3
1 Israel byumyu" qe we"- Egutu mae" jhui" thug' lo: ra" byumyu" damyu" geim" ra" mo, naonhaung" we' sin: yang Asang ta" ra" ce: mungdao: re tae" gyo: ge,.
2 Myidgaung: dao mae" byumyu" alhab' tho' mae naonhaung" re za: ngo: yang ba mung: gun caung: lo: ru ngad:- ceru: mung: yang: naonhaung" qobo wa gyai qu" gyaug qu" lhaung sho' ngad: ra". Amung: ai: qobo jham: ra" mathao mae naonhaung" re ngo qobo dae byid: ca" ra".
Lapa Qe: Mau"
3 Byu shid' yaug wa jho" qhug' nae" qhid' mae" maqham: to: lo: daga" za: gyaung: lhaung" su" i?
4 Khang khyi wa seyo mae zo: sho: dadau: re: mamyao: to: lo: lhaung" kyid' ra" i?
Khang khyi nau" wa yao" khang khyi khyaung mae daja: ja: re mathe' taung" to: lo: lhaung" myang: i?
5 Lha" mae nhozo mate' to: re ngho' li" gai: myi" ra" i?
Daja ja" yang mazai" phag' ke' re lha" wa gai: bag: lo" nae" i?
6 Vogaung: byu qere magyaug: din: nhao lo: vomo" khug mae gye poe labo" lhaung" mad: ke' ako" i?
Asang: yang manhao: ke' re vomo" mae qug: khai: kyi" khyag' qo" joe" li" nae" i?
7 Qam: so' bo: thao" ra" kho:kham Asang wa yao" daui nhao o: kaung lapa jham re yao" myid: yaung: to" ru maqhu" byid: lo: daja: ja: lhaung" kad' thug' ke' ra" i?
8 Khang khyi kyid' ke' re magyaug khag' na nae" i?-
Qam: so' bo: thao" ra" kho:kham Asang jau: ke' re yao" mungdao: re mata" hau" kyo: lo: khag' qo" jao" na nae" i?
Samari Jeim" Lo" Ra" Khyo
9 Egutu we' Ashdod kho:kham yham mae na mo, re ta" hau" kyo: wa,- Samari bam khaung: mae phaung: ham mung: aimae abyo, asin: mung: jo; ru we' yug: qobo mau" jham shad' lhoe" na: rure qu" ge,.
10 Asang wa- Ce: byumyu" qe wa yug: mau" we' aqan alan mau" khyo" lhad' yu: ra" ruyang yao: bam: yham mo" jham mae ke' pyang" to" ako". Yao: bam wa khoru: din:man: nae" ru lhao" re: maba ngad: ako".
11 Aimung:- gyevo daboe: wa yao: bam: mug: re li" lhang" kham" to: mung: yao: bam: gyelham jao: jham re phyo' qheim" pye' ru we' yao: bam: yham mo" jham re paui: yu: pye' byid' li" genae"- ga: ta" ra".
12 Asang wa- yao zaung" yaug wa khang khyi: yang zo" tang" to" ra" yao khyid shid' khyid we' nokhye' dalam: za: dam: qo" yu: ru we' dakhyo:- ana" au: langa: bo: ra" jaung: jham mae lang" jo; ra". Samari byu qemae" dajhid' za: mashid na dang: li" genae".
13 Ana" tae" gyo: mung:- Yaku nho: myid:zo: qere ta" peim: wa,- ga: qam: so' bo: thao" ra" Asang ta" ra".
14 Israel byumyu" qere yao: bam yao" nho: qobo jham: mathao mae ngo qobo dae byid' ra" ba na re Bethela mae" phan jham re ngo phyo' qheim" pye' nae". Phan khao: ngo" mae" akhyug jham wa gyug' lo" mung: myidgaung khyo gyoe; gyo" lo" li" genae".
15 Gyo, yo, laung" ra" yham jham we' xaung: gaung laung yo, laung" ra" yham jham re ngo phyo' qheim" pye' byid: nae". Xao zaui: jham: yang qu" yaung" taung" shaung: yhaung" to" ra" yham jham wa gyoe; gyo" byaug mung: yham qi: jham yham khao: ngo" re phyo' qheim" pye' ru qhug' li" genae"- ga: ta" ra".