16
1 Arun da" nya: yuggi zo: tang: Aseing ri agyeungshang: da" myi: shugbyid: uri said pyam shau" yoomo shid: lo" thang: ri Aseing gi Moshe ri dang: tid bye:.
2 Ref 16.2: Heb 6.19. Nyang: gi ?Re" mang: Arun ri ge eung: da" ayo, moo za: hau: gyeung" shang: thang da" joyoo yab khyo' pain" ruang: nungthang khyoo: nyang: yhi: wa shid mo tid kyoo" we'. Ciwim gari: ngoo gi hau: joyoo moo Dang: Theing Kuid: amyhid" dang mo jhoemmoug" khoug: moo: nga" gung ri thu shug wa yoomo nghoid. Nyang: atam" gyo nghoid rigi said pyam shoug" wa zi nghoid.
3 Ref 16.3: Heb 9.7. Nyang: gi hau gyeung" shang: thang da" joyoo khyoo: yooboo khyoid xoin" shid re" nuloo: bam: dadu: yo' nghe' ngei" xoin" shid re" yang loo: dadu: ri she: re" thang: ri za: hau: gyeung" shang: thang da" joyoo khyoo: ge vang loo" wa zi nghoid ein: tid kyoo" we? ga: tid.
4 Hau: thang: Aseing gi vhoo: moo: tid to" da" jhoug" shid dang: ri byid: too" bye:. Arun gi gyeung" shang: thang da" joyoo khyoo: vang loo" wa shid mo:- nyang: gi gung cid" lho: khainjung void byi: void mi nghoid da" zin: yung" pain" byisheing:- zin: yung" lhoo" dung:- phyid" cu" yo' vhu" thoeb joem ri yu void ca" wa zi nghoid.
5 Israela shava byu yigi Arun ri yooboo khyoid xoin" shid re" coidbaid loo: eig du: yo' nghe' ngei" xoin" shid re" yang loo: dadu: ri ci ri" byid: wa zi nghoid.
6 Nyang: gi nuloo: dadu: ri nyang: nya: yooboo yo' nya: yhoem: byu yooboo joem ri yu pyam byid: wa shid re" xoin" khyo" shugbyid: wa zi nghoid.
7 Hau: thang: nyang: gi hau: coidbaid eig du: ri Aseing shidkhoin" Zoem" khoem" duang: khyoo: she: vang loo" wa zi nghoid.
8 Houg moo: dacab gi Aseing shid re" ga: gootu: dacab gi Azazela shid re" ga: xoem" to" da" lugboem eig loem: ri ci: lho: me" lab wa zi nghoid.
9 Arun gi Aseing shid re" ga: me" lab lho: khyen: yu da" coidbaid ri yooboo khyoid xoin" khyo" ngei" byid: zi nghoid.
10 Azazela shid re" khyen: to" da" coidbaid dadu: rigi dei zi nyang: Aseing ri shugbyid: wigi shava byu yi da" yooboo joem ri yu pyam byid: wa shid re" Azazela jhang dain" pyoid yoo khyoo: nhang: kaid wa zi nghoid.
11 Arun gi nuloo: ri nyang: yo' nya: ikoin deungkhu: byu yi shid re" yooboo khyoid xoin" khyo" ngei" byid: uri
12 Nyang: gi myioug" phain daloem: moo: phoin: dang mo myi: gyeing" da" myigyu: joem byeung" sho' kaid yu lho: houg moo ge da" nam pyo: ja: lo, eig zhoeb kaid wigi gyeung" shang: thang da" joyoo khyoo: ci: yhi: wa zi nghoid.
13 Nyang: gi hau: Aseing shidkhoin" moo nam pyo: ja: ri nghi' wa zi nghoid wigi hau: nam pyo: ja: da" myikhoug" gi Dang: Theing Kuid: amyhid" ri go too" byid: wa zi nghoid yoomo nyang: gi hau: ziri ashau" myang ziyo' ashid: wa zi nghoid.
14 Nyang: gi nuloo: suid" dayham" ri yu lo wigi hau: amyhid" da" shidkhoin" moo: nya: lo, nyhoug" wigi peig zhain' gyoin wa zi nghoid. Hau: thang: suid" dayham" ri Dang: Theing Kuid: shidkhoin" moo nyhed lheing: peig zhain' gyoin: wa zi nghoid.
15 Hau: thang: ri nyang: gi byumyu" yi shid re" yooboo khyoid xoin" khyo" coidbaid ri said lho: hougmo suid" joem ri gyeung" shang: thang joyoo khyoo: ci: vang lo" wigi hau: ziri amyhid" dang moo: lo" peig zhain gyoin: wa zi nghoid. Hau: thang: Dang: Theing Kuid: shidkhoin" moo we' nulo: suid" ri nyang: koid bye: yhang: ti" koid wa zi nghoid.
16 He: khyoo: khyo" wigi nyang: gi Israela byumyu" yi da" ayung" alho' jang" mo we' nyangnu" da" yooboo mo we' thung" khyo" younglho' pyam wa shid re" gyeung" shang: thang joyoo moo: nyang: koid wa zi nghoid. Nyang: gi hau: ziri Zoem" khoug: moo: koid wa zi nghoid. Ciwim gari: hau: Zoem" gi dab agung moo: jo' yoomo nghoid lho: hau: zigi thung" khyo" ayung" alho' nghoid da:.
