PHILIPI
BANG: JHANG FOIN: KAID MOUGSOUG"
(Philippians)
Philipi bang: jhang khyoo: foin: kaid da" mougsoug" gi Uropa dain" khoug: Roma yi da" Makedoni ein: da" Roma moug: du moo Lagyoo: Polu xangshid" yhe: tam: to" da" Philipi voo moo nyid da" phung: byu yi shid re" lhid" kaid da" mougsoug" nghoid. Philipi phung ri AD. 50 zain' koo: moo lagyoo: Polu gi eig lheung: ein: da" sasana gyung: so" lo" uri tam: too" bye: ziri yo" se' yu. (Lagyoo: 16:12-40) He: moug: soug" gi lagyoo: Polu Roma voomoo" moo thung: loung" nyid uri AD. 60-64 zain moo lhid" da" mougsoug" myid loem: mo daloem: nghoid. He: da" Philipi voo moo xangshid" lheung: ju" yhe: uri Polu yo' Sila eig yug ri thung: moo myheug kaid to" zi shau" bye:. Nghoid loug we' mau" pho" alhoo: again khyo" loid byoin, thu loo bye:- Lagyoo: Polu ri myheug lho: boopyug pyoug da" uri Roma mungbyu agyeing" nyang: nghoid da" khyoo: ri tid kyo" wigi nya: gungdu: ri goemloem yu ago".
Khasu" wim ga: ri Polu thung: loung" jo, uri Philipi phung: moo Polu ri juang" yi doin: keung" da" sara: yi dayham" ju" lo boem wigi shoid da" khyoo: jhau" byid: ziri se' gyo: yu boem yoomo myidmyoo: ungloug nyid boem. Nghoid loug we' he: da" mougsoug" moo Philipi phung: byu yi yo' sen: lho: wigi juang" yi khyoo: loem" da" khyoo: joem ri Polu dayug za: Khristu ri loem" jeing" da" khyoo: ri no, thang khyo" yo" phoid: sho' kyo" da" khyoo: ri lhid" kaid. Je" wigi he: mougsoug" pug ri lhid" ca" da" khyoo: gi (1). Philipi phung: byu yi gi nyangnu" da" phung khoug: moo re" lhu: zoo: bang: boo nghoid loug we' Khristu ri loem" jeing" khyoo: moo geing: geing: teing teing yab, jo, boem tho' moo gootu- Khristu yoomo thung: loung" jo, da" Polu jhang khyoo: ziyoo jonu" ngei sheing: yo' dage" Epaphrdi ri nhang: kaid ziyo' nyang: gi ce: yoo aboo loo sho' yhe: yu" coung: nyid da" ayo, moo alug, shid: sho' no jangmo doem ge loo bye: yoomo nyang: ri doem loo" nhang: kaid. Nyang: yo' dage" Philipi phung: byu yi jhang khyoo gau yi jeju" boin: mougsoug" alhid" agi ga: wigi Polu da" nheigloem: moo jhoin" nyid yoomo lhid" kaid zi nghoid. (2).Lagyoo: Polu yo' dage" Philipi phung: byu yi da" loem" jeing" khyoo: yoomo thoung" shau" nyid da" yaukhi" kyikhyeig khyoo: ri oung: doid pyam wa shid re" voem" da" yoem: moo" bo lho: loem" jeing" khyoo: moo nheig shid: nheig deig ca" da" khyoo:- atid poin" agi loo: yoomo lhid" kaid zi nghoid. Nya: mougsoug" moo gungshoo" vhoo" boo myo, no, khyoo: yo' ce: akyu" abo da" ngeug he: pyam khyoo:- phau: khuang da" nheigloem: aboo loo: za: Khristu Yesu moo bo da" nheigloem: nyang: boo ca" da" khyoo: ri tid poin" nyid. Mangso jhang mo nyangnu" yo" yu da" jeju" gi toung: to" da" tarha" ri cang pyeing byid: yoomo anghoid. Khristu yo' dage" kangso dei nyid yoomo Mangsoo byid: da" jhungshug jhung: lang: za: danghoid zi tid kyeing" tid poin" ziyo' dage" Khristu moo kangso dei nyid boem da" Philipi phung: byu yi ri Mangsoo byid: da" ngeibu: lu dang: yo' myenjham" ngei pyo: da" khyoo: ri tid fu" kaid wa shid re" he: mougsoug" ri lhid" kaid bye:. He: da" mougsoug" moo nghe: lho: lhid" to" da" khyoo: joem gi Philipi phung: byu yi Khristu moo loem" jeing" kangso dei nyid khyoo: moo gau yi khyoo: loem nghe: zoore yoemso bo khyoo: nheigloem: sham: shoin" deung: foem go" khyoo yo' Philipi phung: byu yi da" atho' moo Polu da" jheddab nheigloem: khayhi' gyi: sheung: jo, khyoo: joem lhid" to" zi nghoid.
