COUNG" NGHEI 90
MOUGSOUG" MYID: PUG
1 Aseing we" nang gi khanham we'
ngoonu" da" khoug: loo joyoo yo' yhoem: nghoid nyid.
2 Boem joem ri aphain" so: too" shi" ziyo'
mougmyid yoosoo" ri amyhu: too' shi" mo wigi
nang gi pyaid mo too: mo Mangsoo nghoid.
3 Nang gi mougmyid byu yiri
myidzhoo" phei" doem bue" loo" nhang: wigi
Nyangnu" ri akhang joyoo khyoo:
doem tau" loo" loo: ge' ga: nang tid nyid.
4 Re" shidkhoin" moo zain void dakhyeing" ga: zigi
danyid" ti" te: nghoid nyid wigi
hau: zigi lid lo" byug bye:-
anyid" nab bidnyid yo' leung" da" myen" ayo, yhang: te" nghoid nyid.
5 Nang gi ngoonu" ri gyid khyoid su" khyoid she: lo" byoug wigi
ngoonu" gi yhoeb mo, yi, lang" amyang
daso, kyeing" nghoid da" vufu" myo, yhang: ti" za: date: nghoid nyid.
Dakhyo" ein: rigi ngoonu" gi nab kyoo' ri anyug toid re" wigi
6 Youg gyi: lo lho: bo" young" jo, nghoid loug we'
myen" thang: ju" lang" gi kyoug lo" byoug ziyo'
shid: lo" byoug da" vufu" myo, joem yhang: ti" ngoonu" nghoid nyid boem.
7 Re" da" nheug khoo" yo: ziyo'
ngoonu" byo, yoin" zi shoug" nyid boem bye:.
Re" nheigloem: nge" loung jang" mo
ngoonu" gyoug nain" zi shoug" nyid boem bye:.
8 Nang gi ngoonu" da" yooboo joem ri
re" da" shidkhoin" moo: thoid to" wigi
ngoonu" dayhoem" to" da" joyoo moo: too" byid: nyid da:.
9 Re" nheug khoo" yo: jang" mo ngoonu" da" kangso' ri
leung loo" nhang: pyam bye:.
Hau: zigi dang: so' so' da" thui: yhang: ti"
lid moo: bei: lo" byug wa nghoid.
10 Ngoonu" da" kangso' gi nyhed xi: zain' nghoid-
ngoonu" yoem bo boem nghoid ri koem gi shed xi: zain' ju" nyid boem.
Nghoid loug we' hougsu" kangso' dei nyid da" bidnyid gu: moo
yau: khi" ziyo' koug shu: khyoo: za: kham' zo: nyid boem.
Daso, lang" apyaid we' lid lo" byoug wigi
ngoonu" gi dang: lo" byoug boem wa nghoid.
11 Yoem moo" so' moo" yo' re" da" nheug khoo" yo: khyoo: ri hang" kham' zo: nyid lha".
Re" da" nheug khoo" yo: khyoo" wigi
yo" ze" bui" nhang: da" gyoug ci' ge da" khyoo: ri kha: yug se' nyid lha".
12 Ngoonu" gi ung: yeig phajhi" se' loo wa shid re"
ngoonu" da" apyaid khayhi' gyeing" leung" da" khyoo: ngoonu" ri jhau" byid: we'.
13 Re" da" nheug khoo" yo" zigi khamyhang gyeing" myang" wa la".
Aseing we" re" dei zoo: yiri nheig khyeug shi" we' o".
14 Nab khang" moo" re" da" geung: teung jhed khyeing: kang: khyeing: yo'
ngoonu" ri joeb byeung" loo nhang: we'
houg: lang- ngoonu" da" apyaid kangso' gyung: khyoo: bain sho' moo
gau yi ziyo' nang ri coung" nghei jikhoin" yo" khoin" nyid baja".
15 Ngoonu" kyi" khyeug yau: khi" zi shoug" nyid da"
zain' nyid dangain" jang" moo
nang ngoonu" ri shoug" nhang: bye: da" kougshu: khyoo: ri
akhid" ngoonu" ri gau yi ngei pyo: khyoo: byid: we' o".
16 Re" da" dei zoo: yi ngoonu" ri
re" da" gyi: myhang: moo" zoo" ri myang nhang: we'
Ngoonu" da" nya: myid: nya: zoo: yi we'
re" myonhoo: phung" yoeb bo da"
yoem: zeing so, moo" ri shau" myang nhang: we'.
17 Ngoonu" da" Aseing Mangsoo we"-
re" da" mainkaid jeju" gi ngoonu" yo' dage" jo, jo, baja"
ngoonu" zei: nyid da" moo" zoo" jid: zoo" bain sho' moo
oung: doid lo" khyoo: ngoonu" ri byid: we' o".