16
Jhaug' Mazaug: Ra" Yerusalem
1 Asang wa ngo re dam: jhau: ra".
2 Shid ba: ra" yaug we"- Yerusalem re yao: kad' ra" maca' majhad' mau" zo" jham ceim" qhu" wa,-
3 Yao: re Asang kho:kham: yang pe" ta" na rure Yerusalem re ta" kyo: wa,- nao wa Khanan mug: myid mae khau: li" ru ngad: ra".
Ni" pho" wa Amori byu ngad mung: ni" myhi" wa Hiti byu ngad: ra".
4 Nao khau: li" ra" au:- khag' dayaug; yang ni" co' re maphyid' byid:- nao re khag' macid' pye' byid:- xo" yang re khag' maboe, byid:- nao re pin: cug' mae khag' yang mathab' byid:-
5 Nao re cejham kad' caung byid: naeqhi" khag' yang nao re nhag' makhyag' ngad: ako". Nao khau: li" au:- nao re khag' majhid'de, ngad: ako". Nao re pa: din" yo mae shapye' to" ako".
6 Ai: thao ngo ayae khyo" su" lai: lo" re nao wa nao yao" sa: mae lhau" na: ru the' myao:- nao wa sa: za: lhau" de; jo, ngadqere:- ngo wa nao re mashid nhao-
7 Ngo wa nao re qao" zin" ra" sag' zo: gae we' dakhyo: qi" li" nhao va". Nao qam: bo: li" mung: qhang: li" ru we' zomyi: dayaug boe" li" va". Ni" nho: nug' cug am wa nyang" za: de; li" mung: ni" xae re: qhang: lo va". Ngadqere: nao wa gaungcin shopyad' ngad: jo; ra".
8 Ngo dam: su" lai: jao" lo" re- nao wa ba: jhid'de; nae" ayo, joe" li" va" rure the' myao:- ngo wa ni" nho: gaung: cin shopyad' gaung khyao re nga" adao: bau" yang ngoe' mung: nao re jhid'de; nae" dao:so: byid: va". Ngad va"- ngo wa nao we' lo,xo' nae" dao: thang" to: mung: nao wa nga" mae" boe" lo va"- ga: ta" ra". Ceru wa kho:kham Asang ta" ra" dao: ngad: ra".
9 Ailao" ngo wa qid yu mung: nao mae" sa: re cid' pye' byid: va". Ngo wa ni" shoqid mae zhanlun xau: yang boe; byid: va".
10 Ngo wa nao re thug' nag: shaung: te' ra" mai bau: qhang jham vhe' mung:- nao re gai: thao" ra" shoqid khyid zhaung: jham- daau pin au: thab' we' bathaung khyang adao: bau: vhe' byid: va".
11 Ngo wa ni" qao gao shaung zai we' lo,thang: jham we' qui: jham mae phug' de; laug jham te' byid: va".
12 Ngo wa nao re nho xaui: we' noxaui: byid: mung: yaung" ra" ba maug: zhaung: byid: va".
13 Nao mae qhang zai we' ngaui zai jham qo" ra". Aimung: nao wa khonhae" re: thug' nag: shaung: to" ra" daau pin: mai bau: jham we' bathaung khyang mai bau: jham re khonhae" re: ve; lo: ra". Nao wa- gai: thao" ra" jung: cin man" mae" kad' yu: ra" mug zo: mung:- byo: yhid' we' zhanlun xau zo: shaug' qo" ra". Ni" yaung" lamyhung wa qhi qhi mung: nao wa kho:kham myhi" boe" lo va".
14 Nao re ai qhi" jhid'de; nae" pho: kad' byid: yaug wa ngo ngad: ra" mathao mae nao wa ni" nho: jab byang" ra" yaung" lamyhung: yang mung"dan: khao:ngo" mae lahau: qi" lo va". Ceru wa kho:kham Asang ta" ru ngad: ra".
15 Ngadqere: nao wa ni" yaung" lamyhung we' lahau: re akho: akhang" yu mung:- joe" li" ra" yaug khao:ngo" we' yab: ra".
16 Nao wa ni" nho: mai bau: damyo" re caung:pa" jo, qo jham mae shaung nae" qhid' mae" ci: ra". Aimung: nao wa shava myhi" dayaug we' dakhyo: yaug khao:ngo" re naoyao" gaung ab byid' pye' ra".
17 Nao wa nao re ngo byid' to" ra" ngaui we' qhang zai jham re yu mung: yauggai: khyao dau alho jham kad' nae" qhid' mae" ci: pye' yang:- aijham we' myi: shad' lao shad' mau" kad' ava".
