3
Mao"So Wa Byumyu" Jham Re Dao: Kho' Nae" Khyo
1 Asang wa-
ai ra" ayo, mae ngo wa Yuda we' Yerusalem re dam: na: dai nhao nae".
2 Ngo wa byumyu" alhab' re khai: zhang: mung: Dao: Kho' Lao: Khaung: khyo yao: bam re jhui" ye: nae".
Aimae yao: bam re yao: bam: yang nga" byumyu" qere kad' lai: lo: ra" mau" alhab' qhid' mae" ngo dao: kho' byid: nae".
Yao: bam wa Israel byumyu" qere taung bug: mang: jham khyo khe' sin" pye' mung:
nga" nho: mug: myid Israel mung" re agao gao kho' pye' byid' ako".
3 Yao: bam wa pha" ce' khyo" mung: the' taung" to" ra" byu qere khag' sang nae" ru boe, phyid' qu" ako".
Yao: bam wa shava myhi" we' sabyi qang: qhid' mae" ngaui byid: ca" rumung: yauggai nau" qe we' myiqe: nau" qere aung: zo" ako".
4 Ture- Sidon we' Philisti mang: mae" alhab' mo, we"- naonhaung" wa ngo re pe" kad' nae" seim" na ko" i? Naonhaung" wa daja: ja" ra" atha" ngo re dam: tug' byid: nae" seim" na ko" i? Naonhaung" airu: kad' ko" ngad: re ngo wa naonhaung" re phyad za: dam: tug' xe' nae".
5 Naonhaung" wa nga" ngaui we' nga" qhang re yu pye' mung: nga" zai kug jo,nho" myo" sho' re naonhaung" nho: Caung:pa" Yham khyo tai: lo" ako".
6 Naonhaung" wa Yuda we' Yerusalem mae" byu qere yao: bam: mug: mae" va: khyo taung" ci: lo" mung: Greeg byu qere aung: zo" pye' ako".
7 Ana" ngo wa ngonhaung" yang yao: bam re aung" ke' ra" jo, qo jham mae" yao: bam re dam: jhui" yu nae" naonhaung" yang yao: bam re kad' vako" ru we' dakhyo: ngo naonhaung" re kad' nae".
8 Ngo wa naonhaung" nho: yauggai zo: we' myiqe: zo: jham re Yuda byu qejhao" aung: zo" pye' byid: nae". Yao: bam wa Sheba byu qejhao" dam: kai" aung: zo" pye' genae" ngo Asang ta" to: va".
9 Byumyu" qenho: phaung gaung: mae ceru: ta" hau" kyo: byid: ge,.
Gyekhe' mang: zin: nae" qhid' mae" seim" ge,.
Naonhaung" nho: gyezo: alhab' re zhang: mung: thug' ye: ge,.
10 Naonhaung" nho: kheim jham re shae pyang: be; pye' ca: ra".
Shae nghoe: jham re lhae tad' kad' pye' ge,.
Qam: nang: mo, alhab' re: gyekhe' ca" genae".
11 Avai: ayae mae" byumyu" qe we" phyad phyad hin hin za: li" mung:
ai: lao: khaung: mae li" zang" ham: na ge,.
Asang we"- yao: bam re khe' zin: nae" qhid' mae" ni" gyetab re nhao: khyo" ke' wa,.
12 Byumyu" qe wa seim" jin" mung: dao: kho' ra" lao: khaung: khyo li" ca" va".
Ai: jo, qo mae ngo Asang wa zaung: jo, mung:
avai: ayae mae" byumyu" alhab' re dao: kho' nae".
13 Yao: bam wa nhag' lam: kaui mung: gyai makhyang: mashab ngad: ako".
Gaug yad yo, mae" gaug re we' dakhyo: yao: bam re yad: pye' wa,.
sabyi nao: jao: mae byang" jo; ra" sabyi re sabyi qang: byang" sheim: lo" sho' pyag' nao" ru we' dakhyo: yao: bam re nhai" khyoe' pye' byid: wa,.
14 Dao: Kho' Lao: Khaung: mae byu ataung atug na: bam: ako".
Aimae Asang: nho: ba na khomyhao" mamyao" re joe" li" nae".
15 Ba we' lho" wa sham: no; byaug mung: kyi jham wa mabao lo: genae".
Mao"So wa yao" byumyu" re shaman" byid: nae".
Yao" Byumyu" Re Mao"So Shaman" Byid' Li" Nae"
16 Asang wa Ziun bam mae" zag: hug' mung:
yao" nho: thoe wa Yerusalem mae" mug: gyug: ru: myang: li" ra". Mug: we' myid wa ko, ko, nin" ako". Ngadqere: yao: wa yao" amyu" byu qere gug: gam byid' li" nae".
17 Ailao" Israel we"- ngo wa ni" nho: Mao"So Asang ngad: rure nao ba: li" nae".
Ngo wa nga" gyang" lho" bug gaung Ziun mae na: ra". Yerusalem wa gyang" lho" ra" vomo" ngad: li" nae".
Taung bug byu qe wa aire khonhae" madam: aung: yu lo: genae".
18 Ai: ayo, mae bam jham wa sabyi khyae byang" jo; li" genae".
Bug gaung khao: ngo" mae nung: jham na qo myao nae".
Yuda mung" mae" qid zo: gyaung: jham mae qid byang" sheim: jo, li" genae".
Asang: nho: Caung:pa" Yham mae" qid zo: gyaung: dagyaung: yug: thug' li" mung:
ai wa Akakia lao: khaung: re dag nhao: li" nae".
19 Egutu wa din"pyad' yo boe" mung: Edom wa mug: gao: boe" byaug nae".
Pe"mung:ga"re yao: bam wa Yuda mug: myid re gye zin: mung: aimae" qobo maqo" ra" vobyu qere se' pye' ako".
20-21 Se' pye' qhug' ra" mo; nho: xao au: atha" ngo wa yao: bam re lage, phaug' byid: nae".
Qobo qo" mo, re ngo matang" to: nae".
Ngadqere: Yuda we' Yerusalem kam" wa apyad ato mae byu na: li" genae".
Aimung: ngo Asang wa Ziun bam dao mae na: jo; li" nae"- ga: ta" ra".