4
1 Jheddab bang: we"- Venyi yo" kham: yu bye: ga: tid nyid mo, dangain" bang: ri agyo: loem" nyid goo". Nyangnu" yo" kham: yu bye: ga: da" Venyi gi- Mangso jhang mo gyoo" lo da" Venyi nghoid la" ca: yu" nyid ge' khasu wim gari:- mhau, da" lapi: yi myoo" sho'- jo, yoo khyi khang" moo" moo: ju" nyid bye:.
2 Mangso da" Venyi nghoid zi- anghoid ziri: se' kho' yu" wa shid re" hid: khyo" wigi: se' yu" wa zi nghoid. Yesu Khristu gi xangsu: byu gung void ci: lho: ju" re" ga: yhen: yu bang: hang" nghoid loug we'- Mangso Venyi yo" kham: yu ci: bang: nghoid.
3 Nghoid loug we'- hau: Yesu ri ayhen: yu bang: hang" nghoid loug we'- Mangso jhang mo gyoo" re" da" Venyi: ri yo" kham: yu ci: bang: anghoid. Nyangnu" moo: bo da" Venyi gi- nanu" shoug" gyo: yu" bye ziyo' dakhyoo" ti" ju" re" nyid- nghoid bye: akhid' lang" mougmyid khyoo: ju" ri" bye:. Khristu da" gyivoo pho Venyi: danghoid.
4 Nga" zoo: yi we"- nanu" gi Mangsoo yo' sen: mo, nghoid nyid boem wigi- hau: mhau, da" lapi: yi gi- mougmyid yo' sen: mo, nghoid boem yoomo- nyangnu" gi mougmyid khyoo: ri za: tid sang: nyid boem ago, mougmyid mo mo, we' nyangnu" da" dang: ri tam" gyo: ago".
5 Hau: mhau, da" Lapi: yi gi- mougmyid yo' sen: mo, nghoid boem yoomo- nyangnu" gi mougmyid khyoo: ri za: tid sang: nyid boem ago". Mougmyid mo mo, we' nyangnu" dang: ri tam" gyo: ago".
6 Nghoid loug we' ngoonu" gi- Mangso shoid mo mo, nghoid nyid boem- Mangsoo ri si bang: hang" nghoid loug we"- ngoonu" da" dang: ri tam" gyo: nyid boem ago". Mangso shoid mo anghoid bang: koem gi- ngoonu" da" dang: ri tam" gyo: boem zi anghoid- hid: khyo" ngoonu" gi deing main" da" Venyi ri kham: yu ziyo' shoid da" Venyi: ri kham: yu mo, da" adu go" khyoo: ri- yo" se' yu boem.
7 Jheddab bang: we" nyhang" nyang: cang" jheddab go" nyid boem shang- khasu" wim gari:- jheddab nheig' loem: gi- Mangso jhang mo nghoid, jhed se' dab su: hang" nghoid loug we'- Mangsoo nya: zoo: nghoid wigi- Mangsoo ri si' su: nghoid nyid.
8 Jheddab da" nheig' loem aboo su: gi- Mangsoo ri si' su: anghoid- khasu"wim gari- Mangsoo gi jheddab nheig' loem nghoid.
9 Ngoonu" ri nya: zoo: khyo" wigi: apyaid atoo: mo kangso yo" yu goo" baja" ga- Mangsoo gi nya: zoo ti" zoo: ri mougmyid khyoo: nhang: kaid byid: bye ziyo'- nyang: ngoonu" ri jheddab khyoo: toin" shid too" bye:.
10 jheddab nheig' loem ein: tid uri- nyhang" Mangsoo ri jheddab ziri: tid nyid zi anghoid- ngoonu" da" yau: noo yooboo ri khyoid pyam byid: wa shid re- gung leig' xoin" bui" baja" ga- nya: zoo ti" zoo: ri nhang: kaid ziyo' jheddab bye: khyoo: ri tid nyid zi nghoid.