18 Nao wa nao re ngo byid' to" ra" bin: thug' te' ra" mai bau: jham re yu mung:- aijham re solho jham: adao mae vhe' to: byid' ra". Aimung: nao wa nao re ngo byid' to" ra" zhanlun xau we' nae pyo: xau re solho jham re qhaug' byid' pye' ra".
19 Ngo wa nao re zo:ve byid'- gai: thao" ra" jung: cin man"- zhanlun xau we' byoyhid byid: va". Ngadqere: nao wa ai jham re solho jham mae" myo,nho nga: lao: qo" yu nae" qhid' mae" xeim: khyo" ngaui" byid' pye' ra". Ceru wa kho:kham Asang ta" ru ngad: ra".
20-21 Ai: thao nao wa nao: yang ngo re khau byid' ra" yauggai zo: qe we' myiqe: zo: qere jhui" yu mung: yao: bam re solho jham: qhid' mae" ngaui" xeim: khyo" qhaug' byid' pye' ra". Nga" zoshao qere jhui: mung:- yao: bam re ngaui" xeim: khyo" maqhaug' byid: lo:- ngo re jhaug' mazaug lo: kad' gu: lao" re xo va" mangad: i?
22 Ni" nho: maca' majhad' shava myhi" mau" kao so' gyaung: khyo ayo, gu: mae- nao wa nao yao" sa: mae gaungcin shopyad' lhau" na: ra" zoshao: yo, mae" maca' majhad' apyad re khonhae" dalhang lao" mamyid: beim: ngad: ra".
Shava Myhi" Boe" Ra" Yerusalem Kaoso' Gyaung: Khyo
23 Kho:kham Asang ta" ra". Nao wa byuxa: voqoe,- byuxa: voqoe, qhug' ava". Nao wa ai: makhyang: mashab: ru alhab' re kad' thao-
24 Khyokhe' khao:ngo" ayae mae caung:pa" nae" sulho jham re zhaug' to: mung: shava myhi" mau" kad' ra".
25 Nao wa ni" lamyhung re tham: bab khyo" she: khyad' lai: lo" ra". Nao wa nao yao" gaung re ayae mae su" lai: lo" ra" yaug khao:ngo" re qhaug' byid: mung: nao wa ba khao:ngo" shava myhi" tho' mago" je: ra".
26 Nao wa mhin: shab' ra" ni" yham kyo: cao: Egutu qere nao we' daga" yab qo vao nhao mung:- nao wa ngo nhag' yo: nae" khyo: ni" gintho' mau" re ci: ra".
27 Ana" ngo wa- nao re qobo dae byid: nae" qhid' mae" we' nao qo" yu ang: ra" nga" nho: shaman" jeju gae bam re yu: pye' byid: nae" qhid' mae" nga" lo, re tau: to' ke' va". Ngo wa nao re nghang: mung: ni" sumlai khyo: yang maca' majhad' boe" ra" Philisti byu qenho: lo, khyo nao re ab: pye' va".
28 Nao wa gaje qe we' nhag' madag mung:- Asuri qenho: thao khyo cao" tao" ye" lo" ra". Nao wa yao: bam: shava myhi" ngad: ra". Ngadqere:- yao: bam re: nao re nhag' maqo" dag nhao ngad: ako".
29 Nao wa phaga: byu qe: mung"dan: Babelon qenho: shava myhi" re: ngad: ra". Ngadqere:- yao: bam re: nao re nhag' maqo" dag nhao ngad: ako".
30 Ceru wa kho:kham Asang ta" na: ru ngad: ra". Nao wa qho' maba: ra" shava myhi" we' dakhyo: cegu: alhab' re kad' ra".
31 Hau" mo" khyo khe' khao:ngo" mae nao wa solho jham re caung:pa" nae" jo, qo jham zhaug' to: mung: shava myhi" gintho' mau" re kad' ra". Ngadqere:- nao wa shava myhi" gaje ru: ngaui qo" nae" khyo" thug' na: qin" ru mangad:-
32 Nao wa- yao: yao" yham sang pho" re jhid'de; nae" atha"- byubang" qe we' myi:- lao shad' ra" myiqe: we' dau: ra".
33 Shava myhi" re wa ngaui byid' ako". Ngadqere: nao wa ni" nho: zoqae: pho" jham alhab' re jhaung qhu" jham byid: mung:- yao: bam re khyi" khao:ngo" mae" li" mung: nao we' yab nae" qhid' mae" khug vag: jhaung qhu" byid' ra".
34 Nao wa gakai: lai shava myhi" yao: angad: ra". Nao re shava myhi" boe" sho' ga: khag' yang majhan: ngad: ako". Nao re ngaui mabyid:- nao yaug she yao: bam re ngaui byid' ra". Ngad: ra"- nao wa gaje we' madau ngad: ra"- ga: ta" ra".
