45
1 Yoseb gi nya: dei zoo: yi da" shidkhoin" moo nya: da" kham: zo: nyid da" khyoo: ri ayo" tho' zeing: too" loo:. Houg: yoomo houg: bang: dangain" ri yhoem: pain' khyoo: thu loo" nhang: kaid. Dayug we' anyid lang" Yoseb gi nya: mang: bang: ri nyang: hang" nghoid khyoo: ri tid kyoo" bye:.
2 Nyang: gi ngau eig thui: zeing yo' ngau kaid ri Egutu byu yigi hau: ziri shau" gyo: pyam wigi lu dang: gi khokham khoo" goin" khyoo: fu" loo" bye:.
3 Yoseb nya: mang: nhung" yiri ?Ngoo gi Yoseb nghoid. Nga" phoo gi dadei nyid si" la"? ga: tid. Nghoid loug- nya: mang: bang: hau: khyoo: shoug" gyoo: lang" nyangnu" gi gye" gyoug dain yoomo nyangnu" ci: we' ase' phug tid loo.
4 Hau: thang: Yoseb nyangnu" ri ?Nga" jang mo tain" loo ge'? ga: lang" nyangnu" we' tain" loo bye:. Xo' lho: nyang: gi ?Ngoo gi nanu" Egutu mung" khyoo: oung" kaid shoug" su:- nanu" nya: nhung" Yoseb nyang: nghoid bye:.
5 Nanu" ngoo ri hid: khyoo: oung" zo: kaid da" gang mo amyen akhyoid awim goo"- nya: gung nyang: yooboo afoin: nyid goo". Hougsu" bue" lo zigi mung" byu yi da" kang: ri khyoid yu wa shid re" Mangsoo gi nanu" da" shid vhu" khyoo: nhang: kaid zi nyang: danghoid.
6 He: zigi mougmyid tho' moo eig zain ein: wa da" phang" khoug danghoid shi". Ci shoo" ci: agi wa ci: ashau" yhoem" yu wa da" zain void wim: zain nyang: jo, shi" wa nghoid.
7 Mangsoo gi hid: te" mau" pho" khyoo: khyo" nanu" ri khyoid yu wa shid re" nanu" da" shid vhu" khyoo: ngoo ri nhang: kaid zi nghoid lho: nanu" yo' nanu" da" amyed ashen yi kangso' loid byoin shoug" wa shid re" gyeing" koid zi nghoid.
8 Houg: yoomo ngoo ri hid: khyoo: nhang: kaid mo, gi gyeing" nyang: nanu" anghoid- Mangsoo danghoid. Nyang: gi ngoo ri khokham da" gyi: thang da" zoug: moo" bui" nhang: bye:. Ngoo gi nya: damung" goin" da" yoovoin boo su: nghoid wigi Egutu damung" goin" da" meing: vhoeb zoug: moo" nghoid.
9 Akhid" nga" phoo jhang myab tau" lo" lho: re" zoo: Yoseb hid: su" ga: tid kaid. Mangsoo gi ngoo ri Egutu mung" dangain" da" meing: vhoeb zoug: koid too" bye:- ane" nyid loo nga" jhang re" loo ge'.
10 Nanu" Goshen moug: moo re" nyid ge'. Ngoo yo' jhang jhang hau: joyoo moo re" yo" nyid wa nghoid. Nang we' re" zoo: yi we' re" myid: zoo: yi we' re" da" yang- coidbaid- nu: gougnyhoug joem yo' nang yoo" mooyoo" yo' re" yo" nyid wa nghoid.
11 Nanu" Goshen moo re" nyid nghoid rigi ngoo gi nang ri yo" yu" coung: wa nghoid. Phang" khoug gi wim: zain jo, shi" wa nghoid yoomo ngoo gi nang yo' re" yhoem: byu yiri re" gougnyhoug joem ri we' zooyoid ashau" nyhang: noug? ga: pyeung: kaid.
12 Xo' lho: Yoseb gi ?Akhid" nanu" dangain" bang: yo' Benyamin nang nyang: we' ngoo gi Yoseb nyang: nghoid khyoo: ri myang boem bye:.
