COUNG" NGHEI 89
1 Aseing we" re" da" athang agoin jhed khyeing: kang: khyeing: ri
ngoo khanham we' jihkoin" dakhoin" nyid wa.
Re" da" zung" nheigloem: ri ngoo pyaid moo: too: moo: tid kyo" nyid wa.
2 Re" da" jheddab khyoo: gi pyaid didu moo: geung: jo, wa ziyo' re" da" zung" nheigloem: we'
mougkhung: mougdi yhang: ti" geung: jo, ziri ngoo se' nyid.
3 nang tid to" zigi" ngoo khyen: too" su: yo' ngoo dang: theing too" bye: nga" dei zoo-
David ri dang: theing byid: too" bye: ziyo' dakhyoo" ti
4 Re" da" amyed ashen" mo khanham we' khokham bui" nhang: wa nghoid.
Re" da" khokham byumyu" ri pyaid moo: too: moo
dageung: teung jo, nhang: wa, ga: wigi tid bye:.
5 Aseing we" mougkhung: mougdi joem gi
nang koid to" mau" pho" ziri jihkoin" khoin" nyid boem.
Gyeung" shang: bang: gi re" da"
nheigloem: zung" khyoo: joem ri jihkoin" khoin" nyid boem.
6 Aseing we" moug khung tho' moo: we' nang yo' du zi hang" anyid loo.
Moug khoung: zoo: yi hang" we' nang yo' yo" du goo" wa zi anghoid.
7 Nang gi gyeung" shang: mo, da" phung: moo
gyoug phau" zi shoug" kham yu nyid.
Nyangnu" dangain" mo, gi nang ri mau" yab jo.
8 Gyi: myhang: thang da" Aseing Mangsoo we"-
nang yhang: ti" yoem zeing so, moo" boo su-
hang" we' anyid nyid loo.
Aseing we"- nang gi khyoo: khaid gu: khang" moo" moo
dang: zung" su: nghoid nyid.
9 Nang gi yoem moo" bo da" panglai: gyid mung" ri vhoebkhang" nyid wigi
houg: mo thain: da" being: mhoid joem doin: lhoem" lo boem ri nghoid loug we'
nang gi no: jham" loo" nhang: nyid.
10 Nang gi gyid mainjung: Rahab, ri
ne, mhoin' pyam wigi said pyam wa bye:.
Nang gi re" da" gyivoo joem ri re" da" yoem moo" yo' oung: doid loo" bye:.
11 Mougkhung: mougdi gi re" da" zi nghoid.
Mougmyid yoosoo" we' re" da" zi nghoid.
Mougmyid yo' hougmoo: jo, da" ziyoo dangain" ri we'
nang koid to" zi za: nghoid.
12 Mougzhung: yo' mougpyi: we' nang phain" so: to" abye:-
Tabora boem yo' Hermon boem joem ri we'
nang ri gau, yi jikhoin" thu: yo' khoin" nyid boem bye:.
13 Nang gi zoug myeing" yoem vhoo" gye" boo su: nghoid nhung:
re" da" yoem vhoo' gi gye gyi: jo, nyid.
14 Re" da" mungdain: gi deingmain" ziyo'
nyeung vho, khyoo: moo zheung: tam" to".
Nang zei: da" moo" ja: khang" moo" moo
jheddab khyoo: yo' zung" da" nheigloem: ri toin" shed nyid.
15 Jihkoin" khoin" lho: nang ri noku loem khoug: bang:
khayhi' ngilho' nyid boem nhung: lha".
Re" da" nheig khyeug shoo" myen da-
bidbang khoug: moo so" nyid da" byumyu" yigi
khayhi' ngilho' nyid boem nhung lha.
16 Nang yoomo nyangnu" gi nyid" goin"
gau yi ngei pyo: nyid boem ziyo'
re" da" ge thang khyoo: yoomo
nyangnu" nang ri coung" nghei nyid boem.
17 Nang gi nyangnu" shid re" gyi: thang oung: doid lo" khyoo: zeing ri byid: nyid da:.
Re" da" jheddab nheigloem: khyo"
ngoonu" ri oung: doid loo" nhang: nyid.
