27
1 Nab yo nyid" yo' sen: lho: khanham we' aphau: akhuang nyid akhid" hau: ayo, aju" gyoo: moo: cibui" wa zi nang asi, nghoid da:.
2 Subi" goo" youg wigi coung" byid: baja" tungbau wigi coung" byid: baja"- nanya: gung ri nanyang: khanham we' acoung" yu.
3 Lug zeing yo' midcoo: lid: ziri nheig agyeung: ze wigi bui" nhang: da" yau: khe" khyoo: yo' ayo" ge tu, goo" nghoid da:.
4 Nheig yo: nyid da" khyoo: gi lam: ziyo' byo, yoin" loo" nhang: da" khyoo: nghoid, Nghoid loug we' no" zo khyoo: yo' age tu, goo.
5 Byu dayug ri bang bang tid poin" da" khyoo: gi ci" we' atid loo: jheddab nyid tho' re" je ge'.
6 Bid noem, gi nang ri dam noo nhang: nghoid loug we' ge khyo" damyid byid: nyid. Nghoid loug we' gyivoo dayug wigi re" lo, sain: moo: gab, po: nghoid rigi zed" lhed nyid we'.
7 Nang voem: gyi: uri gi byoo yhid: ri ngeug pyam noug wa nghoid loug we' nang zooyoid nyid uri koem kho" da" zoo: noem rilang" gi coug: thui: gyo: loo wa zi nghoid.
8 Nyang: nya: yhoem: mo, vi: khyoo: lam" yen" su: gi nya: soid mo vi: khyoo: dang: lam" yen" da" ngho' yo' du nyid.
9 Nam, pyo: da" xu: yo' nam, pyo: da" shoem: gi byu yiri ngei pyoo: nhang: nyid. Yau: khe" khyoo: koem gi re" myenjham" da" nheigloem: ri gyau: moin" loo" nhang: nyid.
10 Nanya: bidnoem yi yo' re" pho da" bidnoem, yiri ato" myhid. Nang yau: khe" khyoo: thoung" shoug" nyid da" ayo, moo re" mang: nhung" ri pang" thoug wa khyoo: ayhe: mho' re" da" yhoem: kyoo" cang" gi moug: vi: moo: nyid da" re" mang: nhung" pho, tho' re" nang ri je" yo" pang" thoug nyid.
11 Nga" zoo: we" ung: yeig phajhi" boo we' houg: lang" ngoo gau yi wa nghoid. Ngoo ri: gei sang: shang pyang: bang: ri phoug tu" wa dang: phoid: ri ngoo yoo" wa nghoid.
12 Se, myid soin: yu" nyid su: gi yau: khe" khyoo: ju" lo nyid ziri lhoem: myang lho: wigi yo" jang" pyam, boem wa zi nghoid. Amyed yu" su: gi dain" za: yhe: lo" wigi thang: rigi nung ngham" yo" nyid wa zi nghoid.
13 Being" voo dayoug da" jhen: ri bo xab wa shid re" kham" yu da" nheig agyeung: su: gi nyang: moo: yo" da" zi daja: ri ama' kham zi khyo" byid: too" wa moin: yi" nyid.
14 Re" da" bidnoem phoo ri nab soin: no" re, thui: moo" yo' yhe: nhau" to' kaid zigi nyang: ri nheung" ziyo' dakhyoo" ti" nghoid.
15 Nau khyo" myeung tei" to" da" yhoem: seing: myhi' gi moug: vo, da" bidnyid ri dazo, dazo, gyo" nyid da" lang: zo, yo' du nyid,
16 Nyang: ri tam" loo" sho' khasu" yo" koid wa lid hau' lo ziri nang yo" toem' wa la". Xu: dazhoeb, ri yo" zhoeb, ci wa la".
17 Jo, to' ri nyang: cang" sei" tho' yu go" ziyo' dakhyoo" ti" byu gi nyang: cang" nyang: yo" jhau" yu go" nyid.
18 Lafoem, gam ri nyheung coung: kaid we' houg: lang" gi lafoem, shi" ri shoug" phyo' zoo: wa. Yhoem: seing: ri yu" coung: da" dei zoo: gi ngi: shab zi shoug wa nghoid.
19 Gyid thoem" khoug: moo: nanya: myonhoo: ri shau" myang ziyo' dakhyoo" ti" nheigloem: khoug: moo: nanya: gung du: ri nanyang: myang nyid.
20 Xangsu: byu yi da" vho: ngei so' kho' nyid da" khyoo: gi moug: vo, moug: yo' du nyid hougmoo: khanham we' joyoo dajo, nyid.
21 Ngei, yo' sheing: rigi myi: wigi yo" phoid kyeung yu da- byu dayug da" myeing fu" nyid da" khyoo: ri we' yo" gyo: kyeung yu nyid.
22 Byugang: dayug ri alug shid: sho' baid nghoid loug we' nyang: moo: bo jo, da" nheig agyeung: khyoo: rigi ayo" baid thu pyam, byid: nghoid da:.
23 Re" da" nukyung yang kyung ri ge bue" yhi' goo" lhoo: yu" coung: goin, nyid we'.
24 Khasu" gari:- jonu" ga: zigi khanham we' ageung: teung jo, nghoid da:. Mungdain: joem lang" gi apyaid atoo: moo: ju" sho' ageung: teung jo, nghoid da:.
25 Nang gug yham" yu thang: ri gootu: shivoo: gug gam youg jo, shi" uri boug zoin" yam, cang mo mhain" vufu" ri yham" yu we'.
26 Nang khu: nyid da" yang moug" yo' byimi, yo" koid lho: re" coidbaid dayham" ri oung" pyam wigi yo" da" ngei gi mougmyid ri yo" qei, yu wa zi nghoid.
27 Deung nyid da" coidbaid joem gi nang yo' re" da" yhoem: byu yi deizoo: myiyi: nu" yi shid re" coid noug" ri yo" jhoeb, yu wa nghoid.