5
1 Yesu gi Meshia nghoid ga: loem" jeing" byu hang" nghoid loug we' Mangso nya: zoo: yi nghoid wigi hau: nya: phoo' ri jheddab mo, hang" Nghoid loug we' nya: zoo: ri we' jheddab nyid bye:.
2 Ngoonu" gi Mangsoo ri jheddab lho: wigi nya: da" amyeung" tarha" joem ri cang zei: lo" boem nghoid rigi Mangso da" nya: zoo: yi ri we' jheddab nyid khyoo: ngoonu" si' bye:.
3 Khasu" wim gari Mangso amyeung" tarha" ri cang zei: lo" khyoo: gi nyang: ri jheddab ein: da" khyoo: nghoid nyid. Nya: amyeung" tarha" gi ngoonu" shid re" cang yau: nyid zi anghoid.
4 Khasu" wim gari Mangso da" nya zoo yug khang" moo" gi hau: mougmyid ri yo" oung: lo" ago"- mougmyid ri ngoonu" yo" oung: lo" da" khyoo: gi ngoonu" loem" jeing" da" nheigloem: mo nghoid.
5 Yesu gi Mangso nya zoo nghoid ga: loem" jeing" su: za: anghoid rigi mougmyid ri hang" su: yo" se' oung: loo" wa lha".
6 Yesu Khristu gi gyid moo babtisma kham: yu lho: shid: kham: suid" shoin: ziyo' ju" ri" su nyang nghoid. Nyang: gi gyid' yo' za: ju" re" zi anghoid- gyid yo' we' suid" yo" we' ju" re" zi nghoid. Houg: su" ju" re" khyoo: deung nyid ziri hau: Venyi: nyang sagsi kham byid: nyid. Khasu" wim gari hau: Venyi: nyang- deingmain" da" khyoo: nghoid nyid.
7 Sagsi: soem" ja: bo.
8 Houg: bang: gi Venyi:- Gyid- yo' suid" nghoid wigi hau: soem ja: gi dakhyoo" ti" du, go" khyo" sagsi kham byid: nyid boem.
9 Ngoonu" gi sube" da" sagsi kham dang: ri loem" se' nyid boem:. Nghoid loug we' Mangso da" sagsi kham dang: ri loem" se' nyid boem:- nghoid loug we' Mangso da" sagsi kham khyoo: gi je" geingteing lho: nyang: gi nya: zo: da" khyoo: ri sagsi kham byid: nyid.
10 Houg: su" nghoid yoomo Mangso nya: zoo: ri loem" jeing" bang: hang" Nghoid loug we' he: da" sagsi kham dang: ri nya: nheigloem: ung: khoug: moo xoem" to". Nghoid loug, Mangsoo ri aloem" jeing" bang: hang" nghoid loug we' nya: zo: khyoo: Mangsoo nyang: sagsi kham byid: ziri aloem" jeing" yoomo Mangsoo gi mhoug su nghoid ga: jho: boem ago".
11 Hau: sagsi dang: koem gi he: zi nghoid- Mangsoo gi ngoonu" ri athang agoin da" kangso ri byid: bye: yoomo hau" kangso da" apoem: ayang: gi nya: zoo: nyang: nghoid nyid.
12 Hau: nya: zoo ri yo" yu su hang" nghoid loug we' hau: kangso ri yo" yu ci: bye:- nya: zoo: ri ayo" yu shi" su gi kangso we' ayo" yu.
13 Nanu" gi apyaid atoo: mo dei nyid wa kangso yo" yu bye: da" khyoo: ri goolhoo' yo" si' goo" baja" Mangso nya: zoo: ri loem" jeing" nyid mo, nanu" jhang khyoo:- ngoo he: mougsoug" ri lhid" kaid.
14 Mangsoo gi nyang: myid vho: ziyo' dakhyoo" ti" ngoonu" mho' da" khyoo: ce: ja: ri we' tam" gyoo: byid: khyoo:- goolhoo' nyang: loem" jeing" boem bye: yoomo ngoonu" gi nya: shidkhoin" khyoo: asho' agyug loo: za: yo" vang yhe: lo" boem bye:.
15 Ngoonu" gi nyang: ri mho' yoid, da" ayo, khang" moo" moo nyang: tam" gyoo: byid: nyid. He: khyoo: gi deung zi nghoid ziri ngoonu" si' yoomo ngoonu" gi nya: jhang moo mho' da" khyoo: ri yo" yu bye: khyoo: joem ri we' se' nyid boem bye:.
16 Re" mang: re" nhung" dayug yug gi ashid: moin: da" yooboo daja: ja: zei: nyid nghoid rigi nang shau" myang nghoid ri nang gi nya: shid re" re" Mangso jhang akyu" bo mho' nyid ca"- Mangsoo gi nyang: ri apyaid ato: kangso byid: wa zi nghoid. Hau: zigi shid: moin: da" yooboo akoid mo, shid re" za: mho' byid: wa khyoo: nghoid. Nghoid loug we' shid: moin: da" yooboo ga: zigi jo, jo, wigi hau:shid re" Mangso jhang moo mho' yoid ge da" khyoo: ri ngoo atid noug.
17 Adeung amain" da" moozoo" dangain" gi yau: noo yooboo nghoid nyid, nghoid loug we' shid: amoin: da" yooboo we' jo.
18 Mangso nya: zoo: nghoid bye: su: gi yooboo axo' koid lo: ziri ngoonu" se' nyid boem. Khasu" wim gari nyang: ri Mangso da" nya: zo: wigi zung" lhug nyid yoomo hau: akhyeing" su: gi nyang: moo ayo" tain" loo.
19 Mougmyid gyab, goin" gi hau: akhyeing" su: vhoeb khang" nyid da" akhoug: moo bo jo,- Nghoid loug we' ngoonu" gi Mangsoo yo' sen: mo, nghoid ziri ngoonu" nyang: se' nyid boem.
20 Mangso nya: zoo: gi ju" re" nyid wigi deingmain" da" Mangsoo ri yo" se' yu wa da" nheigloem:- nyang nyhang" ri byid: too" bye: ziri nyhang' se' nyid. Ngoonu" gi nya: zoo: Yesu Khristu yo' dadeing: daloem: za: koid lho: wigi dei nyid boem yoomo deingmain" da" Mangsoo yo' we' dadeing: daloem: za: bue" lho: dei nyid boem. Nyang: gi Mangsoo gyeing" nyang: nghoid nyid ziyo' athang agoin kangso we' nghoid nyid.
21 Nga" zoo yi we"- mhau' da" yu phara" joem ri jang" pyam nyid ge.