Yerusalem Dao Mae Mao"So: Nho: Dao: Kho' Ru
35 Aimung: shava myhi" Yerusalem nao we"- ana" Asang ta" na: rure gyo" qu" shi: wa,-
36 Ceru wa kho:kham Asang ngad: ra". Nao wa ni" mai bau: jham re khyad' pye' mung: shava myhi" we' dakhyo: nao yao" gaung re ni" zoqae: pho" jham we' maca' majhad' qu" cae: sho' ra" solho jham re byid' pye' ra". Aimung: nao wa ni" zo: bam re ngaui" xeim: jham we' dakhyo: solho jham khyo se' nghaui" byid' ra".
37 Ce: mathao mae- ngo wa qhid' phyao: mae" nao jhid'de; ru we' nao nghang" ra" ni" zoqae: pho" jham alhab' re khai: zhang: yu nae". Ngo wa yao: bam re ni" lhang" gam: mae jhui" nha: to: mung:- ni" mai bau: jham re khyad' pye' byid: yang: yao: bam: yang nao re gaungcin shopyad' the' myao nhao nae".
38 Ngo wa nao re lao shad' ru we' byu se' mau" khyo" dao: kho' mung: nga" nhag' yo" ru we' nhag' jam: yo" ru yang nao re shid: ra" qobo dae byid: nae".
39 Ngo wa nao re yao: bam: kheim: so' khug mae nha: to: mung:- yao: bam wa nao shava myhi" mau" kad' yang: solho jham re caung:pa" ra" jo, qo jham re phyo' khyo" pye' byid' li" genae". Yao: bam ni" mai: bau: jham we' phug' de; laug zai jham re yu: pye' byid: mung:- nao re gaungcin: yao: to: co' li" genae".
40 Yao: bam wa nao re laug baui: yang ceim" pye' nae" mo, phaung daphaung re lhau: zhung" ke' mung:- yao: bam wa yao: bam: shae pyang: jham: yang nao re adau atam" aje, aman" kad' pye' li" genae".
41 Yao: bam wa ni" nho: yham jham re nga" pye' mung:- ni" qobo dae leim zo" rure myiqe: qe phaung jham mae the' myao nhao: li" genae". Ngo wa nao re shava myhi" boe" ru mae" thang: pye' nhao: mung:- ni" zoqae: pho" qere jhaung qhu" jham gae byid' rure tam" pye' nae".
42 Ailao" nga" nhag' yo: gyo" byaug mung: ngo wa jo, yo: lo" nae". Ngo wa nhag' re: mayo: lo nae". Nhung re: maqu" nhung lo nae".
43 Nao wa- nao ngai shi" au: nao re ngo khoru: caung: qhi" ke' rure to" myhid' pye' mung:- nao kad' lo: ra" mau" jham alhab' yang ngo re nhag' yo: nae" khyo: kad' ava". Ai: mathao mae nao: yang yao: bam alhab' mo, re ngaui byid: nae" khyo: ngo kad' va". Nao wa- nao kad' lai: lo: ra" gatau: maca' majhad' mau" jham alhab' dao mae pe" mung: gintho' mau" re yang: paug' kad' i?- ga: ta" ra". Kho:kham Asang ta" to: va".
Yao: Myhi" Nga: Kyi:- Yao" Zo: Nga: Kyi
44 Asang ta" ra"- Yerusalem we"- su gaje: wa ni" khyo re ceru: ga" ra" dao: zham" yao: myhi" nga: kyi:- yao: zo: nga: kyi- ga: ta" li" genae".
45 Nao wa gaigai: ni" myhi" nho: myiqe: zo: yao: ngad: ra". Yao: wa yao" yham sang pho" we' yao: zo: qere ca' nghang" ra". Nao wa yao: yao" yham sang pho" jham we' yao: zo: qere ca' nghang" ra" yao: bai: yao: nhaung: bam we' dau: ra". Nao we' ni" bai: vomo" jham wa Hiti myhi" zang we' Amori pho" zang qo" ako".
46 Ni" bai: wa mug: am: shad' mae" Samari we' yao" vogaung: jham ngad: ra". Ni" nhaung: we' yao" vogaung: jham wa mug: thao shad' mae" Sodom ngad: ra".
47 Nao wa yao: bam: khyid khu mae cao" mung:- yao: bam: maca' majhad' mau" ave, jham re kad' zhao: ru we' nhag' dag va" i? Mangad:- khomyhao" makyo: shire za: nao wa yao: bam kad' ra" ja: khao:ngo" tho' je: xo: ra" khyo" lho: qhu" ra".
48 Kho:kham Asang wa- ngo wa kao so' daui: na: ra" Mao"So dang dang ngad:- amung: ni" nhaung: Sodom we' yao" nho: vogaung: jham wa- nao we' ni" vogaung: jham kad' lai: lo: ra" makhyang: mashab: rure khonhae" malhaung" kad' ngad: ako".
