1 Dayo, moo jhug zug da" khokham dayug yo' tarha" deing byeung" da" khyo" vhoeb da" byumyu" vhujhung: yi nyid loo goo? wa. 2 Nyangnu" mo yugkhang" moo" gi lid mo khau: nghi: wa joyoo- Uglid mo phang: goug" wa joyoo yo' dayhang: ti" nghoid loo wa. Nyangnu" gi dain" pyoid yoo moo yau da" gyid zoo: gyung: yo' dakhyo"- moug: kyug myid kyug moo jo, da" lug moo" da" bid shoem: yoeb yo' dakhyoo" ti" nghoid nyid da:. 3 Nyangnu" myojid" yo' nukhyab joem gi myung shoo" bang: shid re" phang too" byid: loo wa. 4 Nyangnu" gi nheigloem: aleing" loo goo" wa. Nyangnu" gi se' gyo: ziyo' moo" zei: wigi nyangnu" tid nau da" dang: kang: ri tid loo goo" wa. 5 Koo" su: ri ngi: shab byid: to" ga: dayug we' ajhoo: wa. Mhau fain" su: ri deingmain" su: ga: dayug we' atid goo" wa. 6 Koo" su: gi akoo" adau: dang: tid lho: akhyeing" da" lo, moo" koid wa myid thu kaid da:. Nyang: koid ziyo' nyang: tid zigi Aseing ri rue" zi nghoid wigi nyang: gi zooyoid bang: ri khanham we' abyid: zhoo"- gyid shid bang: ri ci: we' abyid: jhug nghoid da:. 7 Byu koo" gi akhyeing" su: nghoid lho: akhyeing" da" moo" joem ri koid da:. Nyang: gi myung: shoo" bang: ri byo, yoin" nhang: da" mhau' dang: khau" tid wigi nyangnu" yo" yu eung: da" akho: akhang" ri toem pyam byid: da:. 8 Nghoid loug we' ngi: shab byid: shau" da" byu gi deing: deing: main: main: koid wigi jo khyoo: moo teing za: yab jo, da:.

9 Myen myen za: kangso' dei nyid da" myiyi: nanu" we"- myid amyoo: goo"- ngoo tid da" dang: ri tam" gyoo: we'. 10 Akhid" nanu" nheugdeug nyid ri nyid goo" we'. Nghoid loug we' sang: nheig he: yo, ri nanu" nheigloem: thang goo" wa. Ciwim gari nanu" phyo' zheing" yu wa zabyid shi" ajo, yoomo nghoid wa. 11 Nanu" gi myen myen za: kangso' dei lo ago". Myid amyoo: nghoid ago". Nghoid loug we' akhid" gyoug wigi nain" nyid ge'. Nanu" byimi joem ri khyoid pyam lho: nanu" phyid" doem moo mi joid wigi tei" ci: we'. 12 Koug ziyo' nanu" yanggang moo thoin: ge'. Ciwim gari myidxu: ge da" yoothung" joem yo' zabyid khyam: joem gi phyo' shoin' pyam shau" abye: go". 13 Zu: bang yo' zukyen: gam joem gi nga" byumyu" yi da" mougmyid moo yug jo, da:. Byu joem ngei pyo: nyid boem da" yhoem: joem dangain" shid re" yo' dei noem byeung" sho' nyid da" voomoo" shid re" ngoug byid gyoo" ge'. 14 Khokham khoo" rilang" she pyam too" kho' zi shau" wigi voomoo" zeing gi bain sho' jham" coug: youg nghoid byug wa. Zung" nyid da" yhoem: joem yo' gyidab joem gi apyaid atoo: moo byo, yoin" jo, wa. Siyoo loo zei: joem gi houg moo so" yen" wigi yang joem gi houg moo coung" yoo shau" myang wa.

15 Nghoid loug we' Mangsoo gi nya: Venyi: ri ngoonu" jhang dalheing: doem nhang: kaid byid: wa. Mougmyid gang: gi myidxu: ge re" wigi yoothung" joem gi gug zoo myoo sho' thu loo wa. 16 Mungdain: khyi khang" moo" moo deingmain" ziyo tarha" deingmain" zi bue" jo, wa. 17 Yugkhang" moo" gi jo ziri koid loo wa yoomo ngei pyo: yug yo ziyo' goem loem zigi apyaid atoo: bui" jo, wa. 18 Mangso byu yigi myid myo: zi ajo, wa. Nyangnu" da" yhoem: ikoin deungkhu: joem gi ngei pyo: ziyo' goem loem jo, wa. 19 (Nghoid loug we' leug voo gi seig moo" yoo moo gyo" lho: voomoo" ri phyo' khyo' pyam wa.) 20 Shivoo: joem shid re" gyid agoin agoo" yo" lho: loo zei: joem yo' nu: joem shid re" gau: da" coung" yoo khyi' khang" moo" moo yo" da" su: yugkhang" moo" gi gye" ngei pyo: nyid.