17 Thung" khyo" younglho' pyam moo" zoo" ri koid wa shid re" gyeung" shang: thang yab khyoo: Arun vang lo" da" ayo, mo zi nyang: doem thu re" da" ayo, ju" sho' Zoem" khoug: moo: hang" we' age nyid nyid nghoid da:. Nyang: gi nyang: nya: shid re" nya: yhoem: byu shid re" yo' shava byu yi shid re" thung" yo' sen: da" moo" ri bain koid lang"
18 nyang: gi nghe' ngei" xoin" ngei" byid: wa shid re" phoin: khyoo: thu yhe: lho: hau: ziri younglho' byid: wa zi nghoid. Nyang: gi nuloo: suid" dayham" yo' coidbaid suid" dayham" ri yu lho: phoin: jhoin: mo zeing vhu" joem moo: joid ca" wa zi nghoid.
19 Nyang: gi nya: lo, nyhoug" yo' suid" dayham" ri phoin: tho' moo: nyhed lheing: peig zhain' gyoin: ca" wa zi nghoid. He: khyoo: khyo" wigi nyang: gi Israela byumyu" yi da" yooboo mo phoin: ri younglho' pyam wigi hau: ziri gyeung" shang: nhang: wa zi nghoid.
20 Arun gi gyeung" shang: thang da" joyoo Aseing da" shidkhoin" Zoem" mo deing da" gu: yo' phoin: ri thung" khyo" younglho' khyoo: bain koid lang" nyang: gi Azazela shid re" khyen: to" da" dei da" coidbaid ri Aseing jang" moo shugbyid: wa zi nghoid.
21 Nyang: gi nya: lo, eig lo, goin" ri coidbaid da" vhuloem tho' moo ke" wigi akhyeing" ashoeb da" zi: yooboo joem yo' Israela byumyu" yi da" goem lau to' da" khyoo: dangain" ri hau: coidbaid da" vhuloem tho' moo: tid yhen: yu wa zi nghoid. Hougsu" khyo" wigi hau: joem ri coidbaid da" vhuloem khyoo: tid foin: pyam wa zi nghoid. Hau: thang: coidbaid rigi soin' to" da" yug wigi dain" pyoid yoo khyoo: yhe: khaid kaid wa zi nghoid.
22 Coidbaid gi byu anyid mung" khyoo: nyang: yo' dage" nyangnu" yooboo dangain" ri voin yhe: loo" wa zi nghoid.
23 Hau: thang: Arun gi zoem khoug: khyoo: vang yhe: wigi hau: gyeung" shang: thang da" joyoo khyoo: vang loo" wa shid vhu" moo: void ci: da" khainjung byimi ri khyoid pyam lho: hougmoo: too" khoo' wa zi nghoid.
24 Nyang: gi gyeung" shang: joyoo moo: gung cid" pyam wigi nya: byimi doem void wa zi nghoid. Hau: thang: nyang: thu lo" wigi nyang: nya: yooboo yo' hau: byumyu" yi da" yooboo yu pyam wa shid re" nghe' ngei" xoin" ri shugbyid: wa zi nghoid.
25 Nyang: gi yooboo khyoid xoin" shid re" gougnyhoug xu: ri phoin: tho' moo: nghe' ngei" wa zi nghoid.
26 Coidbaid ri Azazela shid re" dain" pyoid yoo khyoo: yhe: koin" kaid da" yug gi dab khyoo: avang loo shi" uri nya: byimi yo' nya: gung ri cid" ca" wa zi nghoid.
27 Suid" khyo" yooboo ri yu pyam byid: wa shid re" gyeung" shang: thang joyoo khyoo: yooboo khyoid xoin" ngei" byid: wa shid re" ci: da" nuloo: yo' coidbaid ri dab tunggung khyoo: dang yhe: lho: shooyid- shoogi- vu: joem dangain" ziri nghe' pyam wa zi nghoid.
28 Hau: joem ri nghe' su: gi dab khyoo: atau" loo shi" ri nya: byimi yo' nya: gung ri cid" pyam ca" wa zi nghoid.
29 Vhoo: moo: tid to" da" thung" ri: joem gi ju" loo wa da" ayo, akhyeing: dangain" moo: cang yhe: nyid ca" da" khyoo: joem nghoid. Lhammoo" nyhed khyab daxi nyid" ein: nyid" ri Israela byumyu" yi yo' nyangnu" akhoug: moo: nyid da" tungbau byumyu" yigi zooshug jang" pyam ca" ziyo' ce" moo" we' age koid wa zi nghoid.
30 Hau: nyid" ri nyangnu" gi nyangnu" da" yooboo dangain" ri younglho' pyam wa shid re" thung" ri: cang lho: koid ca" ago". Houg: lang" nyangnu" gi thung" khyo" younglho' bang: bue" loo wa zi nghoid.
31 Hau: bidnyid gi gye" gyeung" shang: yoomo nyangnu" yugkhang" moo" gi zoo: noem jang" lho: danyid" goin" moo" age zei: nghoid da:.
32 Nya: pho khoo: moo: aya: xo' kham: yu wa shid re" shugbyid: to" wigi nyeing" za: lo, ki" byid: zi: kham yu to" da" khainjung moo" gi thung" khyo" younglho' pyam khyoo: ri koid wa zi nghoid. Nyang: gi khainjung void byi: void mi ri void wigi
33 gyeung" shang: thang da" joyoo- Aseing shidkhoin" Zoem" khoug: mo deing da" joyoo- phoin:- khainjung yi yo' shava byu yi dangain" ri younglho' pyam wa shid re" thung" yo' sen: khyoo: ri koid wa zi nghoid.
34 He: thung" ri: joem gi ju" loo wa da" ayo, akhyeing: dangain" moo: cang nyid ca" da" khyoo: joem nghoid. Israela byumyu" yi nyangnu" da" yooboo dangain" ri kyeing sain pyam byid: wa shid re" hau: thung" yo' sen: da" khyoo: ri dazain dalheing: koid ca" ago" da:. Houg: yoomo Moshe gi Aseing amyeing" byid: to" ziyo' dayhang: ti" koid bye:.