1 Aseing gi Moshe ri 2 Ref 14:2: Mat 8:4; Mar 1:44; Luk 5:14; 17:14. Manggam ge loo su: dayug da" younglho' thung" yo' sen: wigi vhoo: moo: tid to" da" thung" ri: joem ri byid: to" da:. Nyang: ri younglho' bye: ga: tid fu" kaid da" bidnyid ri nyang: ri khainjung pho jang" khyoo: shu" yhi: wa zi nghoid. 3 Khainjung phoo gi nyang: ri dab tunggung khyoo: shu" thu yhe: wigi nyang: ri joeb ca: yu" wa zi nghoid. Dam ge lo" nghoid rigi 4 khainjung phoo gi thung" khyo" younglho' pyam bye: da" ngho' eig du: ri shamu dajab- tei" ni dakhaid- pagyoem dakyang: yo' dage" yu ci: ri" wa shid re" amyeing" byid: wa zi nghoid. 5 Hau: thang: khainjung phoo gi ngho' dadu: ri gyid seig kaid to" da" myidzhoo" jarung: adang moo: said wa shid re" amyeing" byid: wa zi nghoid. 6 Nyang: gi gootu: ngho' dadu: ri yu wigi hau: ngho' said kaid to" da" suid jarung: moo shamu jab- tei ni khaid- pagyoem kyang: yo' dage" hau: suid" moo doin: nhoeb wa zi nghoid. 7 Nyang: gi suid" ri manggam ge lo" lho: younglho' byid: zi shoug" su: da" adang moo nyhed lheing: peig zhain' gyoin: wigi nyang: gi hau: yug ri younglho' bye: ein: tid fu" wa zi nghoid. Nyang: gi dei shi" da" ngho' rigi pa: dain" khyoo: dang: phang: loo" nhang: wa zi nghoid. 8 Byu hau: yug gi nya: byimi joem ri cid"- xam: ri nyham" pyam wigi gung cid" wa zi nghoid. Hau: thang: nyang: gi thung" khyo" younglho' bye: zi nghoid. Nyang: gi dab khyoo: yo" vang loo" bye: nghoid loug we' nyang: gi nya: zoem" tunggung moo: nyhed nyid" nyid ca" wa zi nghoid. 9 Nyhed nyid" ju" lang" nyang: gi nya: vhuloem- nhoid mei:- myo, mei: yo' gung moo dab da" gootu: shoomoug" dangain" ri nyham" pyam wa zi nghoid. Nyang: gi nya: byimi ri cid" lho: gung cid" wa zi nghoid. Hau: thang: nyang: gi thung" khyo" younglho' bye:.

10 Shed nyid" ein: nyid" ri nyang: gi ce: noo dam abo da" dazain byeung" yang loo: nu" eig du:- yang moo" dadu: yo' zhainloin: xu: yo' lheig to" da" cen: moin" soem: kyen" koo:- zhainloin: xu: daphag ri yu ci: ri" wa zi nghoid. 11 Khainjung phoo gi hau: yug ri we' xoin" joem ri we' Aseing da" zoem" khoug: khyoo: shu" vang loo" wa zi nghoid. 12 Hau: thang: khainjung phoo gi yang loo: nu" dadu: ri xu: daphag yo' dage" yu wigi hau: ziri nyang: gi youg: khyoug" da" xoin" khyo" ngei" byid: wa zi nghoid. Nyang: gi khainjung yi shid re" Aseing ri byid: da" gooki lid jhungshug khyo" shugbyid: wa zi nghoid. 13 Nyang: gi hau: yang nu" ri yooboo khyoid xoin" yo' nghe ngei" xoin" shid re" gougnyhoug ri said da" gyeung" shang: joyoo moo: said wa zi nghoid. Nyang: gi hau: ziri koid ca" da:. Ciwim gari: youg: khyoug" da" xoin" gi yooboo khyoid xoin" yhang: ti" nghoid wigi khainjung pho shid re" nghoid nyid ziyo' gye" gyeung" shang: nyid da:. 14 Khainjung phoo gi yang nu" mo suid" dayham" ri yu wigi hau: suid" ri thung" khyo" younglho' bye: ga: tid fu" byid: bye: su: da" lo, yo shoid nukhyab thang: moo: we' lo, yo shoid lo, moo" cam" moo we' lo, yo shoid khyid: moo" cam" moo we' joid byid: wa zi nghoid. 15 Khainjung phoo gi zhainloin: xu: dayham' ri nya: lo, kung" shoid lo, voo: khoug: moo: foid yu wigi 16 hau: jang" moo lo, yo shoid lo, nyhoug" danyhoug" doin joem lho: Aseing shidkhoin" hau: joyoo moo: nyhed lheing: peig zhain gyoin: wa zi nghoid. 17 Nyang: gi nya: lo, voo: khoug: moo bo da" xu: dayham" yo' yang nu" mo suid" dayham" ri thung" khyo" younglho' bye: ga: tid fu" byid: bye: su: da" lo, yo shoid nukhyab thang: moo we' lo, yo shoid lo, moo" cam" moo we' lo, yo shoid khyid: moo" cam" moo we' joid byid: wa zi nghoid. 18 Nyang: gi nya: lo, voo: khoug: moo bo da" zhainloin: xu: deing gu: ri yu wigi hau: yug da" vhuloem moo foid gyoin: byid: wa zi nghoid. Hid khyo" wigi nyang: gi thung" khyo" kyeing sain khyoo: ri koid bye: zi nghoid.