1
1 Khristu da" join yi nghoid da" Polu yo' Timothi gi Philipi voo moo nyid nyid da" phung: vhoeb phung: tau bang: yo' dage" Khristu Yesu moo daloem: za: nghoid da" Mangso gyeungshang: byumyu" yi bain sho' bang: jang khyoo: mougsoug" lhid" kaid.
2 Ngoonu" da" Phoo Mangsoo yo' Aseing Yesu Khristu jhang mo, jeju" yo' ngei pyo: da" khyoo: gi nanu" moo dajo, jo baja" o".
3 Nanu" da" khyoo: ri ngoo myid boin: soin: yu" nyid ayo, dangain" jang" moo Mangso jeju" ri ngoo coung" nghei nyid.
4 Ngoo nanu" shid mo, akyu" mho' da" ayo, khang" moo" moo gau yi nheigloem: yo' mho' byid: nyid.
5 Khasu" wim gari ngeibu: ge: da" moozoo" ri ngoo voin yu, shed" lo da" bidnyid mo akhid" nyid" ju sho' hau" ngeibu: lu dang: kho" kyo" da" khyoo: moo ngoo ri bo pang" thoug voin vu, lid lo boem bye:.
6 Hougsu" nghoid yoomo nanu" moo he: da" ge moozoo" ri zei: shed" too" byid: su: Mangsoo gi Khristu Yesu doem gyoo" loo wa bidnyid moo hau: moo" ri joeb byeung" sho' zei: too" goo" wa" ein: ngoo myid loem nyid.
7 Ngoo nanu" da" atho' moo too" byid: da" myid gi young" du nyid khasu" wim ga: ri nanu" ri jheddab nyid da" khyoo: gi nga" da" emyed moo dabo jo,. Nanu" dangain" bang: gi ngoo thung: loung" jo, uri nghoid loug we' ngoo ngeibu: lu dang: ri kho" kyo" zoore geingteing jo, nhang: uri nghoid loug we' Mangsoo ngoo ri byid: da" akhang" jeju" ri bo kham zoo: mo, nghoid ago".
8 Ngoo gi Khristu Yesu nyang: myid moo bo da" jhid khyeung: kang: khyeung: myid yo' nanu" ri myid boin: nheug nge nyid ein: ngoo tid nyid da" dang: deing nyid da" khyoo: gi Mangsoo gi nga" sagsi nghoid.
9 Hau" tho' moo nanu" da" jheddab nheigloem: gi je" gyi: sheung: lo wigi se' yeung, jang" moo joeb, byeung" da" dang: phyed dang: kho' da" yoem: vhoo: yoo" goo" baja"- nanu" shid re" ngoo akyu" mho' nyid.
10 Houg: lang" she' nanu" gi Khristu doem ju" re" da" bidnyid moo ayung" alho' aco' ajhoid khyoo: mo loid lo" lho:- yooboo adab bang: bue" wa zi nghoid.
11 Nanu" da" kangso dei khyoo: moo Yesu Khristu za: date: yo" byid: da" ge da" aved asam" ein: da" ashi" yo' joeb byeung" lo wigi Mangsoo da" myonhoo: phung" yoeb, ri coung" nghei tu: to' zi shau" wa nghoid.
12 Hau: lho: mangnhung" yi we"- ngoo moo bue" lo da" khyoo: joem gi hau: ngeibu: ludang: gyi: sheung: loung: loo wa shid re" gyeing" nyang: bo pang: thug byid: wa shid re" bui" lo khyoo: nghoid ziri nanu" ri si' nhang nau.
13 Hau: khokham da" yhoem: moo" ri zung" lhug da" gyizoo: yi dab goin" yo' hid: moo nyid bang: gootu: dangain" ri ngoo thung: loung" zigi Khristu da" deizoo: koid yoomo nghoid khyoo: ri se' lo" boem bye:..
14 Hau: tho' moo gootu: ngoo thung: lung" yoomo mangnhung" yi myoo: loo boug gi Hau: Aseing moo loem" jeing" nheigloem: je, to' lo wigi Mangso mungdang: ri agyug avoem loo: za: tid kyoo" wa da" khyoo: je" wigi voem lo ago".
15 Gyeing" nyang: nyhang" mo dayham" gi no" zoo wigi myeung" myoo: nau boem ziyo' kho" kyo" nyid ago". Nghoid loug we' gootu: bang: gi ge da" nheigloem: yo' kho" kyo" ago".
16 Houg: bang: gi ngeibu: lu dang: ri goemloem byid: wa shid re" ngoo ri khyen: nyheung to" khyoo: ri nyangnu" se' nyid boem yoomo jheddab nheigloem: yo' kho" kyo" nyid boem ago".
17 Hau: lho" gootu: dayham" bang: gi gyeungshang: da" nheigloem: yo' anghoid loo: za: nyang: nya: da" akyu" sho: khyo" kho" kyo" ago"- nyangnu" gi ngoo thung: moo loung' jo, uri nga" tho' moo shidgyoin noogyoin je myo: loo wa shid re" myid soin' nyid ago".
