9
1 Hau: thang: ri wim: yug ein: wa yug- moug: lagyoo: gi laboo" doem moid kaid lang" mougkhung: mo wigi myidjang tho' khyoo:- kyi: zeing dacab, shu: gyo" jo, bye: ziri ngoo myang- Hau: kyi: ri no, athang da" dung: khuang" mo khoem" thoug" ri ab, byid: to".
2 Hau: kyi: gi no, athang da" duang: khuang" ri phang kaid uri myi khoug" gi myikhyoem moo" zeing mo thu lo da" myikhoug" yhang: te" da" zi hau: duang: khuang" khoug: mo neung" thu' lo nyid Hau: myikhoug" zoo" yoomo bid yo' mouglaid mougkhung: gi ceug, yo' no, loo" khari" bye:.
3 Hau: myikhoug" khoug: mo jhen" khyeig joem gi myidjang tho' moo gyo" lo- nyangnu" moo gung goug" joem, da" dug, yhang: te" zi bo boem.
4 Houg: bang: gi seiggam voogam, joem yo' gootu: mhain" nyoug, pho nyoug, joem ri ze" shoin wa da" amyeung" ayoo". Ngeilang: moo Mangso byu yi da" dazid' adab bang: ri za: yo" shen" yhen kyikhyeig byid: wa da" amyeung" yo" boem.
5 Hau: mungbyu yi ri yo" said pyam wa da" amyeung" we' ajo. Lhammoo" wim: khyab, za: yo" shen" yhen nyid wa da" amyeung" yo". Hau: jhen" khyeug shau" ngaid' mo, gi gunggau" paid' da" dug, yhang: ti" gye" khe" no nyid boem wa zi nghoid.
6 Hau: lhammoo" wim: khyab, da" ayo, gu: moo nyangnu" gi shid: khyoo: sho: nyid boem wa zi nghoid- nghoid loug we' shau" sho: boem wa zi anghoid. Nyangnu" gi gye" shid: nau boem nghoid loug we' shid: zoug: gi nyangnu" ri phang: lhei" too" khari" wa zi nghoid.
7 Hau:jhen" khyeig joem gi gyi pui" vang wa ga soin' shab to" da" myang: joem yo' du nyid. Nyangnu" da" vhuloem moo sheing: bidmug, zhoung" ci: boem ziri ngoo myang Hau: lho: nyangnu" da" myonhoo: gi byu da" myonhoo: yo' du nyid boem.
8 Nyangnu" da" xam: gi myiyi: zoo yi da" xam: yo' du nyid nyangnu" da" zei joem gi khang' khyi zei yo' du nyid ago".
9 Nyangnu" da" yang gang moo gi joto' yo' du da" yang gang nghoeb ri zheung: nghoeb ci- hau: lho: nyangnu" da" dung joem fe: myheung da" thui: gi gyipui" vang wa koin" gei yhe: lo" da" myang: rheing" myoo" sho' loem: myeung da" thui: yo' du nyid.
10 Nyangnu" da" shoo" myi: gi gung gau" shoo" myi: yo' du nyid boem wigi dug, bo nyid. Nyangnu" da" shoomyi: gi byumyu" yiri lhammoo" wim: khyab, ju" sho' paid' wa da" yoem: bo nyid.
11 Nyangnu" ri vhoeb khang" nyid da" Khokham" gi no, athang da" duang: khuang" mo lagyoo: nghoid. Nya: da" myeing gi Hebre myeing" khyo" Abadon ga: Heleni myeing" gi Apolion nghoid. ( Hau: da" dangkang: gi( Lhu: phyo' su:) ga: zi nghoid.
12 Xang: shed" mo gyoug, pho" joem: thang lo" khyoo: gi lid loo bye:. Hau: thang: ri ju" loo shi" wa da" gyoug dain' noem eig ja: jo, ashi".
13 Hau: thang: ri khyug yug ein: da" moug: lagyoo: gi nya: laboo" ri moid kaid. Mangso shidkhoin" moo jo, da" sheing: xoin" to' phoin: myid: jhoin: mo thu' lo da" thui: ri ngoo shau" gyo.
14 Hau: da" thui: gi khyug yug ein: da" moug: lagyoo: ri Uphrad gyid moo" lang' moo tei" to" da" moug: lagyoo: myid: yug ri phoid: kaid we"- ga: tid.
15 Houg: su" phoid: kaid zi shau" da" moug: lagyoo: myid: yug gi tei" to" jangmo loid byoin, lo" ago". Nyangnu" gi hau: ayo, hau: bidnyid, hau: lhoo, khyab, hau: zain nyid moo mougmyid xangsu: byu yi dangain"- soem" boem mo daboem ri said pyam wa shid re" jen" jen" soin' too" shau" mo, nghoid ago".
16 Myang: zhoung: da" gyiphung yigi Vain, eig shoo: nghoid- ga: ziri ngoo shau" gyo.
17 Hau: lho: nga" da" yoeb, myang moo ngoo myang zigi myang: joem yo' houg: moo zhung: bang: ri myang. Nyangnu" gi myi: yhang: ti" byang: byang: ne da" yang gang nghoeb, yo' Nila nyoug, yang gang nghoeb yo' fang yhang: ti" shui: da" yang gang nghoeb joem ri nghoeb, ci: ago". Myang: joem da" vhuloem, gi khang khyi vhuloem, yo' du lho: nyangnu" da" nhoid khoug: mo myiyham: myikhoug" yo' fang nge" thu' lo nyid.
18 Myang: nhoid khoug: mo thu' re" da" myiyham: myikhoug" fang myi:- hid: shen" yhen khyoo: soem" ja: khyo" wigi mougmyid byu yi soem" boem mo daboem gu: ri bain said pyam bye:.
19 Myang: joem da" yoemso gi nyangnu" da" nhoid khoug: yo' shoo" myi: moo bo- nyangnu" da" shoomyi: gi lhangmyu, joem yo' du lho: vhuloem dab boem wigi xangsu: byu yi: ri hau: ziyo' thei" ago".
20 He: da" shidgyoin mo deung nyid mo, gi nyangnu" koid da" lo, moozoo" mo nheigloem: athid lo boem shi" nghoid ago". Nyangnu" gi yu joem ri we' myo, we' amyang nu: we' agyoo: ayo" so" yen" da" sheing: gyid: lugboem seig thung" yo' koid to" da" yu phara" soolhoo joem ri anoo: loo: dano' nyid boem ashi" go".
21 Nyangnu" gi byu said ziri we' main: tain: khyau" khyoo: ri we' aved avhu: koid khyoo: yo' khau" da" moozoo" mo we' nyangnu" nheigloem: athid lo boem.