19 Hau: thang: khainjung phoo: gi yooboo khyoid xoin" ri ngei" byid: wigi thung" khyo" kyeing" sain khyoo: ri koid wa zi nghoid. Hau: zi bain thang: ri nyang: gi nghe' ngei" xoin" khyo" gougnyhoug ri said wa zi nghoid. 20 Houg loug hau: ziri shivoo: xoin" yo' dage" phoin: tho' moo: ngei" byid: wa zi nghoid. Hid: su" khyo" wigi khainjung phoo gi thung" khyo" kyeing" sain khyoo: ri koid wa zi nghoid lho: hau: yug we' thung" khyo" younglho' bye: zi nghoid.

21 Nghoid loug we' hau: yug gi myung yoomo hau: joem ayo" thu loo: nghoid rigi nyang: gi nya: da" kyeing" sain moo" shid re" nya: youg: khyoug" xoin" ein: da" yang loo: nu" dadu: ri khainjung pho shid re" Aseing jang" khyoo: gooki lid xoin" khyo" ci: ri" wa zi nghoid. Nyang: gi shivoo: xoin" khyo" zhainloin: xu: lheig to" da" cen: moin" dakyen" jain" yo' zhainloin: xu: daphag ri za: ci: ri" wa zi nghoid. 22 Nyang: gi yooboo khyoid xoin" shid re" dadu: yo' nghe' ngei" xoin shid re" dadu: khyo" pheing" kyoug" eig du: anghoid lang" jid: u: eig du: ri we' ci: ri" wa zi nghoid. 23 Nya: da" kyeing" sain pyam thang: shed nyid" ein: nyid" ri nyang: gi hau: joem ri zoem" akhoug: mo khainjung pho jang" khyoo: ci: yhi: wa zi nghoid. 24 Khainjung phoo gi yang nu" yo' zhainloin: xu: ri yu wigi khainjung pho shid re" Aseing ri byid: da" gooki lid jhungshug khyo" hau: joem ri shugbyid: wa zi nghoid. 25 Nyang: gi yang nu" ri said wigi suid" dayham" ri yu lho: hau: ziri hau: yug da" lo, yo shoid nukhyab thang: moo: we' lo, yo shoid lo moo" cam" moo: we' lo, yo shoid khyid: moo" cam" moo: we' joid byid: wa zi nghoid. 26 Khainjung phoo: gi xu: dayham" ri nya: lo, kung" lo, voo: moo: kaid wigi 27 Hau: ziri lo, yo lo, nyhoug" yo' Aseing shidkhoin" moo nyhed lheing: peig zhain' gyoin: wa zi nghoid. 28 Nyang: gi xu: dayham" ri yu wigi suid" ri joid byid: yhang: ti" hau: yug da" lo, yo nukhyab thang: moo: we' lo, yo lo, moo" cam" moo: we' lo, yo khyid: moo" cam" moo: we' joid byid: wa zi nghoid. 29 Lo, voo: mo xu: deing gu: ri hau yug da" vhuloem moo: foid khyo byid: wa zi nghoid. Hid: khyo" wigi thung" khyo" kyeing" sain khyoo: ri koid wa zi nghoid. 30 Hau: thang: nyang: gi pheing" kyoug" dadu: anghoid lang" jid: u: dadu: ri 31 yooboo khyoid xoin" khyo" wigi goodu: rigi shivoo: xoin" yo' dage" nghe ngei" xoin" khyo" ngei" byid: wa zi nghoid. Hid khyo" wigi khainjung phoo gi thung" khyo" kyeing" sain khyoo: ri koid wa zi nghoid. 32 He: zigi manggam no da" byu dayug shid re" tarha" nghoid. Nghoid loug we' nya: kyeing" sain moo" shid re" eung: da" xoin" ri ayo" byid: bang: ca" da" tarha" nghoid.