18 Aseing we" nang gi ngoonu" ri goem loem byid: wa su: khyen byid: nyid da:.
Israela da" gyeung" shang: Mangsoo we"
nang gi ngoonu" shid re" khokham byid: too" bye:.
19 Goonham' dalheung: ri re" da" yoeb myang daloem: moo
re" nheigloem: zung" da" dei zoo: yiri
nang tid zigi hid: su" nghoid.
Myeung gye" fu" da" gyizoo: dayug ri ngoo khyen: yu wigi
khokham zhungtang ab byid: bye:.
20 Nga" da" dei zoo: David ri gyeung" shang: da"
mainkaid xu: yo' joid, byid: wigi
Khokham aya: dang: byid: bye:.
21 Nga" da" yoem vhoo" gi nyang: yo' dage"
khanham we' dabo jo, wa ziyo'
nga" da" yoem so, yo' nyang: ri yoem lung: byid: wa zi nghoid.
22 Nya: gyivoo joem gi nyang: ri khanham we' yo" ung: wa zi anghoid.
akhyeung" su: we' nyang: ri yo" soem" joem: loo" nhang: wa zi anghoid.
23 Nya: gyivoo joem ri ngoo ne, mhoin pyam byid: wa ziyo'
nyang: ri ngheing" bang: hang" ri we'
Ngoo said pyam byid: wa zi nghoid.
24 Ngoo gi nyang: ri jheddab nyid wigi nya: atho' moo: nheug yo: nyid wa zi anghoid.
Ngoo gi nyang: ri khanham we' oung: loo" nhang: wa zi nghoid nyid.
25 Ngoo gi nya: mungdain: ri Medi panglai: mo zi
Uphrad gyid lang ju" sho' gyi: lam: loo" nhang: wa zi nghoid.
26 Nyang: gi ngoo ri nang gi nga" phoo yo' nga" Mangsoo nghoid da-
nang gi nga" da" goem loem su: yo' ngoo ri khyoid yu da"
Aseing nghoid nyid ga: wigi tid wa nghoid.
27 Ngoo gi nyang: ri nga" zooshid" da" aya: moo tu: to' too" wa zi nghoid.
Khokham yi dangain" da" atho' moo je" gyi: su: ngoo bue" loo nhang: wa zi nghoid.
28 Nga" da" dangsoo" khoin"- khanham we' nyang: moo: geung: jo, nhang: wigi
nyang: yo' theung go" to: da" dangsoo" khoin"
pyaid didu moo: ju" sho' dageung: teung jo, nhang: wa zi nghoid.
29 Nya: da" khokham byu kung: yiri
mougkhung: su" geung: teung jo, nhang: wa.
Nya: da" amyed ashen" joem gi khanham we'
khokham bue" loo" goo" wa zi nghoid.
30 Nghoid loug we' nya: da" akung: ako' joem gi
nga" da" tarha" ri atam" gyo: boem wigi
nga" amyeing" dang: joem yo' dakhyoo" ti"
acang lo" boem nghoid loug we'.
31 Nga" da" jhoug" myeing" jhoug" thui: ri
nyangnu" cishu: anhang: boem nghoid wigi
Nga" da" Dang: theing khoin" joem ri
acang lo" boem nghoid loug we'
32 Ngoo gi nyangnu" zei: shoid bye: da" yooboo joem yoomo
nyangnu" ri yooboo dam kaid wa zi nghoid.
Nyangnu" da" shoid vhang: lo" khyoo: joem yoomo ngoo gi
nyangnu" ri kyi" khyeug khyoo: phu" zoo: nhang: wa zi nghoid.
33 Nghoid loug we' ngoo gi David ri khanham we' jheddab nyid
nyang: ri to" byid: da" nga" dang: theing khoin" ri we'
lhu: phyo' pyam byid: wa zi anghoid.
34 Nyang: yo' koid to" da" nga" dang: theing khoin" joem ri we'
ngoo lhu: phyo' pyam wa zi anghoid.
