2
Moba
1 Asang wa- Moba mae" byu qe wa paug' yang: yang: qobo shad' ako". Cerumung: yao: bam re ngo dang za: qobo dae byid: nae". Yao: bam wa- Edom kho:kham qenho: shoqug: jham re myimhab boe" sho' ngha" khyo" pye' mung: maphug' makhyad' kad' ako".
2 Ngo wa Moba mug:myid re myi: khyo" byid: mung: Keriod mae" gyetab vogaung: jham re ngha" khyo" pye' nae". Gyezo: jham hug' mung: labo" mad: myhang" ke' re Moba byu jham wa gyekhe' thoe the' gyo: mung: shid: byaug genae".
3 Ngo wa Moba kho:kham zug: we' ai: mug: mae" au: jhaung qe alhab' re se' pye' nae" ga: ta" ra".
Yuda
4 Asang wa- Yuda byu qe wa paug' yang: paug' yang: qobo shad' ako". Cerumung: yao: bam re ngo dang za: qobo dae byid: nae". Yao: bam wa nga" nho: mho" shid' rure maphug' makhyad' ngad: ako". Yao: bam: phug' phyid' qe caung da" byid' lai: lo: ra" so apyag' qeyang yao: bam re jhui" nghung" lhae" pye' ako".
5 Aimung: ngo wa- Yuda dao mae myi: re khyo" ke' mung: Yerusalem mae" gyetab vogaung: jham re ngha" khyo" pye' nae"- ga: ta" ra".
Israel Re Mao"So Dao: Phyid' Nae" Khyo
6 Asang wa- Israel byu qe wa paug' yang: yang: qobo shad' ako". Yao: bam wa jhin maqo" xe' ra" din:man" ra" mo, re we' khyid zhaung: dazam" phug' ngaui jhin re lao" re maqo" xe' ra" myaung sho: mo, re- jeim khyo" aung: zo" pye' ako".
7 Yao: bam wa qam: nang: mung: pe" maqo" kad' ra" masho: majhin mo, re zab: nhae" pye' mung:- myaung mo, re khyo mae" kang" pye' ako". Yao: pho" we' yao: zo: wa jeim myhi" dayaug we' za: gaung sho: jho" qhan" zam" mung:- nga" nho: gyang" lho" ra" mang a re phoe nhao: ako".
8 Caung:pa" jo, qo khao:ngo" mae yao: bam wa myaung mo, mae" jhin kham: aso: khyo" yu: to" ra" mai bau: dao mae yab: ako". Yao: bam nho: Mao"So: caung:pa" yham mae yao: bam re jhin de, mo, mae" yu: to" ra" sabyi qang: shaug' ako".
9 Ngadqere: nga" byumyu" qe we"- Shaug' gae we' dakhyo: myhao mung: shakhai: gae we' dakhyo: gang" ra" Amori byumyu" qere ngo: yang bin sho' phyo' qheim" pye' ru wa naonhaung" mathao mae ngad: ra".
10 Ngo wa naonhaung" re Egutu mae" jhui" thug' lo mung: din"pyad' yo khyo" zin lam: byid xe jhui" lo va"- aimung: Amori byu qenho: mug:myid re naonhaung" re sang nhao va".
11 Ngo wa- Naonhaung" nho: yauggai zo: damyo" re lapa khyo" khyin: yu mung:- naonhaung" nho: zolau: damyo" re Naziri byu khyo" khyin: to: va". Israel byumyu" qe we"- Ceru wa dang: mangad: i?- ngo Asang ta" va".
12 Ngadqere: naonhaung" wa Naziri byu qere sabyi qang: shaug' nhao: mung:- lapa qere nga" mungdao: mata" genae" qhid' mae" amyin" byid' ako".
13 Aimung: ana" ngo wa naonhaung" re myid gaung khyo pye' khyoe' khyo" pye' mung: naonhaung" wa- gaug zo byang" sho' tho: ra" lhin" we' dakhyo: nokyang: kyang" li" genae".
14 Tao: qao mo, lhao" re: maqo" phao: loe, genae". Qam: bo mo, wa yao: bam: qam: gan: byaug: li" genae". Aimung: gyezo: qere: yao: bam yao" kao so' re maqo" khyad' yu: genae".
15 Lo, la: ci mo, wa yao: bam: jo, qo mae maqo" ye; jo; genae". Tao: qao mo, wa maqo" phao: loe, genae". Myao: jui: mo, yao: bam: kao so' we' maqo" phao: loe, genae".
16 Ai: ba na mae lhe" thao" ra" gyezo: qe lhao" re: yao: bam: shae lhae jham re shapye' khyo" to: co' mung: tao" phao: li" genae" Asang ta" to" va".