COUNG" NGHEI 91
1 Goem loem byid: khyoo: shoug" yu wa shid re"
Aseing jhang ju" ri bang: hang" nghoid loug we'
gyi: myhang da" goem loem byid: su:
akhoug: moo shoug" khau: nghe: nyid su: nghoid bye:.
2 Nang gi nga" da" yoem yu joyoo yo'
ngoo ri lhoug zung" goem coung: byid: su: nghoid-
nang gi nga" Mangsoo nghoid.
3 Nyang: gi ayo" myang da-
gyoug pho" shid: gyoin' joem yo' yo" shid: loo" nhang: da-
noo phyoo" dangain" jang mo
nang ri gau: nyu: sho' goem loem khyoo: ri yo" byid: zi nghoid.
4 Nyang: gi nang ri nya: dung soo" joem yo'
yo" nghoeb shoung: ci: wa zi nghoid.
Nya: da" yu" goin' yu" coung: jang" moo
nang gau: nyu: nyid wa zi nghoid.
Nya: da" nheigloem: zung" da" khyoo: joem gi
nang ri goem loem lhoug zung" byid: nyid wa zi nghoid.
5 Myen" moo: bue" loo se' da" khayhang: te"
gyoug pho" shid: gyoin' ri nghoid loug we'
nyid" gung moo: bue" lo da" nyeigdain tung" gyi zain: go" khyoo: ri nghoid loug we' nang gyoug anoo.
6 Xo' lho: wigi moug: coid moo: bue" lo da"
noobau: phyoobau: ri nghoid loug we'
nyid" khyoug ri akhyeing" ashoeb bang:
khaid said loo nghoid loug we' nang gyoug anoo.
7 Re" da" gung yam moo: byu dakhyeing"
re" da" ayam aqei: moo damoin" shid: leung jo, nghoid loug we'
nang moo: noo shoug" wa zi anghoid.
8 Akhyeing" bang: gi khayhang: te" da" shid: gyoin'
thoung" shoug" nyid ziri nang myang wa zi nghoid.
9 Nang gi Aseing ri re" da" lhoug zung" joyoo yo'
myhang: thang da" phoo ri
re" da" goem loem su: khyo" nang koid nyid abye:.
10 Xo' lho: nyeigdain tung" da" shid: gyoin' noogyoin' ri
nang thoung" shoug" wa zi anghoid.
Lhoid zoo: phyo' zo: lo" da" athoug" akhyoug: khyoo: we'
re" yhoem: moo: jhang loo wa zi anghoid.
11 Nang so" lo" da" joyoo khyi khang" moo" moo
nang ri cang lhoug zung" yen" wa ziyo'
nang ri goem loem byid: wa shid re"
Mangsoo gi nya: moug: lagyoo: yiri nhang: kaid wa zi nghoid.
12 Lug boem joem moo: re" khyid: alo" thoung" nho: baja" ga:
nyangnu" da" lo, joem yo' nang ri vu, yu wa zi nghoid.
13 Akhyeung" da" khangkhyi joem yo' dug bo lhangmyu joem da" atho' moo
nang yo" nang: gu: lid loo" wa zi nghoid.
khangkhyi nu" joem yo' lhangmyu joem ri
re" khyid: yo' yo" nang: pye" pyam wa zi nghoid.
14 Mangsoo gi ngoo ri jheddab bang: ri ngoo khyoid yu wa.
Ngoo ri Aseing ga: yhen: yu bang: ri ngoo goem loem byid: wa zi nghoid.
15 Nyangnu" ngoo ri yoid lang- ngoo nyangnu" ri tu" byid: wa nghoid.
Nyangnu" yau: khe" khyoo: shoug" nyid uri
ngoo nyangnu" yo' dage" nyid nyid wa nghoid.
Ngoo nyangnu" ri khyi yu lho:
tu: to' coung" nghei byid: wa nghoid.
16 Ngoo gi nyangnu" ri kang: sheing: nhang: wa nghoid.
ngoo nyangnu" ri khyoid yu wa nghoid ga: tid nyid.