1 Aseing gi Moshe yo' Arun ri 2 Vhoo: moo: tid to" da" Israela byumyu" yi shid re" thung" ri: joem ri byid: too" bye:. Yuggi dayug gi nya: da" yuggi alhoo: mo ayeing thu uri hau: ayeing gi ayung" alho' nghoid da:. 3 Hau: yuggi alhoo: mo ayeing atheing: thu nyid loug we' anghoid lang" theing: byug loug we' ayung" alho' nghoid da:. 4 Nyang: yhoeb da" joyoo- zhung: da" joyoo dangain" gi ayung" alho' bue" da:. 5 Nya: yhoeb yoo moo: byu dayug yug zang" tain"- 6 anghoid lang" hau: yug zhung: bye: daja: ja: moo zang" zhung: su: gi nya: byimi ri cid" pyam lho: gung we' cid" pyam ca" wa zi nghoid. Nyang: gi myen" thang: ju" sho' ayung" alho' nghoid da:. 7 Dayug yug gi ayeing thu nyid da" su: ri zang" tain" rigi nya: byimi ri cid" pyam lho: gung we' cid" pyam ca" wa zi nghoid. Nyang: gi myen" thang: ju" sho' ayung" alho' nghoid da:. 8 Thung" khyo" younglho' bye: da" byu dayug da" atho' moo: ayeing thu da" byu dayug da" shakain" zang" gyoin: nghoid rigi hau: yug gi nya: byimi ri cid" pyam lho: gung we' cid" pyam ca" wa zi nghoid. Nyang: gi myen" thang: ju" sho' ayung" alho' nghoid da:. 9 Ayeing thu da" su: zhung: da" myang: too: yo' zhungtang gi ayung" alho' nghoid da:. 10 Hau: yug zhung: da" jonu" ce: ja: moo: nghoid nghoid zang" tain" da" su: hang" nghoid loug we' myen" thang: ju" sho' ayung" alho' nghoid da:. Hau: yug zhung: da" jonu" ce ja: ri nghoid nghoid yu su: gi nya: byimi ri cid" lho: nya gung we' cid" ca" wa zi nghoid. Nyang: gi myen" thang: ju" sho' ayung" alho' nghoid da:. 11 Foid yeing thu da" yug gi lo, xang: shi" acid" loo: za: dayug yug ri zang" tain" nghoid rigi hau: yug gi nya: byimi ri cid" lho: nya: gung we cid" wa zi nghoid. Nyang: gi myen" thang: ju" sho' ayung" alho' nghoid da:. 12 Nyang: zang" tain" da" myidzhoo" oug" kha: loem: nghoid nghoid baid kho' pyam ca" lho: nyang: zang" tain" da" seig jarung kha: loem: nghoid nghoid cid" pyam ca" wa zi nghoid.

13 Byu hau: yug gi nya: ayeing thu dam ri byang" pyam thang: ri nyang: gi nyhed nyid" lang" ca" wa zi nghoid. Hau: thang: nya: byimi ri cid" wigi nyang: we' gyid gyeing: lang moo: gung cid" ca" wa zi nghoid. Houg: lang" nyang: gi thung" khyo" younglho' bye: zi nghoid. 14 Shed nyid" ein: nyid" ri nyang: gi pheing" khoug" eig du: anghoid lang" jid: u: eig du: ri Aseing da" shidkhoin" zoem" khoug: khyoo: ci: re" wigi hau: ziri khainjung lo, moo: ab byid: wa zi nghoid. 15 Khainjung phoo gi ngho' dadu: ri yooboo khyoid xoin" khyo" gootu: dadu: ri myi: nghe' xoin" khyo" bo ngei" byid: wa zi nghoid. He khyoo: khyo" nyang: gi hau: yug da" shid re" thung" khyo" kyeing" sain khyoo: ri koid wa zi nghoid.

16 Yuggi dayug gi myoug: yeing thu lang" nyang: gi gung goin" gung cid" pyam ca" zi nghoid. Nyang: gi myen" thang: ju" sho' ayung" alho' nghoid da:. 17 Myoug: yeing gyo" zang" da" byimi anghoid lang" shooyid yo' koid da" jonu" ce ja: nghoid nghoid cid" ca" wa zi nghoid lho: hau: zigi myen" thang: ju" sho' ayung" alho' nghoid da:. 18 Yuggi yo' myiyi: gung shoo" xoem" khau: thang: ri gung cid" pyam ca" wa zi nghoid lho: nya: tang: gi myen" thang: ju" sho' ayung" alho' nghoid da:.