Nyang: moo: to" da" dangsoo" khoin" rilang"
ngoo doem tau" yu wa zi anghoid.
35 Nga" da" gyeung" shang: myeing khyang" yo'
dalheing: dam ngoo gi dang: theing byid: too" bye:.
Ngoo gi David ri khanham we' mhoug wa zi anghoid.
36 Nya: da" amyed ashen yigi xo' loo: xo'
danyid nyid boem wa zi nghoid bidbang dajo, jo, gi
ngoo nya: mungdain: ri dazoung" yu" nyid wa zi nghoid.
37 Mougkhung: moo nheigloem: zung" da" thang" cab bue" jo, da-
lhammoo" yo' dakhyoo" ti" hau: mungdain: we' dageung: jo, wa nghoid ga: tid.
38 Nghoid loug we' nang gi nanyang: khyen: yu da"
khokham phoo ri nheig yo: nyid da:.
Nang gi nyang: ri she: pyam ziyo to" pyam to" abye:.
39 Re" da" dei zoo: yo' too" go" da" dang: theing khoin" ri
nanyang: lhu: phyo' pyam byid: ziyo'
nya: bidmug ri pheilhoug: boem" moo
nang khyoid khyo' pyam byid: bye:.
40 Nya: da" voomoo" vang" khyam: ri nang phyo' pyam byid: wigi
nya: gyidab, ri nang byo, yoin" loo" nhang: bye:.
41 So" lid lo" da" byu yi dangain" bang: gi
khokham da" ziyoo joem ri khau" yu lo" boem ziyo'
nya: yhoem: kyoo" cang" yi dangain" we'
nyang: ri juang" yi nyid boem bye:.
42 Nang gi nya: gyivoo joem ri oung: doid loo" nhang: wigi
nyangnu" dangain" ri nang gau yi nhang: nyid abye:.
43 Nang gi nya: gyizi gyikhoo: joem ri lhu: phyo' pyam byid: wigi
nyang: ri gyi zain: jang: moo: soem" loo" nhang: nyid da:.
44 Nya: da" khokham amyeing" lhamdung: ri nang yu pyam byid: wigi
Nya: da" khokham zhungtang ri myidjang moo: tu: se: pyam byid: abye:.
45 Nang gi nyang: ri ayo, aju" shi" ri mang: loo" nhang: wigi
sho' thu gyoug thu nhang: nyid.
46 Aseing we" nang gi nanya: gung ri nanyang:
dajha" yhoem" too" wa ein: bye: la".
Re" da" nheigloem: nge" zigi myi: yhang: ti"
khamyhang ju" sho' dange" nyid wa ein: la".
47 Nga" kangso' khayhi' leung" jo, ziri myid boin: we'
shid: byug se' da" ngoonu" dangain" mo ri
nang phain" so: to" ziri we' boin: so" nyid we'.
48 Houg: su: gi khanham ju" sho' ashid: abyug loo: yo" nyid wa la".
Byu yigi nyang: gung nyang: loeb duang: khoug: khyoo:
avang loo" sho' khasu" koid yo" toem too' wa lha".
49 Aseing we" goonham mo da" re"
jheddab nheigloem: thang" cab gi akhid" khayoo: nghoid lha".
David ri: nang byid: to" da" dangsoo" khoin" gi
akhid" khayoo: nghoid bye: lha".
50 Re" da" dei zoo: ngoo khasu" aphoug" akhyoid
koid zi shoug" nyid khyoo: ri ato" myid.
Mangsoo ri aloem" ajeung" da" tungbau byumyu" yi da" nheing" myeing" ri
ngoo khamyhoo, kham zeung: nyid ziri we'
nang ato" myhed pyam byid.
51 Aseing we"- nang khyen: nyheung to" da" khokham phoo ri
re" da" gyivoo joem aphoug" akhyoid, koid nyid boem.
Nyang so" lo" joyoo khyi khang" moo" moo:
?Nyang ri nyangnu" gi aphoug" akhyoid koid nyid boem.
52 Aseing khanham we' coung" nghei nyid.