13 Ngoo gi khayhi' yoem: so' yoem: vhoo" bo khyoo: yo' nanu" myang moomyang dangain" da" khyoo: nga" ba" ri lo" zhang: kyoo" ge'. Houg: lho: nyang: ri hid: khyoo: myab shu" ri" loo ge'? ga: tid.
14 Nyang: gi nya: nhung" Benyamin ri gab po: lho: ngoug bye:. Benyamin we' nyang: ri po: zeing lho: ngoug bye:.
15 Hau: thang: ngau nyid zoo" re nyang: gi nya: mang: bang: ri po: zeing lho: nyangnu" yugkhang" moo" ri boobug bug byid:. Hau: thang: nya: mang: bang: nyang: yo' dang: ji lo boem ago".
16 Yoseb da" nya: mang: nhung" bang: ju" re" khyo: lu dang: gi khokham vang" goin" fu" lo" wigi khokham phoo yo' nya: zoug: ludaid yigi gyo: gau boem bye:.
17 Nyang: Yoseb ri ?Re" mang: nhung" bang: ri gougnyhoug too: joem soin' lho: Khanan khyoo: tau" loo" nhang: kaid we'.
18 Nyangnu" ri nya: phoo yo' nyangnu" yhoem: byu yiri lo" shu" nhang: lho: hid: khyoo: doem re" loo goo" baja". Ngoo gi Egutu mung" mo ge thang da" joyoo nyangnu" ri byid: wa. Nyangnu" nyid wa joyoo myoo" sho' jo,.
19 Nyangnu" da" yhoem: seing: myhi' bang:- zooshang: bang: yo' nya: phoo ri shu" ri" wa shid re" Egutu mung" mo rheing" joem ri we' ci: loo" we' ein: tid we'.
20 Nyangnu" da" yooboin: sang" goo joem ri too" kho' wa shid re" aci' goo". Egutu mung" mo ge thang zi nyangnu" ri byid: wa? ga: tid.
21 Yaku da" nya: zoo: yigi nyangnu" tid khyo" koid boem bye:. Yoseb gi khokham amyeing" byid: ziyo' dakhyoo" ti" nyangnu" ri rheing" joem byid: kaid lho: gyung: khyoo: moo zookhoo: ri we' byid: kaid bye:.
22 Nyang: gi nyangnu" yugkhang" moo" ri byimi thid wa shid re" byid: kaid nghoid loug Benyamin rigi ngei soem" shoo: pyi" byimi thid wim: zuang ri byid: kaid.
23 Nyang: gi nya: phoo shid re" Egutu mung" mo ge thang jonu" loo zei: daxi: du: mo foin: kaid lho: gug- zoo: noem yo' khyoo: moo zoo: wa da" lazoo: lashug joem ri loo zei: daxi: du: moo foin kaid.
24 Nyang: gi nyangnu" ri ?Gyung: khyoo: moo myeing" amyo loo" goo"? ga: tid kaid wigi nya: mang: yiri nhang: kaid lho: nyangnu" thu loo" bye:.
25 Nyangnu" gi Egutu mo thu lo" lho: nyangnu" nya: phoo Yaku nyid da" Khanan mung"- yhoem: khyoo: tau" loo" boem bye:.
26 ?Yoseb gi dei nyid ashi"- ga: nyangnu" nyang: ri lo" tid kyo". Nyang: Egutu mung" goin" mo vhoebkhang" su: nghoid? ga: lang" Yaku gi gyo: mau" ziyo' nyangnu" ri ayo" loem" byug loo.
27 Nghoid loug nyangnu" ri Yoseb tid kaid khyoo: nyang: ri tid kyo" lho: Egutu khyoo: nyang: ri shu" yhe: uri zhung: nang wa shid re" Yoseb byid: kaid da" rheing" joem ri myang lang" she' nyang: daloem" jeing" lo da:.
28 ?Nga" zoo: Yoseb gi dadei nyid shid" ga: o"? ga: nyang: tid. ?Ngoo vho: zigi houg: nghoid- ngoo ashid: shi" ri nya: jhang yhe: lho: yhe: shoug" wa nghoid? ga: xo' tid.