18 Kho" kyo" da" akhyoo" again joem gi ce: yhau: gyen: khyoo: anghoid- anoug, angei da" nheigloem: khyo" nghoid loug we' deingmain" da" nheigloem: khyo" nghoid loug we' khyoo: khaid khang" moo" Khristu da" khyoo: za: kho" kyo" nyid boem nghoid rigi hau: khyoo: moo ngoo gau yi nyid- gyeing" nyang: ngoo xo' lho: gau yi ngeibu: nyid shi" wa nghoid.
19 Khasu" wim ga: ri nanu" akyu" mho' da" khoin" thui: joem yoomo we' Yesu Khristu da" Venyi: bo pang" thoug yoomo we' ngoo gi lhoid pyoin kaid zi shau" wa nghoid.
20 Ngoo gi khanham we' ngoo nya: yoovoin moo sho' athu sho' ayo, khang" moo" moo nghoid loug we' je" wigi akhid" uri nghoid loug we' agyug avoem da" yoem: vhoo" azeing' yo' byeung" jo, zoore ngoo gi dei nyid loug shid: loo" loug we' nga" da" kangso gyung: khyoo: bain sho' moo Khristu da" myonhoo: phung" yoeb, ri bang thu loo nhang: wa da" khyoo: gi nga" da" vho: ngei thang ziyo' nheig byu khyoo: nghoid.
21 Khasu" wim ga: ri ngoo kangso dei nyid zigi Khristu nyang: nghoid- shid: lo" ri we' amyaid' nghoid bye:.
22 Nghoid loug we' nga" gungdu: moo kangso dei nyid shi" ziyo' akyu" bo da" moozoo" myoo" sho' yo" zei: shi" nghoid rigi dei nyid wa ziyo' shid: loo" wa khyoo: kha: khaid ri ngoo khyen: yu wa zi asi.
23 Ngoo gi khyoo: eig khaid da" agyoo: moo nghoid nyid wigi shoid khang" moo" khyo" lang: lo" nyid ziri ngoo shau"- ngoo gi akhid" dei nyid da" kangso khyoo: ri to" pyam kho' lho: Khristu yo' dage" kangso' dei nyid noug bye:- houg: gi nga" shid re" je" ge zi nghoid.
24 Nghoid sho loug we' nanu" da" shid re" ngoo kangso xo' dei nyid wa zigi je" yhau: gyen: da" khyoo: nghoid.
25 He: da" khyoo: ri ngoo goolhoo: za: se' gyoo; bye: yoomo ngoo nanu" yo' dage" xo' nyid nyid wa zi ri se- nanu" ri je" gyi: sheung: loung: loo nhang: wa ziyo' loem" jeing" jang moo gau yi nyid wa shid re" ngoo nanu" dangain" bang: yo' dage" nyid nyid wa ziri se' nyid.
26 Hougsu" nghoid yoomo ngoo nanu" jhang moo doem ju" lo da" uri ngoo yoomo nanu" da" phau: khaung' joyoo- Yesu Khristu moo je" wigi loung: lo boem wa zi nghoid.
27 Akhid" uri nanu" shid re" je" ca" thang da" khyoo: gi Khristu Yesu da" ngeibu: lu dang: yo' du veung" moin: yi" khyo" kangso dei nyid boem ca"- hougsu" nghoid lang" gi ngoo nanu" jhang moo ju" re" uri nghoid loug we' aju" re" uri nghoid loug we' nanu" gi nheigloem: sham: shoin" go" lho: theung shang" yab, jo, wigi myid to" khyoo: dakhaid za: yo,- hau" ngeibu: lu dang: da" loem" jeing" khyoo: shid re" dage" za: zain: shi" go" nyid da" khyoo: ri ngoo shau" gyoo: wa zi nghoid.
28 Nanu" gi hau da" gyivoo joem ri agyug nyid goo" khanham we' yoem: zeing so' zeing bo nyid ge- hougsu" koid da" yhe, khyoo: gi nyangnu" soem" joem: lo" lho: nanu" gi oung: doid lo" da" alhoo: sagsi bue" nyid wa khasu" wim ga: ri nanu" ri oung: doid lo" da" khyoo: byid: su: gi Mangsoo nyang: nghoid nyid.
29 Khasu" wim ga: ri nanu" gi Khristu ri loem" jeing" khyo" za: we' anghoid shi"- nya: shid re" shen" yhen kyikhyeig kham khyo" we' Aseing da" moo" ri voin vu, akhang" jeju" gam, byid: zi shau" abye: go".
30 Akhid" nanu" gi ngoo yo' we'- meing: zain: jang: moo shau" vang yhe: boem abye: go"- hau: khyoo: gi lid: loo bye: da" ayo, moo ngoo thoung" shau" nyid da" meing: zain: khyoo: ri nanu" myang yu" wigi akhid" ngoo thoung' shau" nyid da" khyoo: ri nanu" shau" gyo: nyid da" meing: zain: khyoo: nghoid nyid.