10
1 Hau: thang: ri yoem: moo" bo da" moug: lagyoo: gootu: dayug gi mougkhung::mo gyoo" lo ziri ngoo myang- Nyang: ri jhoem" moug" thoeb, to" lho: nya: da" vhuloem lheing khab, moo seing: yhang: lheungkhoem to". Nya: da" myonhoo: gi bid yo' du lho: nya: da" khyid: gi myi zeingboung: joem ti" du nyid.
2 Nyang: gi nya: da" lo, khoug: moo phang to" da" mougsoug" deing: nu" ri ci: to" nya: lo, yo khyid: gi panglai: tho' moo lo, koung" khyid: gi tung: gung tho' moo nang: yab, jo, lho:
3 Khang' khyi myeung yhang: ti" nyang: gi thui: zeing yo' nyho: thu' kaid. Nyang: houg: su" ga: nyho: thu' kaid da" thang: ri moug: goem: thui: nyhed, loem: yo' phug tu" myeung thu lo.
4 Houg: lang" moug: goem: thui: mo tid nyid da" dang: khoin" ri ngoo lhid" xoem" too" wa ein: soin' nyid uri mougkhung: mo tid thu' lo da" thui: gi alhid" xoem" too"- moug: goem: thui: nyhed loem: mo da" dang: gi zau" too" we' ga: tid ziri ngoo shau" gyo.
5 Hau: thang: ri panglai: yo' tung: gung moo nang: yab jo, da" moug: lagyoo: gi nya: da" lo, yo lo, ri mougkhung: khyoo: tu: kaid lho:
6 Apyaid' atoo: moo dadei nyid lho: mougkhung:' yo' myid jang- panglai: yo' ziyoo jo, moojo, ri phain" to" da" Aseing ri nghe: lho: jham tang: yu zigi myang" loo: wa zi anghoid.
7 Nghoid loug we' nyhed yug ein: da" moug: lagyoo:- nya: laboo" moid kaid thang: ri Mangsoo gi nya: lapi: deizoo: yi ri tid fu" nhang: bye:ziyo' dakhyoo" ti" nya: no, thang da: khyoo: joem ri joeb, byeung" loo nhang: wa zi nghoid nyid,, ga: tid.
8 Mougkhung: mo ngoo ri doem tid thu' lo da" thui: gi ngoo shau" gyo- Yhi: we' panglai: yo' tung: gung moo nang: yab, jo, da" moug: lagyo: lo, mo phang to" da" mougsoug" deing: nu" ri yu we',, ga: tid.
9 Houg: yoomo ngoo gi hau: moug: lagyo: jhang khyoo: yhe: lho: mougsoug" deing: nu" ngoo ri byid: wa shid re" mho'- Nyang: ngoo ri tid zigi He: mougsoug" deing: nu" ri yu lho: zoo: we' re" voemdoug: moo kyid: kyid: yo' kho" loo" wa nghoid loug we' re" da" nhoid khoug: moo gi byooyhid: yhang: ti" mheing" mheing" cau: loo wa zi nghoid ga: tid.
10 Ngoo gi nya: lo, mo moug: soug" deing: nu" ri yu lho: zo: kaid lang" nga" nhoid moo mheing" mheing" cau:- nghoid loug we' ngoo hau: ziri myhau: kaid lang" gi nga" voemdoug: khoug: moo kyid: kyid: kho" lo.
11 Hau: thang: moo ngoo ri tid zigi Nang gi mungdain: myoo" sho' byumyu" aja: ja:- Khokham" yi yo' sen: da" Mangso mungdang: ri dalheung: doem tid fu" we',, ga: tid.