19
Nhag' Kaug' Nhag' Ngai: Ra" nghaui" caung:
1 Israel qenho: kho:kham nau" shid' yaug: qhid' mae" ce: ngug ji: re caung: nae" ngo re Asang ta" ra".
2 Ni" shid' zo" yao: myhi" wa khangkhyi myhi" ngad nhaung-
yao: wa yao" nho: khangkhyi nau" tao re gyai tin" ra" khangkhyi lo: jham nho: phaung gaung: mae khau: qhi" ke' ra".
3 Yao: wa khangkhyi nau" dadau: re khau: qhi: mung: yao: re sho: kung" nae" mho" byid' ra".
Yao: wa byusho: zo: yaug boe" li" ra".
4 Byumyu" qe wa yao" nho: khyo re the' gyo: mung:-
yao: re dung: khung: mae kung" yu: ako".
Yao: bam wa yao: re langhoe" yang Egutu khyo she: khyad' lo" ako".
5 Yao: wa yao" nho: myid: lao" khyo thao" byaug sho' lao" na: ra".
Ai: thao mae yao: wa khangkhyi nau" dadau: re dam: khau: qhi" ke' mung:
ai: dau: wa gyai tin" ra" khangkhyi dadau: boe" li" ra".
6 Ai: dau: wa qi" dang: li" lao"
Yao: wa gatau: khangkhyi jham we' daga" lang" jo; ra".
Yao: re: sho: khe' mau" mho" yu mung: byu sho: zo" ra" gug'nyhug' boe" li" ra".
7 Yao: wa gyebyu zaung jham re phyo' sin" pye' mung:
vogaung: jham re phyo' qheim" pye' ra".
Yao: kyid' ke' khao:ngo" ai: mug: mae" byu qe wa gyaug: din: ako".
8 Byumyu" qe wa yao: re khe' zin: nae" ga: zang" ham: ako".
Byu jham wa khyi" khao:ngo" mae" li" ako".
Yao: bam wa yao: bam: sho: kung" geim jham re myhung" ke' ako".
Aimung: yao: re yao: bam: lha" mae taung" yu: ako".
9 Yao: bam wa- yao: re kyam: khug mae lhaung" to: mung:
yao: re Babelon kho:kham jhao" jhui" lo" ako".
Yao: bam wa Israel bug gaung jham: dao mae
yao" nho: kyid' myang rure khonhae" re
mathe' gyo: losho' yao: re lhaug' zaung" to" ako".
10 Ni" myhi" wa-
qid zo: gyaung: nhae mae qho" to" ra" sabyi naui we' dau: ra".
Ai: jo, qo mae qid myo: sho' jo; ra" mathao mae-
sabyi naui wa afo' we' ashi: maung" jo; ra".
11 Ai: nho: akaung jham wa qam: bo mung:
kho:kham zaung: bao" jham yaug: boe" li" ako".
sabyi naui wa jham thaui: jham khyo joe" myhi sho' yaug: myhao: do, lo" ra".
Ai: ru khonho" avho' maung" mung: khoqhi" myhao: rure yaug khao:ngo" the' myao: ako".
12 Ngadqere:- nhag' yo" ra" lo, jham wa ai re agyi: jham mae" lao" phan" pye' mung:
ai: rure myid gaung khyo shapye' khyo" ke' ako".
Ba thug' shad' mae" la hug' wa ai: nho: ashi: re hug' kyaug' pye' byid' ra".
Ai: nho: akaung jham gyug' gyo" lo" ako".
Aijham wa kyaug' byaug mung: ngha" pye' ru qhug' ako".
13 Ana" ai: rure din" pyad yo mae kyaug' ho mung:
qid majo; ra" mug: mae qho" ke' va".
14 sabyi naui gae mae myi: nga" li" ra".
Airu: nho: akaung jham we' ashi: re myi: nga" pye' ra".
Akaung jham wa khonhae" re: qam: madam: bo lo: genae".
Khonhae" re: kho:kham zaung: bao" jham maboe" genae".
Ceru wa kaug' qhui" ra" nghaui" caung: ngad:- ai: rure dam: paug' caung: mung: kad' ako".