5
Nhag' Lam: Tha" Nae" Qhid' Mae" Khai: Ru
1 Israel byumyu" qe we"- naonhaung" qhid' mae" ngo- yao" kyo" ra" ce: sushid: ngug ji: re tae" gyo: ge,-
2 Israel zomyi: gyang" wa gyo" seim" byaug va"
khonhae" re: madam: to" ye; li" lo nae".
Yao: wa myidgaung mae shapye' lhang" to" ru qhug' ava".
Yao: re khag' yang re: matau: to' yu ngad: ako".
3 Qam: so' bo: thao" ra" kho:kham Asang wa- Israel vogaung: mo" davo mae" gyezo: dataung nhao: ke' re dayo yaug za adam: tug' lo: ako". Gatau: vomo" davo mae" dayo yaug nhao: ke' re daxe: yaug za: dam: tug' lo: ako"- ga: ta" ra".
4 Asang wa Israel byumyu" qere- Ngo jhao" lo geri:- aire naonhaung" daui: na: li" genae".
5 Ai: caung:pa" nae" qhid' mae" Bersheba khyo daye: ge,. Ngo re Bethela mae daqho ge, Bethela wa baui" byaug: li" nae". Gilgala khyo daye: ge,- yao" vobyu qe wa gamang: khyo pyaung" jhui" lo" ca" nae" nhang: kheim: zao" ako".
6 Asang jhao" ye: ge,- aire naonhaung" daui: na: li" genae". Naonhaung" maye: ko" re wa Israel byumyu" qe: dao mae yao: wa myi: we' dakhyo: gyo" zag: lo: li" nae". Ai: myi: wa Bethela mae" byu qere nga" pye' mung: khag' yang re: ai: myi: re maqo" se' pye' genae".
7 Tarha" din:nyang: rure nai: sham" pye' mung: mung" byu qere yao: bam: akho: akhang" re mhug' pyag' zo" ra" mo, we"- naonhaung" wa byuxa: voqoe, qhug' genae".
8 Asang wa kyi jham re kad' to" ra"-
Cad' Myhung we' Bo" Myhung re kad' to" ra". Yao: wa myi" mug: cad' re na" bo" bao boe" nhao mung:-
na" re myi" boe" byaug nhao: ra".
Yao: wa panglai: qid re khai: yu mung:-
myidgaung dao mae vhe' sheim" ra".
Yao" mang wa Asang ngad: ra".
9 Yao: wa qam: so' qi: mo, we' yao: bam: gyevha zaung jham re byo; qeim: lo" nhao: ra".
10 Byu naonhaung" wa- matarha" ra" mau" re kad' ra" mo, re ngag: thaug' pyi qho mo, we' tarha" rung" mae jo: ra" dao: re ta" ra" mo, yaug khao: ngo" re nghang" ako".
11 Naonhaung" wa myaung mo, re deim" zag zo: mung: yao: bam: gaug zo re lhad' yu: ako". Airumung: yang: naonhaung" wa naonhaung" zhaug' to" ra" laug yham gai jham mae maqhug' na genae". Naonhaung" qho" ra" gai lho" ra" sabyi khyae mae" sabyi qhang: re maqhug' shaug' genae".
12 Naonhaung" nho: qobo khoqhi" dae xo: rure ngo ba: naonhaung" yug: mau" khanho" kad' to" rure: ngo ba:- naonhaung" wa byugai qere yhin" mung: khug vag: yu: zo" ru we' myaung mo, re tarha" rung" mae yao: bam qo" yu: ang: ra" tarha" din: nyang ra" khyo maqo" yu nae" khyo" kham" pye' ako".
13 Aimung: airu" ra" magai makhyang" ra" ayo, re mazug lo: sae: za: tae" jo; ru wa qag ra" lo,mau" ngad: ra".
14 Naonhaung" qo" daui: na genae" qhid' mae" makhyang" rure to" pye' mung: gai: ru kad' nae" qhid' mae" myid: qang: to: ge,. Aire qam: so' bo: thao" ra" Mao"So Asang wa naonhaung" ta" ru we' dakhyo: dang za: ngonhaung" we' daga" na: li" nae".
15 Makhyang: mashab: rure nghang: mung: jo: rure jhid'de; wa,- aimung: tarha" rung" mae tarha" din:man" ra" khyo: boe" nhao wa,- Asang wa ce: byumyu" mae" mashid na: dang: gyo" mo, re nhag' khyag' yu: li" maba.
16 Aimung: Qam: so' bo: thao" ra" Asang wa vomo" jham mae" hau" mo" khyo jham mae kaug' ngug thoe the' gyo: nae". Ngaui byid: mung: khai: to" ra" ngug mo, we' daga" yo kad' zo: mo, re lhao" re: shid poe mae bongug: nhao: li" genae".
17 sabyi khyae alhab' mae kaug' ngug thoe byang" jo, nae" ngoyang naonhaung" re qobo dae byid: nae" rumung: ceru alhab' boe" lo: li" nae"- ga: Asang ta" ra".
18 Asang: ba na re myid: lao" na mo, naonhaung" qhid' mae" khoqhi" byuxa: voqoe, ngad nae" i? Ai: ba na wa naonhaung" qhid' mae" pe" akyu" bo nae" i? Airu wa naonhaung" qhid' mae" mug: bo" mangad: mug: cad' ngad: li" nae".
19 Ai: ba na wa naonhaung" qhid' mae" khang khyi re gyaug yang: phao yaug vae we' qhug' ru we' dakhyo: ngad: li" nae". Mangad: lao" yham khyo phao: lo yaug khinqae mae lozaui" ke' re lhao maui: yang lham: thoe: qhug' yaug we' dakhyo: mung nae".
20 Asang: ba na wa mug: bo" mangad: mug: cad' re cijoe" lo: li" nae". Ai: ba na wa bo" bao dajhid' re: majo; ra" mug: cad' ba ngad: li" nae".
21 Asang wa- Naonhaung" nho: caung:pa" thung" poe jham re ngo nghang" ra". Aijham re dajhid' re: manug: qu".
22 Naonhaung" wa ngo jhao" phad' nghaui" xeim: we' gaug zo xeim: cili" ko" re ngo malham: yu byid: nae". Ngo re qhaug' byid: nae" ga: myhaug' to" ra" gug'nyhug' jham rere: ngo malham: yu byid: nae".
23 Naonhaung" nho: nopaug' nojhid' nghaui" caung: jham re thang: pye' ge,- naonhaung" tang: thoe jham re ngo manug: gyo:-
24 Ai: atha" tarha" din:man" rure qid zo: gyaung: we' dakhyo: yug nhao mung:- dang: man" rure khonhae" re: makin" ra" qid gyaung: mo" we' dakhyo: yug nhao ge,.
25 Israel byumyu" qe we"- ngo naonhaung" re din"pyad' mug: khyo" zin lam: byid xe jhui" lo: au: re ngaui" xeim: we' xeim: re ngo mamho' lo:-
26 Ngadqere: ana" wa- naonhaung" nho: so kho:kham Sakkud we' naonhaung" nho: kyi so Kaivan khyao dau solho caung:pa" geyang:-
27 Damasku mae" thoeshad' khyo naonhaung" re pyaung" yu: au: re ai: khyao dau solho jham re naonhaung" dao ca" li" genae"- ga: qam: so' bo: thao" ra" Mao"So ga: mang: ra" Asang ta" ra".