33  Aseing gi Moshe yo' Arun ri 34-35 vhoo: moo: tid to" da" mhoug" jung" to' da" yhoem: joem yo' sen: wigi tarha" ri byid: bye:. (He: zigi nyangnu" seing: da" mougmyid khyo" Aseing gi nyangnu" ri byid: bye: da" Khanan moug: khyoo: Israela byumyu" yi vang lo" thang: ri byid: zi nghoid.) Nyang: tu: nya: yhoem: moo: mhoug" jung" ri myang da" hang" nghoid loug we' yhe: wigi hau: khyoo: ri khainjung phoo ri tid kyoo" ca" zi nghoid. 36 Khainjung phoo gi mhoug" jung" ri ayhe: yu" shi" uri yhoem: khoug: mo zi ja: khang" moo" ri vu, thu pyam wa shid re" amyeing" byid: wa zi nghoid. Hougsu" anghoid lang" yhoem: khoug: mo zi ja: khang" moo" gi ayung" alho' ga: tid fu" wa zi nghoid. Hau: thang: nyang: gi yhoem: khyoo: yhe: wigi 37 mhoug" jung" ri yhe: joeb ca: yu" wa zi nghoid. Hau: zigi nyoug nyoug anghoid lang" ni ni wim wigi pyiyam moo zo: vang lo" nghoid rigi 38 nyang: gi hau: yhoem: mo thu wigi nyhed nyid" byeung" sho' khoem" soo" so" too" wa zi nghoid. 39 Nyhed nyid" ju" lang" nyang: doem tau" lo wigi hau: ziri doem joeb ca: yu" wa zi nghoid. Hau: mhoug" jung" je: jo, nghoid rigi 40 Nyang: gi mhoug" jung" dab da" lug boem joem ri yu wigi voomoo" tunggung ayung" alho' da" joyoo moo: yhe: she: pyam wa shid re" amyeing" byid: wa zi nghoid. 41 Hau: thang: nyang: gi yhoem: akhoug: shoid pyiyam joem ri khyeug khyo' pyam wigi byilaid aphei" joem ri we' voomoo" tunggung ayung" alho' da" joyoo moo: yhe: boem too" wa zi nghoid. 42 Hau: thang: gootu: lugboem joem ri yu pyam bye: da" lugboem joem joyoo moo: doem thid kaid wigi byilaid aseig ri ci: wigi pyiyam ri doem xi wa zi nghoid.

43 Hau: yhoem: moo: lugboem joem ri we' yu pyam lho: yhoem: ri we' khyeug pyam wigi byilaid doem tab pyam thang: ri mhoug" jung" dalheing doem to re" nghoid rigi 44 khainjung phoo yhe: yu" wa zi nghoid. Hau: zi je: lo nghoid rigi yhoem: gi ayung" alho' nghoid da:. 45 Hau: yhoem: ri phyo' pyam wigi houg mo lugboem joem seig pyi" joem yo' byilaid phei" joem ri voomoo" tunggung shoid ayung" alho' da" joyoo moo: yhe: de" pyam ca" wa zi nghoid. 46 Hau: yhoem: ri khoem soo" so" to" uri vang lo" da" su: hang" nghoid loug we' myen" thang: ju" sho' ayung" alho' nghoid da:. 47 Hau: yhoem: khoug: moo: jhang" jo, anghoid lang" zoo: noem zo: da" hang" nghoid loug we' nya: byimi ri cid" pyam ca" wa zi nghoid.

48 Yhoem: ri byilaid yo' doem nyheing pho: pyam thang: khainjung yhe: yu" uri mhoug" jung" atoo' loo: yoomo nyang: gi hau: yhoem: ri thung" khyo" younglho' bye: ein: tid fu" wa zi nghoid. Ciwim gari mhoug" jung" ri bain sho' yu pyam bye: da:. 49 Hau: yhoem: ri kyeing sain' pyam wa shid re" nyang: gi ngho' eig du:- shamu jab dajhi- khyeing: ni yo' pagyoem dakyang: ci: ri" wa zi nghoid. 50 Nyang: gi ngho' dadu: ri gyid gyeing: kaid to" da" myidzhoo" jarung: adang moo: said wa zi nghoid. 51 Hau: thang: nyang: gi shamu jab- pagyoem- khyeing: ni yo' dei da" ngho' ri yu lho: gyid gyeing: moo: said kaid to" da" ngho' suid" moo doin: joem wa zi nghoid. Houg lho: hau: yhoem: moo nyang: gi nyhed lheing: peig zhain' gyoin: wa zi nghoid. 52 Hid su" wigi nyang: gi ngho' suid"- gyid gyeing:- ngho' dei- shamu jab- pagyoem kyang:- khyeing: ni yo' wigi yhoem: ri kyeing sain khyoo: koid wa zi nghoid. 53 Hau: thang: nyang: gi ngho' dei du: ri voomoo" tunggung shoid pa: dain" khyoo: yhe: nhang: kaid wa zi nghoid. Hid su" khyo" wigi nyang: gi yhoem: shid re" thung" khyo" kyeing" sain khyoo: ri koid wa zi nghoid lho: hau: zigi thung" khyo" younglho' wa zi nghoid.

54 He: tarha" joem gi manggam aja ja: 55-56 dam joid joem byeing joem anghoid lang" ne yam: lo da" dam joem yo' byimi joem anghoid lang" yhoem: moo: to' da" mhoug" jung" joem yo' sen: zi nghoid. 57 He: tarha" joem yo' wigi daja: ja: ri younglho' ziyo' ayung" alho' zi ein: myid phyed byid: wa zi nghoid.