25
1 He: khyoo: gi Yuda Khokham Hezekia da" vang moo nyid mo, wigi lhid" yu to" da" Sholumon da" goo tu: dang: zhoem joem nghoid.
2 Mangsoo rigi nyang: yhoem" zau" to" da" moo" zoo" yoomo ngoonu" phoug" tab, ngi: byid. Khokham rigi nyang: sho' kyo" da" moo" zoo" yoomo phoug" tab, ngi: byid: nyid boem.
3 Khokham nyang: cimyid soin: nyid zigi nang gi khanham we' asi, byid. Nyang: myid ci: zigi nyhang" atho' oung: myhi: da" mougkhung: mougdi, su" myhang: lho: Nammugdara su" no, jo.
4 Meing: sa: gi ngei joem: ri agyeung" ziri kyeung pyam lho: young" da" jonu" joem ri yo" koid thu' byid: nyid.
5 Akhyeing" ashoeb, da" phajhi" byid: mo, ri Khokham jang" mo, vi: khyoo: nyhed: pyam, we'. Houg: lang" nya: da" vhoebkhang" khyoo: gi deingmain" zi nghoid ga: se' lo boem wa zi nghoid.
6 Nang gi khokham shidkhoin" moo: yhe: yab jo, da" uri nyang: nya: gung ri nanyang: gye" yhouggyen: su yhang: ti" akoid.
7 Je" myhang: da" jo yoo moo: shu" zhoung: jo, wa shid re" khe: zi shau" da" khyoo: gi re" da" joyoo ri je" yhouggyen: su: shid re" joyoo shu, byid: nhang: shau" da" tho' moo: je ge zi nghoid.
8 Nang shau" myang da" daja" ja: khyoo: ri tarha" yung" khyoo: yhi: wa zi ahain:- re" thang: khyo" sagse: phoo gi nang tid zi ajoo, ga: tid nghoid ri nang khasu" koid wa.
9 Re" da" yhoem: kyoo" cang" yo, aveing" go" rigi re" eig yug kyeing" shoug" go" lho: tid go" pei" pyam, ge'- zau" to" da" khyoo: ri atid, thu.
10 Hougsu" anghoid rigi nang gi zau" to" da" khyoo: ri ase' zoug" su: ga: sube" wigi:-se' pyam, byid: lho: atho' zeing: loo: sho' phu" zoo: wa zi nghoid.
11 Phajhi" gi' goo" lhoo: yo" byid: da" khyoo: gi ngei zi, moo: yu" yung" sho' tab, to" da" sheing: yo' du, nyid.
12 Goolhoo: za: tam" gyoo: noug su: rigi aja: ja: thoung" shoug" yu" bye: su: wigi phajhi" byid: da" dang: gi ge thang da" sheing: anghoid lang" phau" thang da" lug nyoug yo' koid da- sheing: lo, pain" yo' du nyid.
13 Loem' ge" da" lagyoo: gi byang gain' yo, ri bid loung wigi gyid shed nyid uri shoug" shoug kaid da" gyid jham" yhang: ti" nyang: ri nhang: kaid su: ri yoem: yoo" nhang: nyid.
14 Nyangnu" dangsoo" byid: lho: khanham we' acang bang: gi moug: gyid abo da" jhoemmoug" yo' lid yhang: ti" du nyid.
15 Nheigloem: sheing: sheing: za: yo" shu" tid su: ri nheigloem: gye" thain: nyid bang: ri yo" lang: yu lho: mung" vhoeb mo, rilang"- loem sho' yo" koid nyid.
16 Byoo: yhid: ri ca" da" tho' moo: lid sho' ashug- soung shoug rigi dug nhang: se' nyid.
17 Re" yhoem: kyoo" cang" yi jhang daso, akyoo: alam" yhi- nang ri phibu bu lho: jo, ngheung" loo wa zi nghoid.
18 Anghoid khyo" yooboo foin: zigi lhab' sham- thung" keing: anghoid lang" coin: da" sham: byeing myoo: yo' dakhyoo" ti" nghoid nyid.
19 Loem' age" da" byu yiri yau: khi: shoug" nyid da" ayo, moo: myid loem' myid khau: nyid zigi lei" da" zei yo' rhe" yhang: ti"- anghoid lang" gi khyid: gyoug: yo' so" lo" yhang: ti" du nyid.
20 Nheig nge nyid su: ri jikhoin" khoin" kyo" zigi ngam" da" bidnyid ri byi: khyoid pyam, byid: yhang: ti" anghoid lang" gi dam noo, moo: xoo" kaid byid: yhang: ti" nghoid nyid.
21 Re" da" gyivoo joem zooyoid, nyid ri zoo: noem byid: zhoo" we' nyang: gyid shed nyid ri gyid byid: jhug we'.
22 Nang gi nyang: ri sho' phu" nhang: khyoo: bue" lo lho: Aseing gi nang ri ngi: shab jhungshug byid: loo wa zi nghoid.
23 Gyid moin, khyoo: hau, lo" da" lid zoo" gi moug: gyid ri ci: lo" ziyo' dakhyoo" ti"- sube" da" gei sang: zigi subi" ri nheig yoo: khyoo: ze" thu' byid: nyid zi nghoid.
24 Myeing" myo: myheung da" yhoem: seing: myhi' yo' dage" yhoem: khoug: moo: nyid wa tho' re" yhoemkhung: tho' moo: lo" nyid wa zigi je" ge nyid.
25 Moug: vi: khyo" ju" lo da" lu dang: gi, gi bid loung uri shoug" shoug kaid da" gyid jham" dagoem yo' du nyid.
26 Akhyeung" su: citid cigyo: da" byugi dayug gi mei, byug bye: gyid bug- anghoid lang" gi khain: cid myoono, bo da" gyid thung" yo' du nyid.
27 Byooyhid: ri soung shoug zigi re" shid re" age zi nghoid. Nyhang" nyang: ri coung" byid: wa da" dang: soung sho: ri agi.
28 Re" da" nheig yo: khyoo: ri ayo" zeung: rigi vang khyam: ajo, da" voomoo"- pang" thoug khyoo: ayo" da" meing: zain: shoug" khyoo: yo' du nyid.