1 Byumyu" dangain" bang: we"- loo ge'. lheing khoem re" foem: nyid wigi tam" gyoo: ge'. Mougmyid gyab goin" yo' houg moo nyid da" bang: yugkhang" moo" hid khyoo: re" wigi tam" gyoo: ge'. 2 Aseing gi byumyu" yi dangain" yo' nyangnu" da" gyidab joem dangain" ri nheig yo: da:. Nyang: gi nyangnu" ri phyo' shoin' pyam wa dang: phyed abye:. 3 Nyangnu" da" manggung ri myhoeb shoung: zi ashau" goo" wa. Hau: jang" moo leung boeb nam jo, goo" wa. Boem joem gi suid" kyeing" byang: byang: ne jo, wa. 4 Bid- Lhammoo"- Kyi:- joem gi pheilhoug: bui" sho' gyoeb byug wa. Mougkhung: gi mougsoug" deing: lhoem" byug yhang: ti" byug loo" wa. Kyi: joem gi zabyid nei mo anghoid lang" lafoem gam mo afu' joem shu: gyo" lo" yhang: ti" shu: gyoo" lo" byug wa.

5 Aseing gi nya: shamcoin" ri mougkhung: moo nyheing to" abye:. Hau: zigi akhid" phyo' pyam wa ga: nyang: wigi byumyu" yiri dang phyed to" da" Edom ri zain: loo wa. 6 Nya: shamcoin" gi houg bang: da" suid" yo xu: wigi lhu" jo, wa. Hau: zigi xoin" ngei" byid: da" yang yo' coidbaid joem suid" yo' xu: ti" du wa. Aseing gi hau xoin" ri Bozra voomoo" moo ngei" byid: loo wa. Nyang: gi Edom mung" moo xoo: sho' byu said moo" ri koid wa. 7 Byumyu" yigi nulam" yo' nuloo: nu" joem yhang: ti" leung loo" goo? wa. Myid gung gi suid" za: byang: byang: ne jo, wigi xu: wigi nghoeb pyam wa. 8 He: ayo, gi Aseing wigi Ziun ri khyoid yu lho: nya: gyivoo yiri latoo: phug byid: wa ayo, nghoid.

9 Edom gyid lang joem gi gaiddaya bue" lo" byug lho: myidzhoo" gi fang bue" lo" byug wa. Damung" goin" gi gaiddaya nge" yhang: ti" nge" loo wa. 10 Hau: zigi myen" ri nyid" ri nge" nyid wigi myikhoug" joem gi houg moo apyaid atoo: thu nyid wa. Hau: mougmyid gi dapyaid thang: dapyaid moug: gang bue" jo, wigi houg khyoo: hang" dayug we' gyung: adoem so" lid: yhi: goo" wa. 11 Khung" boeb yo' kano, joem gi houg moo byeung" nyid goo" wa. Hau: zigi phain" so: to" zi aju" shi" uri yo' dakhyo" Aseing gi hau: ziri moug: gang: koid pyam wa. 12 Hau: mungdain: ri vhoeb wa khokham anyid wa. Vhujhung yi dangain" mo, bei: byug wa. 13 Zu: bang yo' phyoopaid gam joem gi khokham kho" dangain" moo yo' vang khyam: bo da" voomoo" dangain" ri yug se: nghoeb pyam loo wa. Hau: akhau: moo khuidkoo" yo' khung" boeb joem nyid loo goo" wa. 14 Kyang: da" gougnyhoug lam" joem gi houg moo so" lam" yen" wigi yu joem gi nyang: cang" nyang: yoid loo goo" wa. Yu myhi' joem gi hougmoo: dougnoo: wa joyoo re" sho: boem goo" wa. 15 Khung" boeb joem nyangnu" soid koid wigi u khyo' lho: anu" phug wigi hougmoo khu: gyi: loo goo" wa. Langda joem gi dadu: thang: dadu: houg khyoo: zeing: re" boem goo" wa.

16 Aseing da" mougsoug" pug moo sho: yu" lho: citid to" ziri nghab yu' ge'. Hau gougnyhoug joem mo dadu: we' abyug wa. Byencang" abo zi dadu: we' aboo wa. Aseing gi hougsu" nghoid wa amyeing" khyo' to" bye:. Nyang: nyang: hau joem ri dage" zheing" yu wa. 17 Hau: joem ri mougmyid kho' byid: lho: hau joem mo du: khang" moo" ri gamboem byid: wa su: gi Aseing nghoid da:. Nyangnu" gi hau: mougmyid moo dapyaid thang: dapyaid nyid loo goo" wa. Apyaid atoo: moo hau: joem ri nyangnu" seing: loo goo" wa.