6
1 Zoo: shang yi we"- nanu" da" myhi' phoo' yi da" dang: ri tam" gyo: nyid ge- hougsu" koid khyoo: gi Khristain yi da" koid eung: moo" nghoid.
2 Jhoem: mungdang: moo re" myhi' yo' re" phoo' ri phau" myang: nyid we' ga: da" dang: gi Mangsoo tid to" da" xangshid" mo Dang: Theung Khoin" nghoid.
3 Hau: da" dang: soo" gi mougmyid tho' moo kang: sheing: myo, myi: lho: nyid gi nyid de zi shau" wa" ga: zi nghoid.
4 Myhi' phoo yi we"- nanu" da" nya: zoo: yi ri nheigloem: yoin" wa khyo" ci" we' akoid byid nyid goo"- hau" gungkhoo:- nyangnu" ri Khristain byu nyid byu yab, khyoo: khyo" jhau" mo, khu: gyi: kaid ge.
5 Join, yi we"- Khristu ri tam" gyo: phau" myang: nyid yhang: ti" nanu" da" xangsu: yhoem: seing: yi ri gyoug phau" ziyo' nheigloem:" dain: khyo" tam" gyo: nyid ge.
6 Yhoem: seing: yi yu" nyid yoomo myonhoo: rua nau khyo" za: akoid goo"- Khristu da" join yi yhang: ti" Mangsoo myid vho: ziyo' dakhyoo" ti" nheigloem: bain sho' yo' zei: so' nyid ge.
7 Byu shid re" zei: byid: yhang: ti" za: anghoid- hau: Aseing shid re" yhang: ti" vho: ngei nheigloem: yo' nanu" da" moozoo" ri zei: nyid ge.
8 Join, yi ri nghoid loug we' join seing: yi ri nghoid loug we' Mangsoo gi yug khang" moo" ri nyang: zei: lo ge da" moo" zo" shid re" coung" byid: aphoug" shang" loo wa ziri boin: so" nyid ge.
9 Yhoem: seing: yi we"- nanu" we' houg: yo' dakhyoo" ti" nanu" da" join yi tho' moo cang zei: so" nyid ge- nyangnu" ri kyoug nhain' khyoo: no: pyam ge- nanu" yo' nanu" da" join yi gi mougkhung: mo Aseing dayug yo' za: sen: bang: nghoid- hau" aseing: gi yug khang" moo" ri myonhoo: akhyin: loo: za: tarha" dang: phyed nyid su: nghoid ziri myid boin: nyid ge.
10 Lo" thang jang" moo hau: Aseing yo' dagung za: bue" khyo" wigi we' nya: da" myonhoo: phung" yoeb, yoem: vhoo" khyo" we' nanu" da" yoem: zeing so' zeing ri loung: yu nyid ge.
11 Yu wigi mo" da" age khyoo: dangain" ziri nanu" lhoem: oung: doid pyam baja"- Mangsoo nanu" ri byid: to" da" gyizuang dangain" ziri yu void zhoung' ci: loo: ge.
12 Khasu" wim gari ngoonu" gi byu Xangsu: yi yo' khaid zain: go" nyid zi anghoid- mougkhung: mouglaid phyoo" moo nyid da" akhyeing" ashoeb da" yu gyiphung: moo" joem yo' we' he: coid no, thu: jo, da" apyaid ri vhoeb khang" nyid da" coid doem: boo" doem: da" zoug: yi amyeung" akhang" ci: bang: yo" we' zain: go" nyid boem.
13 Hougsu" nghoid nyid yoomo Mangso da" gyizuang dangain" ziri akhi" nyang: yu void: ci: loo: ge- hougsu" lang" she' akhyeing" ashoeb ziyo' yau: khe" da" bidnyid ju" lo da" uri nanu" ri gyivoo joem khaid zain: said lo ziri lhoem: yo" oung: pyam wa zi nghoid. Lo" thang moo ju" sho' bain zain: pyam thang: ri we' nanu" gi geing: geing: teing teing theung shang" yab, jo, boem ca" shi" wa.
14 Houg: yoomo nanu" da" phyid" doem: moo deingmain" khyoo: ri phyid" cu" su" cu" ci: lho: deing byeung" da" khyoo: ri re" da" yang gang nghoeb koid lho: wigi jen" jen" soin yab, jo, ge.
15 Ngei pyo: da" ngeibu: lu dang: kho" kyoo" wa shid re" jen" jen" nghoid nyid da" khyoo: ri re" da" khyid: moo khyidbaid yhang: ti" baid ci: lho: theung" shang" yab, jo, loo: ge.
16 Hau: tho' moo gootu: loem" jeing" ein: da" goo ri khanham we' void ci: ge'. Khasu" wim gari nanu" gi hau: goo yo' akhyeing" ashoeb su" da" myi: myoo: dangain" ziri lhoem: yo" said oung: pyam wa zi nghoid.
17 Hau: lho: khyoid yu khyoo: ri sham: mug, yhang: ti" yu zhoung" ci: lho: Venyi: khyo" byid: to" da" Mangso mungdang: ein: da" lhab, sham: ri we' voin ci: ge.
18 Mangso jhang mo pang" thoug khyoo: yo" yu baja"- goeb khyo' akyu" mho' ziyo' he: khyoo: dangain" gu: ri zei: so' nyid ge- gyeungshang: da" Venyi: vhu" she: ziyo' dakhyoo" ti" ayo, khang" moo" moo akyu" mho' nyid ge- he: gang mo nheigloem: soozoo: lheung: nyid ziyo' khanham we' asoem" akham' goo" Mangso byu yi shid re" khanham we' akyu" mho' nyid ge.
19 Ngoo tid wa zi jen" uri Mangsoo ngoo ri mungdang: byid: baja"- hau: ngeibu: lu dang: da" no, thang dangkang: ri agyug avoem, loo:- seing" yang" yang" yo" tid kyoo" sho' nga" shid re" we' akyu" bo mho' ge.
20 akhid" ngoo gi thung: loung" jo, su: danghoid loug we' hau" ngeibu: lu dang: ge shid re" lagyoo: zeing dayug nghoid- hau: ngeibu: lu dang: gi ri kho" kyoo" wa shid re" ngoo kho" kyoo" eung: ziyo' dakhyoo" ti" seing" yang" ziyo' yo" tid kyoo" baja"- akyu" bo mho' byid: nyid ge.
21 Ngoo ciwim nyid ziyo' khasu" koid nyid da" khyoo: ri nanu" yo" si' sho' hau: Aseing da" moozoo" moo lho: nheigloem: zung" da" dei zoo- nghoid da" ngoonu" jheddab mangnhung" phoo- Tukhiku gi nanu" ri nga" khyoo: lo tid kyoo" wa zi nghoid.
22 Houg: yoomo ngoonu" dangain" bang: khasu" wim nyid da" khyoo: lu dang: dangain" nanu" ri tid kyoo" baja"- houg: yo' nanu" ri yoem: byid: baja" ein: nanu" jhang khyoo: ngoo, nyang: ri nhang: kaid zi nghoid.
23 Nyha" Phoo Mangsoo yo' Aseing Yesu Khristu gi Khristain mangnhung" yi dangain" bang: ri ngei pyo: khyoo: ri jheddab ziyo' loem" jeing" emyed kaid byid: baja" o".
24 Khanham we' abei: ashoem: da" jheddab nheigloem: yo' ngoonu" da" Aseing Yesu ri jheddab nyid bang: dangain" mo jhang moo Mangso da" jeju" gi dajo, jo, baja" o".