COUNG" NGHEI 92
(Labain nyid" mo jikhoin" daloem)
1 Aseing we" nang ri jeju" boin: khyoo: gi gye" ge nyid
myhang: thang da" Mangsoo we"-
re" da" myonhoo: phung" yoeb shid re"
coung" nghei jihkoin" khoin" lho:
2-3 thui: pyo: da" teing tei" tab, to" da" teing shi: yo'
yhang: thui: myheing thui: joem yo' nab khang" moo"
re" da" geung: teung jhed khyeing: kang: khyeing: ri nghoid loug we'
myen khang" moo" re" da" nheigloem: zung" khyoo: ri nghoid loug we'
tid kyo" nyid da" khyoo: gi khayhi' gyeing" ge zi nghoid lha".
4 Aseing we" re" da" mau pho" moo" zoo" joem gi
ngoo ri gau yi ngei pyoo: nhang: nyid.
Nang koid too" bye: moo" zoo" joem yoomo
ngoo gau yi jihkoin" ri khoin" nyid.
5 Aseing we" re" da" moo" zoo" joem gi khayhi' gyeing" gyi: sheung: jo, nhung.
Nang myid soin: khyoo: gi khayhi' no, jo, lha".
6 Akoo" adau: su: gi ase' gyo: ziyo'
phajhi" aboo su: amyed ju" da" khyoo: daja: jo, jo,.
7 Akhyeung bang: gi vufu" myo, su" te: youg jo, wigi
shoid vhang: moo" ri zei: lho: nyid ge nyid de, lo boem nghoid loug we'
Nyangnu" dangain" gi bain sho' jhoid
lhu: shoin' byo, yoin" pyam zi shau" boem wa nghoid.
8 Khasu" wim gari Aseing we" nang koem gi
apyaid atoo: moo myhang: thang su: nyang: nghoid nyid da:.
9 Re" gyivoo joem dangain" gi shid: doem: lo" boem wa ziyo'
akhyeing" ashoeb bang: dangain" we'
soem" joem: lo" byoug boem wa ziri ngoonu" se' nyid boem.
10 Nang gi ngoo ri nulam" ri yhang: ti" yoem foin' byid: wigi
ngoo ri gau yi ziyo' nang mainkaid byid: nyid.
11 Nga" gyivoo joem gi soem" joem: gyo" lo" boem ziri
ngoo nyang: shau" myang bye: ziyo'
akhyeung" bang: da" yoid, ngau, thui: ri shoug" gyoo: bye:.
12 Deung byeung" da" byu yigi labam gam su" ko' lo, lam: lo wigi
Lebanon boem mo shamu gam joem su"
nyangnu" gi youg gyi: lo boem wa zi nghoid.
13 Houg: bang: gi Aseing da" yhoem: moo: sho" to" wigi yha" da"
Mangso Noku Yhoem: Moo" moo nyau young da"
seig joem: gam joem yo' du nyid boem ago".
14 Hau: seiggam' joem gi mang: lo" ayo, moo: lang"
ashi" zei: nyid shi" wigi khanham we' nyau, young" lho: yeing" jo.
15 Ngoo ri: goem loem byid: nyid da" Aseing gi deungmain" su: nghoid nyid wigi
nyang: moo: shoid vhang: khyoo: ci" we' abo ziri toin" shed nyid.