" nghoe' jo; ra".
7 Gyai qi" lu: ra" daung jham we' ngho' mug' gyai thau: ra" zeim baung: gatau dadau: re: na: ra". Aimung: ana" ai: sabyi naui wa yao" nho: agyi: re yao: jhao" cin" ke' mung: yao: yaug: jo; ra" khyae mae" tho' qid je: qo" byid nae" laug ga: myid: lao" ru we' yao" nho: avho' jham re yao: jhao" qang: ke' ra".
8 Ngadqere:- ai: sabyi naui wa myid xau gai mung: qid nyang" za: qo" ra" yo mae bin: qho" to: va" rumung:- yao: wa avho' jham qo" tad' yang: sabyi shi: jham zaui" ru we' gyag ga" ra" sabyi naui boe" jo; ava".
9 Aimung: kho:kham Asang ngo myid: ra" ce: sabyi naui wa qang" mung: yaug: qi" li" nae" i? Sao Qhid' mae" zeim baung: wa ai re agyi: mae" lao" phan" ru we' sabyi shi: jham re be; shu: phyo' mung: akaung jham re khyug' pye' byid' ru yang ai re mashid nhao nae" ga" laug i? Ai re lao" phan" pye' nae" qhid' mae" qam: myo: sho' maca" nae"- qam: qi" ra" byumyu" damyu" re: maca" nae".
10 Ngad va" ai re qho" to: va". Ngadqere: ai wa yaug: qi" qhang: li" nae" i? Ba thug' shad' mae la hug' hug' zao" ke' re ai: ru majhoe' lo" nae" i? Ai wa yao: yaug: jo; ra" khyi" mae majhoe' shid: lo" nae" i?
Dao: Tau" Re Sho' Kyo" Ru
11 Asang wa ngo re ta" ra".
12 Ce: tau: lhan: mo, re ai: dao: tau" nho: lajheim: pe" ta" nug: rure ba: gyo: vako" laug ein: myid' qu" wa,- Babelon mae" kho:kham wa Yerusalem khyo li" mung: kho:kham pho" we' yao" nho: zug: ade, qere Babelon khyo jhui" lo" va" ru yao: bam re ta" kyo: wa,-
13-14 Yao: wa kho:kham pho" nho: yham byu qe mae" dayaug re jhui" lo" mung: yao: we' dao: thang" mug sug' to" ra". Aimung: yao: re jhaug' zaug: na nae" qhid' mae" jham tang: nhao: ra". Yao: wa- ai: mung"dan: madam: to" li" nae" qhid' mae" we' dao: thang" mug sug' re yao: bam zam" na genae" qhid' mae" akhyag: ra" byu qere nhozo khyo" jhui" lo" ra".
15 Ngadqere:- Yuda kho:kham wa tau: lhan" li" mung: myao: jham we' gyetab aqi: datab qo" yu nae" qhid' mae" Egutu khyo lagyo: jham re nhao: ke' ra". Yao: aung doe, nae" i? Yao: wa aimae" qo" loe, nae" i? Yao: wa dao: thang" mug sug' maqo" phyo' nae"- qobo dae maqhug' leim: zo: lo: maloe, nae" lhe".
16 Ngo wa kao so' daui: na: ra" Mao"So ngad: aimung: ce: kho:kham wa yao: re kho:kham kho" mae to: yaug Babelon kho:kham we' to" ra" yao" jham tang" ra" dao: we' dao: thang" mug sug' re phyo' pye' ra" mathao mae yao: wa Babelon mae lo" shid: li" nae".
17 Babelon byu qeyang byu myo: sho' re qo" se' tam" pye' nae" qhid' mae" myid zhai: bam" we' gyab lhao: jham re dau" ra" au: kheim: so' qi" ra" Egutu kho:kham lao" re: yao: re gye poe mae maqo" bao" yu: li" nae".
18 Yao: wa yao: to" ra" jham tang: dao: we' myid vang" thao: ce' re phyo' pye' ra". Yao: wa cegu: alhab' re kad' rumung: ana" yao: maqo" phao: loe; lo: nae"- ga: kho:kham Asang ta" ra".
19 Kho:kham Asang ta" ra". Ngo wa kao so' daui: na: ra" Mao"So ngad:- aimung: cao" ye: nae" ga: nga" mang lao: yang: to" ra" myid vang" thao: ce' re phyo' pye' ra" mathao mae yao: re ngo qobo dae byid: nae".
20 Ngo wa sho: kung" yaug: nho: geim re myhung: mung: yao: re ai: yang taung" yu nae". Yao: wa nga" dao mae jhaug' mazaug: ra" mathao mae ngo wa yao: re Babelon khyo jhui" lo" mung: yao: re ai: jo, qo mae qobo dae byid: nae".
21 Boe" doe; thao" ra" yao" gyezo: qe wa mang: zin: jao: mae se' pye' ru qhug' li" genae". Aimung: mashid na: dang mo, wa shad' khao:ngo" khyo khe' sin" pye' ru qhug' li" genae". Ailao" ngo Asang dao: jhau va" rure naonhaung" ba: li" genae"- ga: ta" ra".
Myid: Lao" Khyo Re Mao"So Dao:so: Byid' Ru
22 Ceru wa kho:kham Asang ta" ra".
Ngo wa myhao: ra" shaug' gae ashao" re yu mung:-
sag' nyaug mag re khyug' pye' nae".
Ngo wa ai re myhao: ra" bam dabam dao mae lo" qho" to: nae".
23 Israel mung" mae" myhao: thao" ra" bam dao mae lo" qho" to: nae".
Airu wa akaung jham yaug tad' li" mung: ajid' bo: li" nae".
Aimung: qu" gyaug qu" lhaung sho' ra" shaug' gae mo" zang boe" li" nae"
ngho' amyu" cao jab sho' wa aimae na mung:
ai: aqab mae khug jo, qo qhug' myao: li" genae".
24 Ai: mug: mae" sag' gae alhab' wa-
ngo Asang ngad: rure ba: li" genae".
Ngo wa myhao: ra" sag' gae jham re thau: lhang" pye' mung:
ngai: ra" sag' gae naui jham re yaug qhang: li" nhao: ra".
Ngo wa sag' nyug gae jham re kyaug' jhoe' sham: lo" nhao mung:
sag' kyaug' gae jham re nyug: jam: nhao: ra" ngo Asang ta" to: va".
Ngo wa ngo kad' nae" ein: ta" to: va" rure kad' nae".