26
1 Byugang: ri coung" byid: zigi zain, vang khoem" moo: gyu: khyo' ziyo' dakhyoo" ti" anghoid lang" gi byang gain, yo, ri moug: vo, ziyo' du nyid.
2 Nheing" khoin" gi nang ri zang wa amoin: yi" nghoid rigi nang ri zang" wa zi anghoid. Hau: da" nheing" khoin" joem gi khanham we' anoo: loo: dang: nyid da" ngho' joem yo' du nyid.
3 Myang: rigi voosi" wigi baid ca" nyid loo zei: rigi nhoid kho' tei" kaid ca" nyid. Byugang: rigi gyoem' thoung" wigi baid ca".
4 Anghoid akhuang da" dang: ri phoug tu" nghoid rigi nang anghoid akhuang khyoo: ri myid boo su: nghoid nyid.
5 Anghoid akhuang da" dang: myid: rigi anghoid akhuang khyo" phoug tu" we' hougsu" myid: nyid su: gi nyang: jho: yhang: ti" nyang: ayeug nhung: da: ziri boin: loo wa nghoid.
6 Nang gi byugang: ri lu dang: di" nhang: kaid nghoid rigi nanya: khyid: ri phyed pyam ri gi wa nghoid. Nang gi yau: khe" khyoo: ri mho' nyid zi nghoid.
7 Byugang: dang: khyang" dakhoin" tid zigi khyid: yoin" su: khyoo: so" lo" ziyo' du.
8 Nheig agyeung: su: ri coung" byid: zigi beug dain" moo: zhooshi" myheug tab byid: nyid ziyo' du nyid.
9 Byugang: dayug gi phajhi" dang: khyoo: ri ci: lho: nang ri tid poin" tid kyeung" nyid zigi yhid: yed su: gi nya: lo, moo: zugam ri myheug nyid ziyo' du.
10 Fu: moo" khyoo: moo: lam" yen" da" byugang: ri vhookung: lhoung: da" moo" seing: gi subi" gooji ri goo, duang nhang: da- lid: beig su: yo' dakhyoo" ti" nghoid.
11 Dalheing shoid bye: khyoo: ri doem shoid nyid da" byugang: gi nyang: doug to" apaid boem ri doem geug zo: da" lakhuid" yo' du.
12 Ci" we' asi' su: nyang: gi ung: yeig phajhi" bo ga: myid jho: nyid su: tho' re" nheig agyeung: thang da" byugang: gi je" ge nyid.
13 Byunei" yi ci yoomo yhoem: mo, athu loo" nau boem lha". Nyang: cenoem ri gyoug la". Khang khyi, ri gyoug la".
14 Byunei" yigi yhoeb joyoo moo za: phoug lheig nyid nyang: gi khoem" tang moo: za: lheung: nyid da" khoem" yo' du nyid.
15 Byu dayham" gi nyangnu" da" nhoid moo zoo: noem koid: kaid wa zilang" gye" nei" mo, nghoid ago".
16 Byunei" yigi tid da" dang: joem ri nghoid ga: goolhoo: yo" tid mo, nyhed youg tho' re" je si, je koung ga: myid jhoo: goo" wa nghoid.
17 Nyang: yo' asen: da" myeing" myo: ngeig go" jang" moo yhe: bo vang su: gi fu" moo" khyoo: zeing moo: yhe: lho: lakhuid" dadu: da" nukhyab moo: yhe: lang: byid: su: yo' du nyid.
18-19 Byu dayug yug ri khyoo: vhang: shu" vhang: lho agoin: daze" ei" ga: tid su: gi shid: nhang: se' da" sham: lham: yo' zoozi" ze" nyid da" byukoo" yo' du nyid.
20 Thang" bei" abo ri myi: shid: lo" khyang" shed su: abo rigi myeing" myo: khyoo: jo, tam" loo" wa nghoid.
21 Myijhen" zoo: gi myigyu: moo: nge" lo" lho: thang" gi myi: ri dab, loo" nhang: nyid yau: khe" khyoo: lhu: pau: nyid mo, gi myeing" myo: khyoo: ri bue" thu' loo nhang: nyid.
22 Khyang" shed gei sang: rigi gye" ngham"- hau: zigi ngoonu" gi khayhi' ju" sho' myhau: kaid nau lha".
23 Nyang: tid nau ziri gi yhoem" to" lho: wigi gooja: ja: tid nyid su: gi gu, neung: da" yam: moo: joid to" boug soo" cab' yo' du.
24 Nghoid goin koid nyid su: gi nyang: tid nyid da" nhoid coung" dang: khoin" moo nya: ngheung" nheigloem: ri yhoem" shoung: to".
25 Nya: dang: thui: ri gyo: rigi nghoid wa ti" ga: nghoid loug we' aloem"- khasu" wim gari nya: da" nheigloem: khoug: moo ngheung" da" nheig" loem: byeung" jo.
26 Nyang: gi nya: da" ngheung" nheigloem: rilang"- yo" lho' phyug pyam sho' nghoid loug: we' nyang: koid da" lo, moo" rigi yugkhang" moo" myang loo goo" wa zi nghoid.
27 Subi" ri lhid thoung: kuang nyid bang: gi nyangnu" nyang: hau: lhid moo: myi" goo" wa zi nghoid. Myid byo, byo, nhang: mo, gi nyangnu" ri nyang: lo nhe' pye" pyam, boem wa zi nghoid.
28 Byu dayug ri mhau' dang: khoin" yo' noo nhang: wa shid re" nang gi nyang: ri ngheing" ca" nyid. Adeing: amain" khyo" tid sang: nyid khyoo: gi byo, yoin" khyoo: riza: bui" nhang: loo" wa zi nghoid.