33
1 Ngoonu" da" gyivoo yigi joem: abye: go". Nyangnu" gi lhoid zo: lho: gyivoo yi lo, khyoo: ab byid: lo da" bang: nghoid loug we' nyangnu" rigi hang" wigi we' alhoid zoo: hang" ri we' gyid voo lo, kyoo: a ab byid: nghoid ago". Nghoid loug we' nyangnu" da" lhoid zo: ziyo' ab byid: da" akhyeing: ayo, gi thang loo" wa. Nyangnu" nyang: nyang: lhoid zoo: shoug" bang:- phyo' zoo: shau" da" zoo: noem bui" goo" wa.
2 Aseing we" ngoonu" ri nheig khyeug yu la o". Ngoonu" gi nang ri myid lang" nyid. Ngoonu" ri danyid" yo' danyid" goem loem byid: wigi yau: khi" shau" da" ayo, moo ngoonu" ri khyoid yu la o".
3 Ngoonu" shid re" nang gyi khaid byid: lang" byumyu" yigi meing: zain: pa: mo lu: fu: jang" mo tang" phang: lo" ago".
4 Nyangnu" seing: da" zi joem gi yhe: doin: zeig lhoid zi shau" wigi lanyhoeb khyo" lhoid yu pyam zi shoug" ago".
5 Aseing gi gyi: sheung: yug nghoid o". Nyang: gi ja: khang" moo" ri vhoebkhang" nyid. Nyang: gi Yerusalem ri tarha" deingmain" ziyo' jhug zug khyoo: ri byeung" jo, nhang: loo wa.
6 Houg: lho: byumyu" yiri nheigloem: geing: jo, nhang: wa. Nyang: gi nya: byumyu" yiri khanham we' goem loem byid: wigi nyangnu" ri phajhi" yo' lasi phajhi" ri byid: loo goo" wa. Nyangnu" da" phoug" dab thang da" jonu" gi Aseing ri gyoug phoug" zi nghoid loo wa.
7 Sarhi' yigi pang" thoug yu wa shid re" mho' yoid nyid ago". Ngei pyo: yug yo khyoo: ri voin re" boem da" lagyoo: zeing yigi nheig khoo" tung" kyi: ngau nyid ago".
8 Fu" moo" khyoo: joem gi gyung: soo" bang: hang" anyid yoomo gyoug dain pho" zi bue" jo, da:. Myid veing" mougsoug" gi byo, yoin" lo" lho: myid veing" khyoo: joem gi she pyam shau" abye: go. Hang" we hau ziri aphoug" loo nghoid ago".
9 Mungdain: gi akyu" aboo jham" coug: youg bue" jo da:. Lebanon seig moo" yoo gi shoem: nyhau" lo" lho: myidxu: ge da" Sharon janggyoin: gi dain" pyoid yoo yo' dakhyo" bue" lo" wigi Bashan mung" yo' Khamela boem dang moo yug da" seiggam joem mo seig fu' joem shu: gyo" nyid ago".
10 Aseing gi byumyu" yiri ?Akhid" ngoo moo" zei: loo wa. Ngoo khayhi' yoem: boo su: nghoid ziri ci: shug byid: wa.
11 Nanu" gi ce: phoug" adab da moo" joem ri soin' to" lho: nanu" koid zi ja: khang" moo" gi amyed afoo" nghoid da:. Nga" Venyi gi nanu" ri phyo' shoin' pyam wa da" myi: yhang: ti" nghoid da:.
12 Nanu" gi shafuid" lug joem yhang: ti" moin" byug boem wa. Myimoeb nge" joem: lo" da" zu: kyin: gam joem yhang: ti" nghoid goo" wa.
13 Vi: moo jang" moo nyid da" yugkhang" moo" ri ngoo koid da" moo" ri shoug" gyoo: nhang: lho: nga" yoem: so' ri yhen: yu nhang: ge'? ga: tid da:.
14 Ziun moo nyid boem da" yooboo yoo" bang: gi gyoug wigi ko' ko' nain" nyid ago". Nyangnu" gi ?Mangso da" dang: phyed khyoo: gi apyaid atoo: moo nge" nyid da" myi: yo' du da:. Houg yhang: te" da" myi: mo ngoonu" hang" dayug yo" nyid deing wa la"? ga: tid ago".
15 Nanu" jo da" dang: tid wigi jo da" moo" zei: boem nghoid rigi nanu" yo" nyid deing boem goo" wa. Sho" jhen: bang: ri fain" zoo: wa nanu" da" yoem so' ri aci: goo". Khougvhoid jhungshug ri ayu goo". Byu said wa yo' akhyeing" da" gootu: moo" joem ri koid wa soin to" da" bang: yo' azoem" goo".
16 Houg: lang" nanu" goem loem shoug" wa. Nanu" gi teing da" gyidab moo nyid bang: yhang: ti" goem loem shoug" goo" wa. Nanu" gi zoo: noem yo' shug gyid yo" loo goo" wa.
17 Shoid khang" moo" khyoo: ce" yhe: lo" da" mungdain: moo myonhoo: yoeb bang yo' vhoeb da khokham dayug ri nanu" dalheing: doem shau" myang loo goo" wa.
18 Nanu" shid phyang" gyoug lo boem da" tungbau kheing" koid: bang: yo' jooyu" bang: dangain" gi laxoem" za: date: nghoid loo wa.
19 Nanu" ase' gyo: da" myeing" ri kaid wigi khuang da" tungbau byu yi dayug ri we' nanu" ashau" myang loo goo" wa.
20 Ngoonu" da" noku thung" pui" joem koid da" joyoo nghoid da" Ziun voomoo" ri yu" ge'. Yerusalem ri yu" ge'. Hau: zigi khayhi' gau: da" joyoo nghoid wa la. Hau: zigi khanham we' ashu" da" zoem" yo' du loo wa. Hau: da" zeing thug joem gi khanham we' aboin" loo wa. Hau: da" tei" joem khanham we ayoem: abyed wa.
21 Aseing gi nya: phung" yoeb ngoonu" ri ci: shug byid: wa. Ngoonu" gi dam da" gyid gyung: moo" yo' gyid zoo: gyung: ayam moo shoug" nyid loo wa. Nghoid loug we' gyi khaid da" lhid joem gi hau: adang moo agu: ri" goo? wa.
22-23 Hau: lhid joem mo tei" joem gi amyed afoo" nghoid da:. Lhid mo pain" ruang: ri ayo" pei: to' kaid nghoid da:. Ngoonu" gi gyivoo gyidab joem da" jonu" dangain" ziri yo" seing: yu goo" wa. Sung myo: yoomo khyid: gyoug: bang: lang" gamboem shoug" yu boem goo" wa. Aseing nyang: nyang: nanu" khokham nghoid loo wa. Nyang: gi ngoonu" ri vhoeb wigi goem loem byid: loo wa.
24 Ngoonu" mung" moo nyid boem da" bang: hang" dayug we' no wigi khanham we' adoem myeing" myoo: loo goo" wa. Yooboo dangain" gi khyoid pyam byid: shoug" wa.