AMO
(AMOS)
Dao: Phung"
Jham: mugsug' mae sao qhid' lapa dao: qhang qhang za: jab byang" sho' tung" xam" to" ru wa Amo mugsug' ngad: ra". Yao: wa Yuda mung" mae" byu ngad sho' ngadqere: BC 800 zin agaung: gu: khaung: re mug: am: Israel mung" mae na mo, re lapa dao: yeta" kyo: yaug ngad: ra". Ai: ayo, wa qi: sho' na: dai mung: lalam lakhug: khyo we' sin: yang: xam: ga" sho' kao bau: ru we' yaug yo gug:gam cae: tae" taung" qo" na: ako". Ngadqere: Amo myo; yang qu" re airu: na: dai: ru wa byu damyu" qhid' mae" za: ngad: mung: myaung mo, re deim" zag zo" ruyang qo" zo" dai: na: ru ngad: ga: myao byid' ra". caung:pa" thung" we' sin: yang: adao: pyae za: ngad mung: gug:gam khyo wa gaigai: yao: boe" na: ru we' gatau tau ngad: jo; ra". Yao: wa jhid'de; sang: no: ru we' nhag' lam: mae phin" ci mung: ai: byumyu" qere Mao"So: yang qobo dae byid: nae" ga" rure yekho" kyo" ra". Yao: wa- tarha" din: nyang: rure qid gyaung: zo we' dakhyo: yug: jo; nhao: mung: na: dang: jo, shiko" ra" ce: byumyu" re Asang: yang nhag' khyag' re nhag' khyag' yu: li" maba- ga: ta" kyo" ra". (5.15)
1
1 Cejham wa Tekoa vogaung: mae" yao zaung" yaug Amo nho: dao: jham ngad: ra". Yuda mung" mae Uzia kho:kham boe" mung: Yosha nho: yao: zo: Yeroboam wa Israel mung" mae kho:kham kad' na: au: myid lab: lab nae" shid' zin ca" shi" au: re Mao"So wa Israel we' sin: yang: cegu: alhab' Amo re qhu" byid' ra".
2 Amo ta" ru wa-
Asang wa Ziun bam mae" zag: hug' ke' ra".
Yao" nho: thoe wa Yerusalem mae" thug' li" ra".
Mhin: gyo, jao: jham wa kyaug byaug' mung:
Khame bam mae" vohau: jham wa kyaug' ma" byaug: ra"- ga: ta" ra".
Israel Nho: Mug: Kyo: Cao: Qere Mao"So Dao: Kho' Byid' Ru
Suri
3 Asang wa Damasku mae" byu qe wa paug' yang: paug' yang: qobo kad' ako". Aimung: yao: bam re ngo dang za: qobo dae byid: nae". Yao: bam wa Gilead mae" byu qere se' da: be, khyad' kad' ako".
4 Aimung: ngo wa- Hazae kho:kham: yang zhaug' to" ra" kho:kham kho" re myi: nhao: ke' byid: nae". Benhadad kho:kham nho: gyetab vogaung: jham rere: ngo ngha" pye' byid: nae".
5 Damasku vogaung: kham: mo" jham rere: ngoyang phyo' sin" pye' byid: mung: Aven Lao: Khaung: mae" mang: byu qe we' Betheden mang: mae" zug: kho:kham re yu: pye' nae". Suri byu qe wa Kira mung" khyo kyam: byu qekhyo" jhui" yu: pye' ru qhug' genae"- ga: ta" ra".
Philisti
6 Asang wa- Gaza mae" byu qe wa paug' yang: yang: qobo shad' ako". Ceru: mung: yao: bam re ngo wa dang za: yao: bam re qobo dae byid: nae". Yao: bam wa byumyu" damyu" geim" re jhui" yu mung: Edom mung" mae" byu: lo, khyo jeim khyo" aung: byid' pye' qhug' ako".
7 Aimung: ngo wa- Gaza vogaung: vang re myi" yang phyo' qheim" pye' nhao mung: yao" nho: gyetab vogaung: jham re ngha" khyo" pye' nae".
8 Ngo wa- Ashdod we' Ashkelon jham mae" zug: kho:kham jham re yu: pye' nae". Ekron vogaung: mo" re ngo: yang qobo dae byid: nae". Aimung: na: dang: jo; ra" Philisti byu alhab' mo, wa shid: li" genae"- ga: ta" ra".
Ture
9 Asang wa- Ture vobyu qe wa paug' yang: yang: qobo shad' ako". Ceru: mung: yao: bam re ngo dang za: qobo dae byid: nae". Yao: bam wa byu damyu" geim" re taung" yu mung: Edom mung" mae lo" pyaung" nha: to" ako". Airumung: yao: bam to" ra" myid vang" thao: ce' re macao" ngad: ako".
10 Aimung: ngo wa- Ture vogaung: vang jham re myi" khyo" ke' byid: mung: yao" nho: gyetab vogaung: jham re ngha" khyo" pye' nae"- ga: ta" ra".
Edom
11 Asang wa Edom mae" byu qe wa paug' yang: yang: qobo shad' ako". Cerumung: ngo wa yao: bam re ngo dang za: yao: qobo dae byid: nae". Yao: bam wa yao: bam: mao:nhaung: Israel qere khe' zin: mung: yao: bam re nhag' khyag' myid maqhu" byid: ngad: ako". Yao: bam nhag' yo" ru wa thao" ga" ru majo, aimung: khonhae" re: nhag' mashid qad ngad: ako".
12 Ngo wa- Teman vogaung: dao mae myi: khyo" ke' mung: Bozra nho: gyetab vogaung: jham re ngha" khyo" pye' nae"- ga: ta" ra".
Amon
13 Asang wa- Amon byu qe wa paug' yang: yang: qobo shad' ako". Ceru: mung: yao: bam re dang za: ngo qobo dae byid: nae". Yao: bam wa mug:myid cae" yu nae" qhid' mae" gye khe' mung: Gilead mae" gaung la" ra" myiqe: qenho: vae: dug: jham re lhai" kho' pye' ako".
14 Aimung: ngo wa- Raba vogaung: mo" vang re myi" yang phyo' pye' mung: yao: bam: gyetab vogaung: jham re ngha" khyo" pye' nae". Aimung: gye khe' ra" ba na mae" hug' thoe thug' mung: la qam" ru" ru mang: zin: thoe myang: li" li" nae".
15 Kho:kham we' yao" nho: zug: ade, qe wa gamang: khyo zaug byaung" phao: lo" ca" genae"- ga: ta" ra".