4
1 Bashan mae" nung: jaung zang jham we' dakhyo: zo" xau: yaung" bam mung: qam: nang: mo, re mangad maang: khyo: zam" khug yang: myaung mo, re deim" zag zo" ru we' naonhaung" nho: yham sang pho" qere yhid jaung nhao: ra" Samari mae" myiqe: naonhaung" we"- ceru re tae" gyo" ge,.
2 Qam so' bo: thao" ra" kho:kham Asang wa gyang" lho" yaug ngad yang: yao: wa airu: dao:so: byid' ra". Yao: wa- naonhaung" re langhoe" yang nghoe" shae: khyad' lo" mung: yaug khao: ngo" wa myhad' mae myi" ra" ngo: ru" ru ngad: li" genae".
3 Naonhaung" wa jhao" thao" ra" vang byo, khyo she: khyad' ye" ru qhug' mung: aimae" tau: khyo" pye' ru qhug' genae" ra" ba na joe" lo: li" nae".
Zhao: Yu Maba: Ra" Israel Byumyu" Qe
4 Qam: so' bo: thao" ra" kho:kham Asang wa- Israel byumyu" qe we"- Bethela mae" gyang" lho" ra" jo, qo khyo ye: mung: qobo yekad' re yekad' ge,. Gilgala khyo ye: mung: naonhaung" qam: alhab' yang qobo ye: kad' ge,. Qhid' khyo ze: ye: mung: ne, seim khao: ngo" xeim: ngaui" byid: nae" qhid' mae" gug'nyhug' jham re ciye" ru we' sam ba ein: ba khao: ngo" naonhaung" nho: xebam dabam qhaug' byid: ge,.
5 Naonhaung" nho: mug re Mao"So jhao" jeju beim: ra" khyo" qhaug' byid: ge,. Aimung: naonhaung" cili" ra" ngaui" xeim: aje we' sin: yang: phug: kyo: ge,- ceru wa naonhaung" gyai kad' nug: ra" mau" ngad: ra".
6 Naonhaung" nho: vogaung: mo" jham alhab' khyo bao: khug' khug' nhao yaug wa ngo yao: ngad: ra". Ngadqere: naonhaung" wa ngo jhao" madam: tug' lo ngad: ako".
7 Naonhaung" nho: qhovo: jham mug: qid ca" thao" ra" au: re ngo mug: qid re tam" to"- ngo wa vogaung: mo" davo mae mug: qu nhao mung: gavo mae maqu nhao. Yo dakhyao: mae mug: qu gyo" mung: dakhyao: wa kyaug' ho: jo; ra".
8 Vogaung: mo" myo: sho' mae" byu qe wa qid shab' mung: vogaung: mo" gavo khyo qid qhug' yu nae" laug ga: myid: lao" ru we' ye" ako". Ngadqere: aimae yao: bam: qhid' mae" shaug' qid malaug ngad: ra". Ngadqere: naonhaung" wa ngo jhao" madam: tug' lo shi: ngad: ako".
9 Ngo wa naonhaung" nho: qhovo: zo: jham re kyaug' shid: lo" nhao nae" qhid' mae" la laung re nhao: ke' ra". Naonhaung" nho: qhovo: khyae we' sabyi gae alhab'- naonhaung" nho: pho' ham" gae jham we' zhanlun gae jham re khyag' phaung" jham: yang zo" pye' byid: va". Ngadqere: naonhaung" wa ngo jhao" madam: tug' lo shi: ngad: ako".
10 Ngo wa Egutu mae nhao: ke' ra" qam" no ru" rure naonhaung" jhao" nhao: ke' byid: va". Naonhaung" nho: zolau: qere gye khe' jao: mae se' pye' byid: mung: naonhaung" nho: myao: jham re yu: pye' byid: va". Naonhaung" nho: zaung jham mae" sushid bab sheim nae: ru yang naonhaung" nho: nho mae ne: ha" jo, nhao va". Ngadqere: naonhaung" wa ngo jhao" madam: tug' lo shi: ngad: ako".
11 Sodom we' Gomora re ngo phyo' qheim" pye' ru we' dakhyo: naonhaung" mae" damyo" re phyo' qheim" pye' va". Naonhaung" mae" mashid na: dang mo, wa myikhyeim" mae" she: thug' to" ra" myibaui" we' dau: ako". Ngadqere: naonhaung" wa ngo jhao" madam: tug' lo shi: ngad: ako"- ga: Asang ta" ra".
12 Airumung: yang:- Israel byumyu" qe we"- ngo wa naonhaung" re qobo dae byid: naeva". Ngo ce re kad' naeva" ngad: ruyang nga" nho: dao: kho' rure thaung" qhug' nae" qhid' mae" seim" ci ge,- ga: ta" ra".
13 Mao"So wa bam jham re kad' to: mung:
la re phan" to: yaug ngad: ra".
Yao: wa yao: myid: to" rure xao su byu re ba nhao: ra".
Yao: wa na" re myi" boe" nhao: ra".
Yao: wa myidgaung mae" myhao: ra" khyo" su" lo" ra".
Qam: so' bo: thao" ra" Mao"So Asang ga" ru- ce wa yao" mang ngad: ra".