49 Yao: we' yao" nho: vogaung: jham wa yao: bam mae zo: nae" magan: mago" qo" mung: yaug yo cae: tae" ra" khyo" myan myan qo" na ko" ra" mathao mae ngad beim" ako". Ngadqere:- yao: bam wa myaung sho: mo, we' akho: akhang: maqo" mo, re maqu" caung ngad: ako".
50 Yao: bam wa ngad beim: mung: ngo nghang" ra" mau" jham re kad' ako". Aimung: nao nyang" za: ba: ru we' dakhyo: yao: bam re ngo phyo' qheim" pye' va".
51 Samari wa nao shad' ra" qobo: nho: agaung: dano" lao" makad' shad' ngad: ra". Nao wa yao: khonhae" re lhaung" kad' lai: lo: ra" tho' je yang: maca' majhad' qu" cae: sho' kad' ra". Ni" ave, qeim: ru we' tai" ke' qu" re- ni" bai: ni" nhaung: tao wa pe" qobo maqo" nhohab qu" mung: ra".
52 Aimung: ana" nao wa ni" nho: nga: yeim khyo re kham zo: ca" naeva". Ni" qobo jham wa ni" bai: ni" nhaung: tao: qobo tho' saung" je: xo mung: ni" nhae mae yao: shid' zo: wa qobo maqo" nhohab ngad: ako". Ana" myo, khung: ne mung: ni" aqho' aqhid re kham zo: se,- pe"mung:ga"re nao wa ni" bai: nhaung: tao re gyang" san nhohab qu" mung nhao: ava"- ga: ta" ra".
Sodom We' Samari Re Dam Tau: Zhaung Nae" Khyo
53 Asang wa Yerusalem re ta" ra". Ngo wa- yao: bam Sodom we' yao" vogaung: jham- Samari we' yao" vogaung: jham re dam: na: dai na: qo" nhao nae". Ngad va"- ngo wa nao rere: na: dai na: qo" nhao nae".
54 Nao wa nao yao" gaung re myid: qho' li" nae"- aimung: ni" nho: nga: yeim: ru wa ni" bai: nhaung: tao khoqhi" khonho" na: myan na: gai: ru yao: tao re qhu" byid' li" nae".
55 Yao: shid' tao wa dam: na: dai na: qo" li" genae". Aimung: nao we' ni" vogaung: jham re dam: tau: zhaung nae".
56-57 Nao wa Sodom re yao: ngad beim" ra" ba na ayo, jham: gu: mae- nao kad' ra" makhyang: mashab: mau" re mapug: thug' ke' shi" ayo, mae Sodom re nao qinug lhaung" tu" mangad: i? Ana" nao wa yao: we' dakhyo: yao: ngad: jo; ava". Edom byu qe- Philisti byu qe we' nao re nghang" ra" ni" yham kyo: gaje: byumyu" qe: qhid' mae" qinug tu" keim" nae" ru boe" ava".
58 Nao wa nao kad' lai: lo: ra" kheim: co' mau" we' maca' majhad' mau" jham ra" mathao mae dayin dayo: dae kham zo: ca" ava"- ga: ta" ra". Asang wa ta" to" ava".
Apyad Ato Mae Gang" Tang: Jo; Ra" Dao: Thang"
59 Kho:kham Asang ta" ra"- nao wa ni" dao:so: jham re lhaui" to" pye' mung: dao: thang" re phyo' ra" mathao mae- ngo wa nao re nao de leim zo: nae" man: qi" ru we' dakhyo: kad' nae".
60 Ngadqere:- ngo wa- nao ngai shi" au: nao we' to" ra" dao: thang" re nga: yhe' byid: mung: ngo wa apyad ato mae gang" tang: jo, nae" dao: thang" re nao we' ke' to: nae".
61 Nao wa nao khoru: na mung: kad' lai: lo: rure myid: beim: yang:- ni" bai: we' ni" nhaung tao re nao dam: qo" yu: ra" au:- aijham: mathao mae nao myid: qho' li" nae". Ngo wa yao: shid' zo: re ni" myiqe: zo: tao we' dakhyo: boe" nhao nae" rure- nao we' to" ra" dao: thang" mae mabo: bo ngadqere: boe" nhao nae".
62 Ngo wa nao we' to" ra" dao: thang" re asag' dam: kad' mung:- nao wa ngo Asang ngad: rure ba: li" nae".
63 Ngo wa nao kad' lai: lo: ra" shad' ru alhab' re qobo khyad' pye' byid: nae". Ngadqere:- nao wa aijham re myid: beim: mung: ni" nhad' re maqo" ho" losho' myid: qho' li" nae"- ga: ta" ra". Kho:kham Asang ta" to" ava".