19 Myiyi: dayug gi nya: mi ci: da" ayo, ri nyang: gi nyhed nyid" ayung" alho' nghoid nyid. Nyang: ri zang" tain" da" hang" nghoid loug we' myen" thang: ju" sho' ayung" alho' nghoid da:. 20 Nyang: mi ci: da" ayo, ri zhung: da" jonu" anghoid lang" jhang" da" jonu" ce: ja: nghoid nghoid ayung" alho' nghoid da:. 21-23 Nya: yhoeb yoo moo: anghoid lang" nyang: zhung: da" jonu" ce: ja: moo: nghoid nghoid zang" tain" su: hang" nghoid loug we' nya: byimi ri cid" lho: gung we' cid" ca" wa zi nghoid. Nyang: gi myen" thang: ju" sho' ayung" alho' bue" nyid. 24 Yuggi dayug gi myiyi: myhi' mi ci: da" ayo, ri gung shoo" zoem" khau: nghoid rigi myiyi: myhi' da" ayung" alho' ziyo' aco' ajhoid bui" nhang: wigi nyhed nyid" ju" sho' ayung" alho' bue" nyid. Hau: yuggi yhoeb da" yhoeb yoo kha: loem: nghoid loug we' ayung" alho' nghoid da:.

25 Myiyi: myhi' dayug gi nya: mi ci: da" ayo, lid thang: ri suid" shoin: nyid shi" anghoid lang" lhung bue" ayo, tho' lid lho: shoin: nyid nghoid rigi nyang: suid" xo' shoin: nyid da" ayo, dangain gi mi ci: da" ayo, yhang: ti" nyang: ayung" alho' bue" nyid. 26 Nyang: jhang" da" yhoeb yoo kha: loem: nghoid nghoid yo' nyang: zhung: da" jonu" kha: ja: nghoid nghoid hau: yo, dangain" moo: ayung" alho' bue" nyid. 27 Hau: ziri zang" tain" da" hang" nghoid loug we' ayung" alho' nghoid da:. Nyang: gi nya: byimi ri cid" lho: nya: gung ri we' cid" ca" wa zi nghoid. Nyang: gi myen" thang: ju" sho' ayung" alho' nghoid nyid. 28 Nyang: suid" shoin: zi theing: thang: ri nyhed nyid" ju" sho' lang" ca" wa zi nghoid. Hau: thang: nyang: gi thung" khyo" younglho' bye: da:. 29 Shed nyid" nyid" ri nyang: gi pheing" kyoug" eig du: anghoid lang" jid: u: eig du: ri Aseing shidkhoin" Zoem" akhoug: mo khainjung pho jang" khyoo: ci: yhi: wa zi nghoid. 30 Khainjung phoo gi ngho' dadu: ri yooboo khyoid xoin" khyo" gootu: dadu: ri myi: nghi' xoin" khyo" ngei" byid: wa zi nghoid. He: khyoo: khyo" nyang: gi hau: myiyi: myhi' shid re" thung" khyo" younglho' khyoo: ri bo koid wa zi nghoid.

31 Aseing gi Moshe ri nyangnu" da" dab agung moo: jo, da" nya: shidkhoin" Zoem" ri aco' ajhoid akoid pyam wa shid re" nyangnu" da" ayung" alho' khyoo: yo' sen: lho: Israela byumyu" yiri tid poin" wa shid re" tid da:. Nyangnu" hau: Zoem" moo aco' ajhoid koid nghoid rigi said pyam shoug" wa zi nghoid.

32 He: thung" ri: joem gi ayeing yau da" yuggi phoo anghoid lang" myoug: yeing thu da" yuggi phoo- 33 mi ci: da" myiyi: myhi' anghoid lang" thung" khyo" ayung" alho' da" myiyi: myhi' yo' gung shoo" zoem" khau: da" yuggi yo' sen: da" thung" ri: joem nghoid.