11 Jheddab bang: we"- Mangsoo gi nyhang" ri hid: yhi, jheddab bye: nghoid rigi- nyhang" we' nyang: cang" nyang: jheddab goo" nyid shang.
12 Mangsoo rigi: hang" dalheung: we' amyang yu" nghoid loug we'- nyang" nu" nyang cang" nyang: se' jheddab go" nyid boem nghoid rigi- Mangsoo gi nyhang" yo' dadeing: daloem: za: bue" wigi:- nyid nyid, yoomo- nya: jheddab emyed gi nyhang" moo: joeb, byeung" loo wa zi nghoid nyid.
13 Nya: da" Venyi gi ngoonu" ri byid: too" bye: yoomo- nyhang" gi nyang: yo' dadeing daloem: za bue" lho: nyid nyid bye: ziri ngoonu" gi goolhoo' nyang: se' nyid boem bye:.
14 Mougmyid da" khyoid yu Aseing bui" baja" ga:- nya: phoo' gi hau nya zoo ri nhang: kaid bye: khyoo: ri- ngoonu" yo" myang, bye: ziyo' sagsi yo" kham boem bye zi nghoid.
15 Yesu gi Mangso nya: zoo: nghoid ga: wigi- byu dayug yug wigi: yhen: yu nghoid rigi- nyang: gi Mangsoo yo' dadeing: daloem: za: bue" lho: nyid nyid su: nghoid bye:. Mangsoo we' nyang: yo' dadeing: daloem: za: bue" lho: nyid nyid gu nghoid bye:.
16 Hougsu" nghoid nyid yoomo- ngoonu" da" atho' moo: Mangso jheddab nheigloem: byid: too" bye: ziri ngoonu" nyang: se' ziyo' loem" jeing" boem bye:. Mangsoo gi jheddab nheig' loem: nghoid- houg: su" nghoid yoomo jheddab nheig' loem: moo: kangso dei nyid bang: hang" nghoid loug we'- Mangsoo yo' dadeing: daloem: za: bue" lho: nyid nyid- Mangsoo we' nyang: yo' dadeing: daloem: za: bue" nyid.
17 Ngoonu" moo: nya: zo: da" jheddab nheig' loem: joeb, byeung" lo ziyo'- tarha" dang: phyed da" bid nyid moo: ngoonu" gi- agyug asho' da" nheigloem: yo" yu boem wa zi nghoid. Khasu" wim gari: he:da" mougmyid moo- ngoonu" kangso dei nyid khyoo: gi- Khristu da" kangso dei khyoo: yo' dakhyoo" ti" nghoid nyid boem bye:.
18 Jheddab da" nheig' loem: moo- gyoug voem myid aboo lo da" jheddab nheig' loem: ga: zigi- gyoug voem, da" nheig' loem: ze khaid' thu pyam nyid. Houg: su" nghoid rigi: gyoug voem da" nheig' loem: boo mo, hang" jhang moo: we'- jheddab nheig' loem: gi ajoeb byeung"- khasu" wim gari: gyoug voem, da" nheig' loem: gi- dam' byid: wa zi yo' sen: nyid.
19 Mangsoo gi ngoonu" ri xangshid" mo jheddab nyid yoomo- ngoonu" we' nyang: ri jheddab nyid boem bye:.
20 Byu dayug yug gi- ngoo gi Mangsoo ri jheddab nyid ga: tid lho:- nya: mang: nya: nhung" yi ri anoug, angei, dakoid nyid shi" nghoid rigi- hau: yug gi mhoug, su: nghoid nyid. Khasu" wim gari: nyang: yo" myang, go" nyid da" mang nhung" phoo rilang" ayo" jheddab nghoid rigi:- nyang: amyang, da" Mangsoo ri yo" jheddab wa zi anghoid.
21 Ngoonu" ri Khristu byid: to" da" amyeung" tarha" gi- Mangsoo ri jheddab su: gi- nya: mang: nya: nhung" yi ri we' jheddab ca"� ga: zi nghoid.